ប្រែសម្រួលៈបំណង(ដេល្លីម៉េល)៖ រុស្ស៊ីកាលពីថ្ងៃចន្ទបានព្រមានថាជម្លោះនៅអ៊ុយក្រែនអាចរីករាលដាលទៅជាសង្គ្រាមលោកលើកទីបី និងបានចោទប្រកាន់រដ្ឋាភិបាលទីក្រុងគៀវថាលេងសើចជាមួយនឹងកិច្ចពិភាក្សារកសន្តិភាព ។
ការព្រមាននេះកើតឡើងតែមួយថ្ងៃបន្ទាប់ពីមន្ត្រីជាន់ខ្ពស់អាម៉េរិកបានទៅជួបប្រធានាធិបតីអ៊ុយក្រែនដោយផ្ទាល់នៅទីក្រុងគៀវនិងថាកងកម្លាំងអ៊ុយក្រែនអាចឈ្នះសង្គ្រាមឈ្លានពានរុស្ស៊ីបើមានសព្វាវុធគ្រប់គ្រាន់។
រដ្ឋមន្ត្រីការបរទេសរុស្ស៊ីលោក សឺហ្គេ ឡាវរ៉ូវ បានព្រមានថា ពិភពលោកកុំមើលស្រាលហានិភ័យនៃការផ្ទុះសង្គ្រាមនុយក្លេអ៊ែរ
ជម្លោះនេះនាំអោយផ្ទុះការគាំទ្រពីបណ្តាប្រទេសលោកខាងលិចដែលនាំគ្នាបញ្ជូនសព្វាវុធអោយអ៊ុយក្រែនទប់ទល់នឹងទាហានរុស្ស៊ី។
ថ្លែងទៅកាន់ទីភ្នាក់ងារសារព័ត៌មានរុស្ស៊ី រដ្ឋមន្ត្រីការបរទេសរុស្ស៊ីលោក សឺហ្គេ ឡាវរ៉ូវ បានរិះគន់មធ្យោបាយរបស់រដ្ឋាភិបាលទីក្រុងគៀវក្នុងការធ្វើអោយពិបាកដល់កិច្ចពិភាក្សាស្វែងរកសន្តិភាព ដោយថាហានិភ័យនៃការផ្ទុះសង្គ្រាមលោកលើកទីបី«ធ្ងន់ធ្ងរ»និងថា«វាជាការពិត អ្នកមិនអាចមើលស្រាលវាបានទេ»។
នៅពេលលោកថា កិច្ចពិភាក្សាជាមួយរដ្ឋាភិបាលទីក្រុងគៀវនឹងបន្ត លោកឡាវរ៉ូវបានចោទប្រកាន់ប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គី ថាធ្វើពុតជាចង់ចរចា តែ«អ្នកឯងស្វែងរកការជំទាស់រាប់ពាន់»។
អស់ពេលរាប់ខែមកហើយ លោកហ្សេលេនស្គី បាននិងកំពុងស្នើសុំសព្វាវុធធ្ងន់ធ្ងន់ពីសម្ពន្ធមិត្តលោកខាងលិច រួមមានកាំភ្លើងធំនិងយន្តហោះចម្បាំង ដោយប្តេជ្ញាថាកងកម្លាំងរបស់លោកនឹងកែប្រែស្ថានការណ៍សង្គ្រាមនៅពេលទទួលបានសព្វាវុធច្រើនឡើង។ការអំពាវនាវនេះទំនងទទួលបានផលដោយប្រទេសលោកខាងលិចជាច្រើនសន្យាផ្តល់អាវុធចាប់ពីអាវុធទំនើបធុនស្រាលដល់អាវុធធុនធ្ងន់ ទោះជារដ្ឋាភិបាលក្រុងមូស្គូប្រឆាំងជំទាស់។
រដ្ឋមន្ត្រីការពារជាតិអាម៉េរិកលោកឡយ អូស្ទីន បានប្រាប់អ្នកកាសែតក្រោយវិលមកពីទីក្រុងគៀវវិញជាមួយរដ្ឋមន្ត្រីការបរទេស អ៊ែនថូនី ប្លីងកិនថា «ជំហានដំបូងក្នុងការយកឈ្នះសង្គ្រាមនេះ អ្នកត្រូវមានជំនឿខ្លួនឯងថាឈ្នះ។យើងជឿថាអ្នកនឹងឈ្នះ ។ពួកគេអាចឈ្នះ បើសិនជាមានសម្ភារសឹកត្រឹមត្រូវ ការគាំទ្រត្រឹមត្រូវ»។
ដំណើរទស្សនកិច្ចដ៏រសើបខ្លាំងពីសំណាក់មន្ត្រីជាន់ខ្ពស់អាម៉េរិកនេះធ្វើឡើងចំពេលមានការប្រយុទ្ធគ្នាជាខ្លាំងនៅភាគខាងកើតនិងខាងត្បូងអ៊ុយក្រែន។
រដ្ឋមន្ត្រីការពារជាតិនិងការបរទេសអាម៉េរិកទៅដល់ទីក្រុងគៀវកាលពីថ្ងៃអាទិត្យដើម្បីគាំទ្រខាងស្មារតីនិងសព្វាវុធដល់អ៊ុយក្រែន
រដ្ឋមន្ត្រីការពារជាតិអង់គ្លេសកាលពីថ្ងៃចន្ទបានប្រកាសថា អង់គ្លេសនឹងបញ្ជូនអោយអ៊ុយក្រែននូរថពាសដែកដែលអាចបាញ់កាំជ្រួចប្រឆាំងយន្តហោះរុស្ស៊ី។ប្រភពព័ត៌មានបាននិយាយថា ទាហានអ៊ុយមួយចំនួនកំពុងហ្វឹកហាត់ប្រើរថពាសដែលពិសេសនេះនៅអង់គ្លេស។
ការប្រកាសផ្តល់កាំជ្រួចប្រឆាំងយន្តហោះនេះកើតឡើងចំពេលក្រសួងការពារជាតិរុស្ស៊ីកាលពីថ្ងៃចន្ទបានអះអាងថា កងកម្លាំងអាកាសរបស់ខ្លួនបានវាយប្រហារទីតាំងយោធាអ៊ុយក្រែនចំនួន៨២ រួមមានបញ្ជាការយោធាចំនួនបួន និងឃ្លាំងប្រេងចំនួនពីរ ហើយកងទ័ពបានបាញ់កាំជ្រួចប្រភេទចំគោលដៅខ្ពស់ទៅលើគោលដៅចំនួន២៧នៅក្នុងការវាយប្រហារចុងក្រោយនេះ៕