​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ មន្ត្រី​អាម៉េរិក​បាន​និយាយថា សហរដ្ឋ​អាម៉េរិក​នឹង​ធ្វើជា​អ្នកដឹកនាំ​កិច្ចប្រជុំ​របស់​ប្រទេស​ជាង ៤០​នៅ​ថ្ងៃ​អង្គារ​ទី​២៦​មេសា​នេះ​សម្រាប់​កិច្ចពិភាក្សា​ការពារជាតិ​​ទាក់ទង​នឹង​អ៊ុយ​ក្រែន​ដែល​នឹង​ផ្តោត​លើ​ការបំពាក់​អាវុធ​ដល់​ទីក្រុង​គៀវ ដើម្បី​អោយ​ប្រទេស​នេះ​អាច​ការពារ​ប្រឆាំង​នឹង​លទ្ធភាព​វាយលុក​ទឹក​ផ្តាច់ព្រ័ត្រ​របស់​រុស្សី​ពី​ភាគ​ខាងកើត​។​

​រដ្ឋមន្ត្រី​ការពារជាតិ​អាម៉េរិក​លោក ឡយ អូ​ស្ទីន​កំពុងរៀ​បចំព្រឹត្តិការ​ណ៍​នេះ​នៅឯ​មូលដ្ឋាន​ទ័ពអាកាស​រ៉ា​ម​ស្តេន (Ramstein) ក្នុង​ប្រទេស​អាល្លឺម៉ង់ បន្ទាប់ពី​ធ្វើ​ដំណើរ​ទៅ​កាន់​ទីក្រុង​គៀវ​កន្លែង​ដែល​​លោក​បាន​សន្យា​គាំទ្រ​បន្ថែម​ដល់​កិច្ចខិតខំ​ប្រឹងប្រែង​ធ្វើសង្គ្រាម​របស់​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី​។​

​ឧត្តមសេនីយ៍ ម៉ាក មី​ល​លី (Mark Milley) ដែល​ជា​នាយសេនាធិការ​ចម្រុះ​នៃ​កងទ័ពជើងគោក​អាម៉េរិក បាន​និយាយថា​គោលដៅ​សំខាន់​នៃ​កិច្ច​ពិភាក្សា​គឺ​ធ្វើ​លៃ​សម្រួល​និង​សម្របសម្រួល​ជំនួយ​​សន្តិសុខ​ដល់​ទីក្រុង​គៀវ ដែល​រួមមាន​អាវុធ​ធុន​ធ្ងន់ ដូចជា​កាំភ្លើង​ធំ ក៏ដូចជា​ដ្រូ​ន​និង​គ្រាប់​។​

​លោក​មី​ល​លី​បាន​ប្រាប់​អ្នកយក​ព័ត៌មាន​ដែល​ធ្វើដំណើរ​ជាមួយ​គាត់​ថា “​ប៉ុន្មាន​សប្តាហ៍​បន្ទាប់​នឹងមាន​សារៈសំខាន់​ខ្លាំងណាស់ ។​ពួកគេ​ត្រូវការ​ការគាំទ្រ​ជា​បន្តបន្ទាប់​ដើម្បី​ទទួលបាន​ជោគជ័យ​​នៅលើ​សមរភូមិ​។ ហើយ​នោះ​ពិត​ជា​គោលបំណង​នៃ​សន្និសីទ​នេះ​”​។​

​ត្រូវ​ង​កម្លាំង​អ៊ុយ​ក្រែន​វា​យ​រុញច្រាន​ថយ​ក្រោយ​ចេញពី​ជាយ​ទីក្រុង​គៀវ​នៅ​ភាគ​ខាងជើង រដ្ឋាភិបាល​ទីក្រុង​មូ​ស្គូ​បាន​ដាក់ពង្រាយ​កងទ័ព​របស់​ខ្លួន​ឡើងវិញ​ទៅកាន់​ភាគ​ខាងកើត​សម្រាប់​ការ​វាយ​​លុក​ជើងគោក​នៅក្នុង​ខេត្ត​ផ្តាច់ខ្លួន​ចំនួន​ពីរ​ដែល​គេ​ស្គាល់​ថា​ដុន​បាស​។​

​ក្រុមមន្ត្រី​អាម៉េរិក ដែល​និយាយ​ក្នុង​លក្ខខណ្ឌ​មិន​បញ្ចេញ​ឈ្មោះ បាន​វាយតម្លៃ​ថា រុស្ស៊ី​នឹង​ពឹងផ្អែក​ខ្លាំង​លើ​ការវាយប្រហារ​ដោយ​កាំភ្លើង​ធំ ដោយ​ព្យាយាម​វាយលុក​ទីតាំង​របស់​អ៊ុយ​ក្រែន​ខណៈ​ទីក្រុង​មូ​ស្គូ​​ចល័ត​កងកម្លាំង​ជើងគោក​ពី​ទិស​ដៅ​ជាច្រើន​ដើម្បី​ព្យាយាម​ឡោមព័ទ្ធ​និង​បំផ្លាញ​ផ្នែក​សំខាន់​នៃ​យោធា​របស់​អ៊ុ​យក្រែន​។​

​ប៉ុន្តែ​សហរដ្ឋ​អាម៉េរិក​ក៏បាន​ប៉ាន់​ប្រមាណ​ដែរ​ថា អង្គភាព​រុស្ស៊ី​ជាច្រើន​បាន​បាត់បង់​កងកម្លាំង ដោយ​ក្រុម​មន្ត្រី​មួយចំនួន​និយាយ​ថា ការខាតបង់​ទាហាន​មាន​រហូតដល់​ទៅ ៣០ ភាគរយ​ជា​កម្រិត​​ដែល​យោធា​អាម៉េរិក​ចាត់ទុក​ថា​ខ្ពស់​ពេក​មិន​អាច​បន្ត​ការប្រយុទ្ធ​យក​ជ័យជម្នះ​បានឡើយ​៕

ប្រធានាធិបតីចូ បៃដិន រដ្ឋមន្ត្រី​ការពារជាតិ​អាម៉េរិក​លោក ឡយ អូ​ស្ទីន​ ​និងឧត្តមសេនីយ៍ ម៉ាក មី​ល​លី