ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធានាធិបតី​អ៊ុយ​ក្រែន​បាន​និយាយថា អ្នកការទូត​កំពូល​និង​ប្រមុខ​ការពារជាតិ​របស់​ស​ហ​រដ្ឋ​អាម៉េរិក​បាន​ស្ថិត​នៅក្នុង​ទីក្រុង​គៀវ​កាលពី​ថ្ងៃអាទិត្យ​ទី​២៤​មេសា ដែល​នេះ​ជា​ដំណើរ​ទស្សនកិច្ច​កម្រិត​ខ្ពស់​លើកដំបូង​របស់​មន្ត្រី​អាម៉េរិក ចាប់តាំងពី​រុស្ស៊ី​បាន​ឈ្លានពាន​ប្រទេស​ជិតខាង​របស់​ខ្លួន​កាលពី​ពីរ​ខែ​មុន​ខណៈដែល​ការប្រយុទ្ធ​គ្នា​យ៉ាង​ខ្លាំងក្លា​បាន​ជះ​ស្រមោល​​គ្របដណ្តប់​លើ​ពិធីបុណ្យ​អ៊ី​ស្ទើ​អូ​ស្សូ​ដក់ (Orthodox Easter) ។​

​ដំណើរ​របស់​រដ្ឋមន្ត្រី​ការបរទេស​លោក អ៊ែន​ថូ​នី ប្លីង​កិន និង​រដ្ឋមន្ត្រី​ការពារជាតិ ឡយ អូ​ស្ទីន កើត​ឡើង​នៅ​ពេល​ដែល​សង្គ្រាម​ឈាន​ចូល​ដល់​ខែ​ទី​បី​ដោយមាន​អ្នកស្លាប់​រាប់ពាន់​នាក់​និង​រាប់លាន​នាក់​​បាន​ផ្លាស់​ទីលំនៅ ហើយ​ខណៈ​ដែល​ទីក្រុង​គៀវ​កំពុង​ស្វែងរក​ជំនួយ​សង្គ្រោះ​យ៉ាង​អស់សង្ឃឹម​សម្រាប់​ប្រជាជន​អ៊ុយ​ក្រែន​ដែល​ជាប់​នៅក្នុង​ទីក្រុង​ម៉ា​រី​វ​ប៉ូល ដែល​ខ្ទេចខ្ទាំ​។​

​ទីប្រឹក្សា​ប្រធានាធិបតី លោក អូ​ឡេក​ស៊ី អា​រ៉េ​ស្តូវី​ច (Oleksiy Arestovych) បាន​និយាយថា មេដឹកនាំ​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី បាន​ជួប​ជាមួយ​មន្ត្រី​អាម៉េរិក​កាលពី​ថ្ងៃអាទិត្យ ខណៈ​ដែល​អ្នកការពារ​ទីក្រុង​ម៉ា​រី​វ​ប៉ូល “​រកកល់​ដួលរលំ​” ហើយ​អ៊ុយ​ក្រែន​កំពុង​ត្រូវកា​រអាវុធ​វាយលុក​យ៉ាងខ្លាំងបំផុត​។​

​លោក​បាន​និយាយ​នៅក្នុង​បទសម្ភាសន៍​មួយ​ថា “​ដរាបណា​មិន​មាន​អាវុធ​វាយលុក នោះ​នឹង​មាន​ទីក្រុង​ប៊ូ​ចា​ថ្មី​ជា​រៀងរាល់ថ្ងៃ​” ។ គាត់​និយាយ​នេះ​គឺ​សំដៅលើ​ទីក្រុង​មួយ ដែល​ក្រុមមន្ត្រី​អ​.​ស​.​ប​និយាយថា ជន​ស៊ីវិល​ប្រហែល ៥០​នាក់​ត្រូវបាន​សម្លាប់​ដោយ​ខុសច្បាប់​។​

​លោក​អា​រ៉េ​ស្តូវី​ចបាន​បន្ថែម​អំពី​បេសកជន​អាម៉េរិ​ក​ថា “​ប្រហែលជា​ពួក​គេ​អាច​ជួយ​បាន​។ ពួកគេ​នឹង​មិន​មក​ទី​នេះ​ទេ ប្រសិន​បើ​ពួកគេ​មិនទាន់​ត្រៀម​ខ្លួន​ផ្តល់​អាវុធ​”​។​

​ខណៈ​ដំណើរ​ទស្សនកិច្ច​នេះ​នៅ​មិន​ទាន់​ត្រូវ​បាន​បញ្ជាក់​ដោយ​ទីក្រុង​វ៉ាស៊ីនតោន​ហើយ​ព័ត៌មាន​លម្អិត​ត្រូវ​បាន​រក្សាទុក​ជា​ការសម្ងាត់ លោក​ហ្សេ​លេន​ស្គី​បាន​សរសេ​រលើ Twitter នៅ​យប់​ថ្ងៃអាទិត្យ​ថា “​មិត្តភាព​និង​ភាព​ជា​ដៃគូ​រវាង​អ៊ុយ​ក្រែ​ន​និង​សហរដ្ឋអាម៉េរិ​ក​គឺ​ខ្លាំង​ជាង​ពេល​ណាៗ​ទាំងអស់​!”​។​

​សហរដ្ឋ​អាម៉េរិក​គឺជា​អ្នកផ្តល់ជំនួយ​ផ្នែក​ហិរញ្ញវត្ថុ​និង​សព្វាវុធ​ឈាន​មុខ​គេ​ដល់​អ៊ុយ​ក្រែ​ន​និង​ជា​អ្នកគាំទ្រ​សំខាន់​លើ​ការដាក់ទណ្ឌកម្ម​លើ​ប្រទេស​រុស្ស៊ី​ប៉ុន្តែ​មិន​បាន​បញ្ជូន​មន្ត្រី​កំពូល​ណាមួយ​ទៅ​កាន់​ទីក្រុង​គៀវ​ទេ ខណៈ​មេដឹកនាំ​អឺរ៉ុប​មួយចំនួន​បាន​ធ្វើដំណើរ​ទៅ​ទីនោះ​ដើម្បី​បញ្ជាក់​ពី​ការគាំទ្រ​របស់​ពួកគេ​៕

ប្រធានាធិបតី​អ៊ុ​យក្រែន លោក វ៉ូ​ឡូ​ឌី​មៀ ហ្សេ​លេន​ស្គី