​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ និស្សិត​សាកលវិទ្យាល័យ​ស្រីលង្កា​រាប់ពាន់​នាក់​បាន​ប្រមូលផ្តុំ​គ្នា​នៅ​គេហដ្ឋាន​របស់​លោកនាយ​ក​រដ្ឋមន្ត្រី ម៉ា​ហ៊ី​ន​ដា រ៉ា​ចា​ប៉ាក់​សា (Mahinda Rajapaksa) កាលពី​ថ្ងៃអាទិត្យ​ទី​២៤​មេសា​ដើម្បី​ទាមទារ​ឱ្យ​លោក​លាលែង​ពី​តំណែង​ជុំវិញ​វិបត្តិ​សេដ្ឋកិច្ច​កាន់តែ​អាក្រក់​របស់​ប្រទេស​នេះ​។​

​ការ​ដាច់​ចរន្តអគ្គិសនី​រយៈពេល​ជាច្រើន​ខែ អតិផរណា​ខ្ពស់​មិន​ធ្លាប់​មាន កង្វះខាត​ស្បៀងអាហារ​និង​ប្រេងឥន្ធនៈ​ធ្ងន់ធ្ងរ​បាន​បង្ក​ឱ្យ​មានកា​រ​មិន​សប្បាយចិត្ត​ទូទៅ​នៅក្នុង​ប្រទេស​ស្រីលង្កា​ដែល​កំពុង​​តែ​ដោះស្រាយ​ជាមួយ​នឹង​ការធ្លាក់ចុះ​សេដ្ឋកិច្ច​ដ៏​អាក្រក់​បំផុត​ចាប់តាំងពី​ទទួលបាន​ឯករាជ្យ​នៅ​ឆ្នាំ ១៩៤៨​។​

​ការតវ៉ា​កាលពី​ថ្ងៃអាទិត្យ​បាន​ឃើញ​ពួក​មេដឹកនាំ​និស្សិត​នាំគ្នា​ឡើងរ​បង​ផ្ទះ​របស់​លោក​រ៉ា​ចា​ប៉ាក់​សា​ក្នុង​ទីក្រុង​កូឡុំបូ​បន្ទាប់ពី​ប៉ូលិស​បាន​ដំឡើង​របាំង​នៅតាម​ដងផ្លូវ​នានា​ជុំវិញ​រដ្ឋធានី​ដើម្បី​កុំអោយ​​ពួកគេ​ទាក់ទង​ជាមួយ​ក្រុម​បាតុករ​នៅ​កន្លែង​ផ្សេង​។​

​មេដឹកនាំ​និស្សិត​មិន​បញ្ចេញ​អត្តសញ្ញាណ​ម្នាក់​បាន​និយាយ​ខណៈ​ឈរ​នៅលើ​ជញ្ជាំង​ថា “​អ្នក​អាច​បិទ​ផ្លូវ​បាន​ប៉ុន្តែ​មិន​អាច​បញ្ឈប់​ការតស៊ូ​របស់​យើង​បាន​ទេ​ដរាបណា​មន្ត្រី​រដ្ឋាភិបាល​ទាំងមូល​ត្រឡប់​​ទៅ​ដេក​ផ្ទះ​វិញ​”​។​

​ប្រឈម​មុខ​នឹង​ប៉ូលិស​ទាំង​ជួរៗ​ដែល​កាន់​ខែល​ការពារ​កុបកម្ម ក្រុមអ្នកតវ៉ា​បាន​ព្យាយាម​ទាញ​របាំង​ការពារ​ដែល​រារាំង​ពួកគេ​មិន​ឱ្យ​ចូល​ទៅក្នុង​លំនៅដ្ឋាន​នាយករដ្ឋមន្ត្រី​។

​អ្នកខ្លះ​កាន់​បដា​សរសេរថា “​ទៅផ្ទះ​វិញ​ទៅ​ហ្គោ​តា (Gota)” ដែល​ជា​ឈ្មោះ​ហៅ​ក្រៅ​របស់​ប្រធានាធិបតី ហ្គោ​តាបា​យ៉ា រ៉ា​ចា​ប៉ាក់​សា (Gotabaya Rajapaksa)​ដែល​ជា​បងប្រុស​របស់​លោក​​ម៉ា​ហ៊ី​ន​ដា ខណៈ​អ្នក​ផ្សេង​ទៀត​ពាក់រ​បាំង​មុខ​តួអង្គ​ហ្កាយ ហ្វ​ក​( Guy Fawkes) ដែល​បាន​ក្លាយជា​និមិត្តរូប​នៃ​ចលនា​ប្រឆាំង​រដ្ឋាភិបាល​។​

​ប៉ូលិស​បាន​និយាយថា លោក​ម៉ា​ហ៊ី​ន​ដា ដែលជា​ប្រមុខ​រដ្ឋាភិបាល​កំពុង​កាន់​អំណាច​របស់​ប្រទេស​ស្រីលង្កា មិន​បាន​នៅក្នុង​បរិវេណ​គេហដ្ឋាន​នៅពេល​នោះ​ទេ​ហើយ​ហ្វូង​មនុស្ស​បាន​ចាកចេញ​ដោយ​​សន្តិវិធី​។​

