​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ មន្ត្រី​ក្នុង​តំបន់​បាន​និយាយ​កាលពី​ថ្ងៃ​ចន្ទ​ទី​២៥​មេសា​ថា ស្ត្រី​ជនជាតិ​ជប៉ុន​ម្នាក់​ដែល​គេ​ទទួលស្គាល់ថា​ជា​មនុស្ស​ចាស់​ជាងគេ​បំផុត​របស់​ពិភពលោក​​បាន​ស្លាប់​នៅ​អាយុ ១១៩ ឆ្នាំ​។​

​លោកយាយ កា​ណេ តា​ណា​កា (Kane Tanaka) កើត​នៅ​ថ្ងៃទី ២ ខែ​មករា ឆ្នាំ ១៩០៣ នៅ​តំបន់​ហ្វ៊ុយ​គូ​អូកា (Fukuoka) ភាគ​និរតី​នៃ​ប្រទេស​ជប៉ុន ជា​ឆ្នាំ​តែ​មួយ​ដែល​បងប្អូន​ប្រុស​ឈ្មោះ​រ៉ា​យ (Wright) បាន​ហោះហើរ​ជា​លើកដំបូង ហើយ ម៉ា​រី ឃួ​រី (Marie Curie) បាន​ក្លាយជា​ស្ត្រី​ដំបូង​គេ​ដែល​ឈ្នះ​ពានរង្វាន់​ណូបែល​។​

​លោកយាយ​តា​ណា​កា​មាន​សុខភាព​ល្អ​រហូត​មកដល់​ពេល​ថ្មីៗ​នេះ ហើយ​បាន​រស់នៅ​មណ្ឌល​ថែទាំ​មួយ ទី​ដែល​លោកយាយ​ចូលចិត្ត​លេងល្បែង​អុក ដោះស្រាយ​លំ​ហាត់​គណិតវិទ្យា ពិសា​សូ​ដា និង​សូកូឡា​។​

​ពេល​នៅ​វ័យក្មេង លោកយា​តាណា​កា​បាន​បើក​អាជីវកម្ម​ផ្សេងៗ​រួម​មាន​ហាង​គុយទាវ​និង​ហាង​នំ​ប៉ាវ​។ លោកយាយ​បាន​រៀបការ​ជាមួយ​លោកតា ហ៊ី​ដេ​អូ តា​ណា​កា (Hideo Tanaka) ក្នុង​ឆ្នាំ ១៩២២ ដោយ​បង្កើត​បាន​កូន​បួន​នាក់​និង​ចិញ្ចឹម​កូន​ទី​ប្រាំ​។​

​លោកយាយ​មាន​គម្រោង​ប្រើ​រទេះរុញ​ដើម្បី​ចូលរួម​ក្នុង​ការបញ្ជូន​បណ្តាក់​ភ្លើង​គប់​អូឡាំពិក​ក្រុង​តូ​ក្យូ​ក្នុង​ឆ្នាំ ២០២១ ប៉ុន្តែ​ជំងឺ​រាតត្បាត​បាន​រារាំង​លោកយាយ​មិន​ឱ្យ​ធ្វើដូច្នេះបាន​។​

​នៅពេល​ដែល​សៀវភៅ​កំណត់ត្រា​ពិភពលោក​ហ្គី​ន​ណេ​ស​ទទួលស្គាល់​លោកយាយ​ជា​មនុស្ស​ចាស់​ជាង​គេ​ដែល​នៅ​រស់​ក្នុង​ឆ្នាំ ២០១៩ លោកយាយ​ត្រូវ​បាន​សួរថា​តើ​ពេលវេលា​ណា​ដែល​លោកយាយ​សប្បាយចិត្ត​បំផុត​ក្នុង​ជីវិត​។ ចម្លើយ​របស់​គាត់​គឺ “​ពេលវេលា​បច្ចុប្បន្ន​”​។​

​ទម្លាប់​ប្រចាំថ្ងៃ​របស់​លោកយាយ​គឺ​ភ្ញាក់​ពី​គេង​នៅ​ម៉ោង ៦:០០ ព្រឹក ហើយ​ពេល​រសៀល​ចំណាយពេល​សិក្សា​គណិតវិទ្យា​និង​អនុវត្ត​ការសរសេរ​អក្សរ​ផ្ចង់​៕

​លោកយាយ កា​ណេ តា​ណា​កា​ស្លាប់​នៅ​អាយុ​១១៩​ឆ្នាំ​នៅ​ថ្ងៃ​ចន្ទ​នេះ​