​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ កាំភ្លើង​ធំ M777 ក្នុង​ចំនួន​មិន​បញ្ចេញ​នឹងត្រូវ​បរិច្ចាគ​ដោយ​រដ្ឋាភិបាល​កាណាដា​ឱ្យទៅ​អ៊ុយ​ក្រែន​សម្រាប់​សង្គ្រាម​ប្រឆាំងនឹ​ង​រុស្ស៊ី ដែល​បាន​ចាប់ផ្តើម​តាំង​ពី​ថ្ងៃទី ២៤ ខែ​កុម្ភៈ ឆ្នាំនេះ​។ វេបសាយ BulgarianMilitary.com បានដឹង​ព័ត៌មាន​នេះ​ពី​សេចក្តីប្រកាស​ព័ត៌មាន​ដែល​ចេញ​ដោយ​ក្រសួង​ការពារជាតិ​កាណាដា​។​

​យោង​តាម​ព័ត៌មាន​មិន​ផ្លូវការ កាណាដា​មាន​កាំភ្លើង​ធំ M777​សរុប​ចំនួន ៣៧ ដើម​ដែល​ត្រូវបាន​ផលិតឡើង​ក្នុង​ឆ្នាំ ២០០៨ ដោយ​រដ្ឋាភិបាល​អាម៉េរិក​។ ក្រៅពី​កាំភ្លើង​ធំ​នេះ​កាណាដា​រំពឹង​បញ្ជូន​រថ​ពាស​​ដែក​ទៅកាន់​អ៊ុយ​ក្រែន​ក៏ដូចជា​ជួយ​ជួសជុល​កាមេរ៉ា​របស់ដ្រូន​ដែល​រង​ការខូចខាត​ដោយសារ​អរិភាព​។

​រហូតមក​ទល់​បច្ចុប្បន្ន រដ្ឋាភិបាល​ក្រុង​អូ​តា​វ៉ា​បាន​ផ្តល់ឱ្យ​ទីក្រុង​គៀវ​នូវ​អាវ​ក្រោះ គ្រាប់កាំភ្លើង មួកសុវត្ថិភាព អាវុធ​ប្រឆាំង​រថក្រោះ Carl Gustaf របាំង​ការពារ​ឧស្ម័ន ឧបករណ៍​មើល​ពេលយប់ អាវុធ​ប្រឆាំង​រថក្រោះ M72 LAW ចំនួន ៤.៥០០ ដើម និង​គ្រាប់បែកដៃ​ចំនួន ៧.៥០០ គ្រាប់​។​

​ក្នុងពេល​ជាមួយគ្នា​នេះ អ៊ុយ​ក្រែន​ក៏អាចទទួលបាន​រថក្រោះ T-72 ពី​ប៉ូឡូញ​ផងដែរ​។ ទោះយ៉ាងណា ថា​តើ​ពួកគេ​នឹង​ទទួល​វា​ឬ​អត់​គឺ​អាស្រ័យ​លើ​ការចរចា​រវាង​ប៉ូឡូញ​និង​ចក្រភព​អង់គ្លេស​។​គំនិត​គឺថា​​ប៉ូឡូញ​នឹង​ទិញ​រថក្រោះ Challenger 2 របស់​អង់គ្លេស​ជា​ថ្នូរ​នឹង​ប៉ូឡូញ​បញ្ជូន​រថក្រោះ T-72 របស់​ខ្លួន​ដើម្បី​គាំទ្រ​ដល់​កងកម្លាំង​ប្រដាប់អាវុធ​អ៊ុ​យក្រែន​។​

​យោង​តាម​ព័ត៌មាន​ក្រៅផ្លូវការ ទីក្រុង​វ៉ា​សូវី​មាន​រថក្រោះ T-72A / T-72M1 ចំនួន ១២៧ គ្រឿង​ដែល​បច្ចុប្បន្ន​កំពុង​បម្រើការ​ក្នុង​ជួរ​កងទ័ព​ប៉ូឡូញ ហើយ​មាន​រថក្រោះ​នេះ ២៥៧ គ្រឿង​នៅ​ក្នុង​ស្តុក​។ អ្នកជំនាញ​កត់សម្គាល់​ថា ប្រសិនបើ​អ៊ុយ​ក្រែន​ទទួលបាន​រថក្រោះ T-72 ពួកគេ​នឹង​អាច​ចាប់ផ្តើម​ធ្វើការ​ជាមួយ​ពួក​វា​ភ្លាមៗ​ព្រោះ​រថក្រោះ​ប្រយុទ្ធ​ភាគច្រើន​ដែល​កងទ័ព​អ៊ុយ​ក្រែន​ប្រើ​គឺ​មាន​ប្រភព​​ពី​រុស្ស៊ី ដូច្នេះ​មិន​ចាំបាច់​មាន​ការហ្វឹកហ្វឺន​ពិសេស​សម្រាប់​ការប្រើប្រាស់​ភ្លាមៗ​នោះទេ​៕

​រថក្រោះ T-72 និង កាំភ្លើង​ធំ M777