ដោយៈ ស​រិ​ទ្ធ / ភ្នំពេញ​៖ បុរស​សន្តិសុខ​ម្នាក់ បាន​ដេកស្លាប់ នៅនឹងកន្លែង​ធ្វើការ ស្ថិតនៅក្នុង​អាគារ​កាណាឌីយ៉ា ស្ថិតក្នុង​សង្កាត់​ចោមចៅ​ទី​១ ខណ្ឌ​ពោធិ៍​សែន​ជ័យ ដែល​ករណីនេះ បាន​បង្ក​ការភ្ញាក់ផ្អើល ដល់​សមត្ថកិច្ច កាលពី​វេលា​ម៉ោង ៨ និង​១០​នាទី​ព្រឹក ថ្ងៃទី​២៥ ខែមេសា ឆ្នាំ​២០២២ ។​

​សព​ជនរងគ្រោះ មានឈ្មោះ ចាយ សេង​ឡៃ អាយុ ៣៨ ឆ្នាំ មុខរបរ ជា​សន្តិសុខ បច្ចុប្បន្ន ស្នាក់នៅ​ក្នុងភូមិ​ព្រៃ​ជី​សាក់ សង្កាត់​ចោមចៅ​ទី​៣ ខណ្ឌ​ពោធិ៍​សែន​ជ័យ មាន​ស្រុកកំណើត នៅ​ខេត្តកំពង់ចាម​។​

​តាម​ប្រភពព័ត៌មាន ពី​សាច់ញាតិ​ជនរងគ្រោះ បាន​ឲ្យ​ដឹងថាៈ កន្លងមក ជនរងគ្រោះ ធ្លាប់មាន​ជំងឺ ប្រចាំកាយ គឺ​ជំងឺលើសឈាម ហើយក៏​ធ្លាប់បាន​ដួល​ម្ដង​រួចមកហើយ បន្ទាប់មក ក្រុមគ្រួសារ​ក៏បាន​យក​បុរស​ខាងលើនេះ ទៅ​ព្យាបាល​នៅឯ​ស្រុកកំណើត ក្រោយពី​ព្យាបាល អស់​មួយរយៈ បាន​ធូរស្រាល ទើប​ជនរងគ្រោះ មក​ដាក់ពាក្យ​ចូល​បំរើ ការងារ ធ្វើជា​សន្តិសុខ នៅ​កន្លែងកើតហេតុ​ខាងលើ ដោយ​ជនរងគ្រោះ ធ្វើជា​សន្តិសុខ ធ្វើការ​នៅ​វេន​យប់ ។ នៅ​ព្រឹក​ថ្ងៃកើតហេតុ ក៏មាន​បុរស ជា​សន្តិសុខ​ម្នាក់ទៀត បាន​ចូលមក​បម្រើ​ការងារ ដូច​សព្វដង ស្រាប់តែ​មកដល់ ក៏​ឃើញ​បុរស ខាងលើ បាន​ស្លាប់​នៅ​កន្លែងធ្វើការ បាត់ទៅហើយ រួច​ក៏បាន​រាយការណ៍ ទៅ​សមត្ថកិច្ច​មូលដ្ឋាន ដើម្បី​ចុះមក ត្រួតពិនិត្យ នៅ​កន្លែងកើតហេតុ​តែម្ដង​។​

​ក្រោយ​កើតហេតុ សមត្ថកិច្ច​មូលដ្ឋាន បានមក​ដល់ រួច​បាន​ទំនាក់ទំនង​ទៅ​សមត្ថកិច្ច ផ្នែក​ជំនាញ​កោសល​វិច័យ នៃ​ស្នងការដ្ឋាន​នគរបាល រាជធានី​ភ្នំពេញ​ចុះមក​ធ្វើ​កោសល្យ វិច័យ និង​ធ្វើ​កំណត់ហេតុ ប្រគល់​សព​ឱ្យ​ក្រុមគ្រួសារ យកទៅ​ធ្វើបុណ្យ តាម​ប្រពៃណី​៕/V