​ដោយ​៖ សុវណ្ណ​កុម្ភៈ / ភ្នំពេញ​៖ នៅ​ថ្ងៃទី​២៥ មេសា ម្សិលមិញ​នេះ សហព័ន្ធ​កីឡា​បាល់ ទាត់​កម្ពុជា បានបង្ហាញ​ពី​បញ្ជី​ឈ្មោះ​បឋម នៃ​ក្រុមបាល់ទាត់​ជម្រើសជាតិ អាយុ​ក្រោម ២៣ ឆ្នាំ សម្រាប់​ចេញទៅ​ប្រកួត​កីឡា​ស៊ី​ហ្គេម លើក​ទី​៣១ នៅ​ទីក្រុង​ហាណូយ ប្រទេស​វៀតណាម​ហើយ ។​

​ក្រុមបាល់ទាត់​ជម្រើសជាតិ​កម្ពុជា អាយុ​ក្រោម​២៣​ឆ្នាំ ត្រូវបាន​ចាប់ឆ្នោត ស្ថិតនៅក្នុង​ពូ​ល B សម្រាប់​ប្រភេទ​កីឡាបាល់ទាត់ លើ​វិញ្ញាសា​បាល់ទាត់​បុរស ក្នុង​ព្រឹត្តិការណ៍ កីឡា​អាស៊ីអាគ្នេយ៍ លើក​ទី​៣១ នៅ​ប្រទេស​វៀតណាម ដោយ​រួម​ពូ​ល ជាមួយ​ក្រុម​ខ្លាំង U-23 ថៃ​, U-23 ម៉ាឡេស៊ី​, U-23 សិង្ហ​បុរី និង U-23 ឡាវ ។​

​បញ្ជី​ឈ្មោះ​ដែលមាន​កីឡាករ សរុប ២៦ នាក់ មកពី ១០ ក្លិប នៃ​ពានរង្វាន់​លី​គ​កំពូល និង​លី​គ​ទី​២ កម្ពុជា ពោលគឺ មកពី​ក្លិប​បឹងកេត ៥​នាក់​, ណាហ្គា​វើ​លដ៍ ៣​នាក់​, វិសាខា ៣​នាក់​, ព្រះខ័ន​រាជ​ស្វាយរៀង ៣​នាក់​, ភ្នំពេញ​ក្រោ​ន ៣​នាក់​, ព្រៃវែង ៤​នាក់​, អង្គ​រថា​យ​ហ្គឺ​រ ២​នាក់​, កងយោធពល​ខេមរភូមិន្ទ ១​នាក់​, អគ្គិសនី​កម្ពុជា ១​នាក់ និង​គីរីវង់​សុខ​សែន​ជ័យ ១​នាក់​។​

​កីឡាករ​ទាំង ២៦ នាក់​នេះ នឹង​ហ្វឹកហាត់ មុននឹង​ជម្រុះ​មក​ទុក នៅត្រឹម​ចំនួន ២០ នាក់​ចុងក្រោយ ដើម្បី​ចេញទៅ​ស៊ី​ហ្គេម នៅ​ប្រទេស​វៀតណាម​។​

​លោក ភា សុ​ភ័​ក្ត្រា គ្រូ​ជំនួយ​នៃ​ក្រុមបាល់ទាត់ ជម្រើសជាតិ​កម្ពុជា អាយុ​ក្រោម ២៣​ឆ្នាំ បាន​និយាយ​ឲ្យ​ដឹងថាៈ កីឡាករ​ទាំង ២៦ នាក់​នេះ នឹង​ចាប់ផ្ដើម​ហ្វឹកហាត់ ពីថ្ងៃ​ទី​២៦ ខែមេសា នេះ​តទៅ បន្ទាប់មក ទើប​ជម្រុះ​មក​នៅត្រឹម ២០ នាក់​ចុងក្រោយ នៅ​១​ថ្ងៃ មុន​ចាក​ចេញទៅ ប្រទេស​វៀតណាម ដែល​គ្រោង​នៅ​ចន្លោះ​ថ្ងៃទី​០៣ ឬ​ទី​០៤ ខែឧសភា ឆ្នាំ​២០២២​។​

​ក្រុមបាល់ទាត់​ជម្រើសជាតិ​កម្ពុជា អាយុ​ក្រោម ២៣​ឆ្នាំ នឹង​បើកឆាក​ប្រកួត នៅ​ថ្ងៃទី​៩ ខែឧសភា ដោយ​ត្រូវ​ជួប U-23 ឡាវ (​ម៉ោង ៤ រសៀល​) បន្ទាប់មក នៅ​ថ្ងៃទី​១១ ជួប U-23 សិង្ហ​បុរី (​ម៉ោង ៤ រសៀល​) បន្ទាប់មកទៀត នៅ​ថ្ងៃទី​១៤ ត្រូវ​ប៉ះ U-23 ថៃ (​ម៉ោង ៧ ល្ងាច​) និង​ប្រកួត​ចុងក្រោយ ជួប U-23 ម៉ាឡេស៊ី នៅ​ថ្ងៃទី​១៦ ខែឧសភា ឆ្នាំ​២០២២ (​ម៉ោង ៤ រសៀល​)៕/V​