​អស់​រយៈពេល​ជាង​ពីរ​សប្តាហ៍​មក​ហើយ ដែល​បាតុករ​រាប់ពាន់​នាក់​បាន​បោះជំរំ​ជា​រៀងរាល់ថ្ងៃ​នៅ​ខាងក្រៅ​គេហដ្ឋាន​មាត់សមុទ្រ​របស់​ប្រធានាធិបតី​ហ្គោ​តាបា​យ៉ា រ៉ា​ចា​ប៉ាក់​សា ដោយ​ទាមទារ​ឱ្យ​គាត់ ​និង​ប្អូនប្រុស​របស់​គាត់​ចុះចេញ​ពី​តំណែង​។​

​បាតុកម្ម​ទូទាំងប្រទេស​បាន​ឃើញ​ហ្វូង​មនុស្ស​ព្យាយាម​សម្រុកចូល​ផ្ទះ​និង​ការិយាល័យ​របស់​ឥស្សរជន​រដ្ឋាភិបាល​ជាច្រើនរូប​។​

​ក្នុង​សប្តាហ៍​នេះ បុរស​ម្នាក់​ត្រូវបាន​បាញ់សម្លាប់ នៅពេល​ដែល​ប៉ូលិស​បាញ់​ទៅលើ​តំបន់​បិទ​ផ្លូវ​មួយ​នៅ​កណ្តាល​ទីក្រុង​រ៉ា​ម​ប៊ូ​ក​កា​ណា (Rambukkana)​ដែល​ជា​ការស្លាប់​លើកដំបូង​ចាប់តាំងពី​​ការតវ៉ា​កាលពី​ខែ​មុន​។​

​ការដួលរលំ​សេដ្ឋកិច្ច​របស់​ស្រីលង្កា​បានចាប់ផ្តើម​មើលឃើញ​បណ្តើរៗ បន្ទាប់​ពី​ជំងឺ​រាតត្បាត​បានធ្វើឱ្យ​បាត់បង់​ប្រាក់ចំណូល​សំខាន់ៗ​ពី​វិស័យ​ទេសចរណ៍​និង​ការ​ផ្ញើ​ប្រាក់​ពី​បរទេស​។​

​ប្រទេស​នេះ​មិន​អាច​ផ្តល់​ហិរញ្ញប្បទាន​ដល់​ការនាំ​ចូល​សំខាន់ៗ ជាហេតុ​នាំ​ឱ្យ​ខ្វះខាត​អង្ករ ម្សៅ​ទឹកដោះគោ ស្ករ ម្សៅ​ស្រូវ​សាលី និង​ឱសថ ខណៈ​អតិផរណា​ឡើង​ខ្ពស់​កំពុង​បង្ក​ការលំបាក​កាន់តែខ្លាំង​។​

​វិស័យ​អគ្គិសនី ដែល​មិន​អាច​បង់ថ្លៃ​ប្រេងឥន្ធនៈ​បាន បាន​ធ្វើឱ្យ​មាន​ការ​ដាច់​ចរន្តអគ្គិសនី​យូរៗ​រាល់ថ្ងៃ ខណៈ​អ្នកបើកបរ​រង់ចាំ​ជា​ជួរ​វែងៗ​នៅ​ជុំវិញ​ស្ថានីយ​ប្រេង​រៀងរាល់​ព្រឹក​ដើម្បី​ទទួលបាន​ប្រេង​ឬ​ហ្គា​​ស​ចាក់​យានយន្ត ខណៈ​មនុស្ស​តម្រង់​ជួរ​គ្នា​សម្រាប់​ការផ្គត់ផ្គង់​ប្រេងឥន្ធនៈ​និង​ប្រេងកាត​ដែល​មាន​តិចតួច​។​

​រដ្ឋមន្ត្រី​ក្រសួង​ហិរញ្ញវត្ថុ​លោក អា​លី សា​ប្រ៊ី (Ali Sabry) ដែល​កំពុង​នៅ​ទីក្រុង​វ៉ាស៊ីនតោន​ដើម្បី​ចរចា​អំពី​មូលនិធិ​សង្គ្រោះ​របស់​អង្គការ​រូបិយវត្ថុ​អន្តរជាតិ​IMF បាន​ព្រមាន​កាលពី​ថ្ងៃ​សុក្រ​ថា ស្ថានភាព​សេដ្ឋកិច្ច​នៅក្នុង​ប្រទេស​ស្រីលង្កា​ទំនងជា​នឹង​កាន់តែ​យ៉ាប់យ៉ឺន​ថែមទៀត​ហើយ​ប្រទេស​ផ្អាក​សងបំណុល​បរទេស​៕

​ក្រុម​និស្សិតធ្វើដំណើរនិង​ព្យាយាម​សម្រុកចូល​ផ្ទះ​នាយករដ្ឋមន្ត្រី​ម៉ា​ហ៊ី​ន​ដា