​​ដោយ​៖ សុវណ្ណ​កុម្ភៈ / ភ្នំពេញ​៖ សហព័ន្ធ​កីឡាបាល់ទាត់ នៃ​ប្រទេស​ថៃ បាន​កោះហៅ​កីឡា​ករ​របស់ខ្លួន ចំនួន ៣ រូប ដែល​កំពុង​លេង នៅ​ក្លិប​នានា នៃ​ទ្វីប​អឺ​រុ​ប ឲ្យ​ត្រឡប់មក​ប្រទេស​វិញ ដើម្បី​ហ្វឹកហាត់ សម្រាប់​ចូលរួម​ព្រឹត្តិការណ៍ ស៊ី​ហ្គេម​លើក​ទី​៣១ នៅ​ប្រទេស​វៀតណាម ។​

​កីឡាករ​ទាំង ៣ នាក់​នោះ មានៈ​
១. Benjamin Davis ៖ កីឡាករ​កើត​នៅ​ឆ្នាំ​២០០០ មាន​តួនាទី​ជា​ខ្សែបម្រើ​របស់​ក្លិប Oxford United ដែល​ក្លិប​កំពុង​លេង នៅ League One នៃ​ប្រទេស​អង់គ្លេស​។ អតីត​យុវជន​របស់ Fullham រូបនេះ ធ្លាប់​ជាប់​ជម្រើសជាតិ U23 ថៃ ចាប់ពី​ឆ្នាំ​២០២០ មកដល់​បច្ចុប្បន្ន និង​បង្ហាញខ្លួន​បាន ៤ ប្រកួត រួចមកហើយ​។​

២. Jonathan Khemdee ៖ ខ្សែការពារ​កណ្ដាល របស់​យុវជន​ក្រោម​អាយុ ២៣​ឆ្នាំ ជា​សមាជិក​របស់​ក្លិប OB ឬ ( Odense Boldklub ) ដែលជា​ក្លិប​ធំ​មួយ លេង​នៅ​លី​គ​កំពូល ប្រទេស​ដា​ណឺ​ម៉ាក​។ យុវជន​វ័យ ១៩ ឆ្នាំ​រូបនេះ ធ្លាប់បាន​បង្ហាញខ្លួន​ចំនួន ៣ លើក រួចមកហើយ លេង​ឲ្យ​ជម្រើសជាតិ ក្រោម​អាយុ ២៣ ឆ្នាំ​ថៃ គិត​ចាប់ពី​ឆ្នាំ​២០២១ មកដល់ពេលនេះ​។​

៣. Chayapiat Supunpasuch ៖ កីឡាករ​រូបនេះ បច្ចុប្បន្ន កំពុង​ប្រកប​អាជីព នៅ​ក្លិប GD Estoril B នៃ​ប្រទេស​ព័រ​ទុយ​ហ្គា​ល់​។ គេ​លេង​ក្នុង​តំណែង​ជា​ខ្សែបម្រើ​ការពារ ដោយមាន​កម្ពស់ ១,៧៦ ម៉ែត្រ កើត​ថ្ងៃទី​២៥ ខែកុម្ភៈ ឆ្នាំ​២០០១ ៕/V​