​ដោយៈ បាយ័ន / សៀមរាបៈ សមត្ថកិច្ច​ខេត្តសៀមរាប បាន​ចុះបង្ក្រាប​បទល្មើស​ជលផល នៅក្នុង​ដែន​បឹង​ទន្លេសាប ភូមិសាស្ត្រ​ខេត្តសៀមរាប បាន​ចំនួន ៥៣ ករណី គឺ​ប្រើ​ក្នុង រយៈពេល ៤​ខែ ដើមឆ្នាំ​២០២២​នេះ​។​

​ក្នុង​រយៈពេល​នោះដែរ​ស​ម​ត្ថ​កិច្ច ក៏បាន​បញ្ជូន​ជនល្មើស ចំនួន ៤ នាក់ ទៅ​តុលាការខេត្ត ដើម្បី​ចោទប្រកាន់ តាមផ្លូវ​ច្បាប់ ។ ជាមួយគ្នា​នោះដែរ មាន​មនុស្ស ១១ នាក់​ទៀត ត្រូវបាន​តុលាការ ចេញ​ដីកា​កោះហៅ មក​សាកសួរ​បំភ្លឺ ពាក់​ព័ទ្ធ​បទល្មើស​នេសាទ ។​

​នេះ​បើ​យោងតាម​ការប្រជុំ នៅ​ថ្ងៃទី​២៥ ខែមេសា ឆ្នាំ​២០២២ ដើម្បី​ស្តាប់​របាយការណ៍ ប្រចាំខែ ស្តីពី​យុទ្ធនាការ​ចុះបង្ក្រាប​បទ​ល្មើស​ជលផល នៅក្នុង​ភូមិសាស្ត្រ​ខេត្តសៀមរាប របស់​មន្ទីរ​កសិកម្ម រុក្ខាប្រមាញ់​និង​នេសាទ​ខេត្តសៀមរាប​។​

​លោក ទា គឹម​សុទ្ធ ប្រធាន​មន្ទីរ​កសិកម្ម រុក្ខាប្រមាញ់ និង​នេសាទ​ខេត្តសៀមរាប បាន​និយាយថាៈ បទល្មើស​ដែល​បង្ក្រាបបាន រួមមាន បទល្មើស​នេសាទ​និង​រក្សាទុក ឧបករណ៍​អួន​អូស​ទឹកសាប ២០ ករណី អាំង​វ៉ិ​ច​ទ័​រ​ឆក់​ត្រី ៧ ករណី ឧបករណ៍​បង្កើត​ថ្មី ”​ប​” ៤​ករណី ដាក់​សម្រាស់​ធ្វើ​ឲ្យ​ត្រី​កុំ ១ ករណី ឧបករណ៍​នេសាទ​ស្បៃ​មុង ២ ករណី និង​បទល្មើស​ទន្ទ្រាន​ដីព្រៃ​លិច​ទឹក ១៩ ករណី​។ ក្នុងនោះ សមត្ថកិច្ច បាន​លែង​កូន​ត្រី​ចម្រុះ ប្រមាណ​ជាង ៧០ គីឡូក្រាម ចូលក្នុង​បឹង​ធម្មជាតិ ព្រមទាំង​បាន​ដកហូត​វត្ថុតាង មួយចំនួន មក​រក្សាទុក និង​មួយចំនួនទៀត ត្រូវបាន​បំផ្លាញចោល​នៅនឹងកន្លែង​។​

​លោក ទៀ សីហា អភិបាលខេត្ត​សៀមរាប បាន​និយាយថាៈ បទបញ្ជា​យ៉ាង​ម៉ឺងម៉ាត់ ពីស​ម្តេច​តេ​ជោ ប្រមុខ​រាជរដ្ឋាភិបាល ក្នុងការ​បង្ក្រាប​ទ​ល្មើស​ជលផល​នេះ អាជ្ញាធរខេត្ត បាន​បង្កើត​ក្រុមការងារ​ចំនួន​៦ ដែល​ក្រុម​នីមួយៗ ដឹកនាំ​ដោយ​អភិបាលរង​ខេត្ត​ម្នាក់ ដើម្បី​ពិនិត្យ និង​តាមដាន​បទល្មើស​ព្រៃ​លិច​ទឹក នៅតាម​បណ្តា​ក្រុង ស្រុក ទាំង​៦ ជាប់​ដែន​បឹង​ទន្លេសាប ក្នុងភូមិ​សាស្ត្រ​ខេត្តសៀមរាប​។​

​លោក​បាន​បញ្ជាក់ថាៈ សម្រាប់​ខេត្តសៀមរាប បឹង​ទន្លេសាប គឺជា​តំបន់​ដែល​យើង​ត្រូវ​រួមគ្នា អភិរក្ស​ការពារ ឲ្យ​បានល្អ​ប្រសើរ ឱ្យ​ដូច​ទៅនឹង​តំបន់​ប្រាសាទ និង​តំបន់​ព្រៃឈើ ការពារ ផងដែរ​។​

​លោក ណៅ ធួ​ក រដ្ឋលេខាធិការ ក្រសួងកសិកម្ម រុក្ខាប្រមាញ់ និង​នេសាទ បាន​និយាយ ថាៈ ទោះបីជា​យ៉ាងនេះ​ក្តី សមត្ថកិច្ច អនុវត្តន៍​ច្បាប់ មិនត្រូវ​ធ្វេស​ប្រហែល​ឡើយ ជាពិសេស នៅ​រដូវ​បិទ​នេសាទ ដែល​នឹង​ចូលមក​ដល់ នៅ​ខែកក្កដា ខាងមុខនេះ​៕/V​