ដោយៈ អង្គា​រ៍​ហេង / ភ្នំពេញៈ ចៅក្រម​ជំនុំជម្រះ សាលាដំបូង​រាជធានី​ភ្នំពេញ លោក សេង រិទ្ធី ប្រធាន​ក្រុមប្រឹក្សា និង​លោក សាយ ណូ​រ៉ា ជា​តំណាង​អយ្យការ នៅ​រសៀល ថ្ងៃទី​២៥ ខែមេសា ឆ្នាំ​២០២២ បានប្រកាស​សាលក្រម ផ្តន្ទាទោស​លើ​ជនជាប់ចោទ ជា​បុរស ជនជាតិ​រុស្ស៊ី ពីរ​នាក់ ដាក់គុក​ម្នាក់ ៣០ ឆ្នាំ និង​ស្ត្រី​ជនជាតិ​អ៊ុយ​ក្រែ​ន​ម្នាក់ ដាក់គុក ២៥ ឆ្នាំ រឿង​ផលិត ដឹកជញ្ជូន ជួញដូរ​គ្រឿងញៀន ជាង ២០ គីឡូក្រាម ។​

​ជនជាប់ចោទ ជា​បុរស​ជនជាតិ រុស្ស៊ី ពីរ​នាក់​នោះ ១.​ឈ្មោះ EVGENY KARAS អាយុ ៣២ ឆ្នាំ និង ២.​ឈ្មោះ DMITRIY KARAS អាយុ ៣០ ឆ្នាំ បាន​ត្រូវ​តុលាការ សម្រេច​ដាក់ពន្ធនាគារ ម្នាក់ៗ ៣០ ឆ្នាំ ពិន័យ​ជា​ប្រា​ក់បង់​ចូល​ថវិការដ្ឋ ម្នាក់ៗ ចំនួន ៦០ លាន​រៀល និង​ស្ត្រី​ជនជាតិ​អ៊ុយ​ក្រែ​ន​ម្នាក់ ឈ្មោះ BONDARBNKO KARYNA អាយុ ២១ ឆ្នាំ បាន​ត្រូវ​តុលាការ សម្រេច​ដាក់ពន្ធនាគារ ចំនួន ២៥ ឆ្នាំ ពិន័យ​ជា​ប្រាក់ ចំនួន ៤០ លាន​រៀល បង់​ចូល​ថវិការដ្ឋ ។​

​ជនជាប់ចោទ​ទាំងបី​នាក់ បាន​ត្រូវ​ចោទប្រកាន់ ពីបទ ផលិត ដឹកជញ្ជូន និង​ជួញដូរ​ដោយ ខុសច្បាប់ នូវ​សារធាតុ​ញៀន ប្រព្រឹត្ត​នៅ​រាជធានី​ភ្នំពេញ កាលពី​ឆ្នាំ​២០១៧ រហូតដល់ ថ្ងៃទី​១៥ ខែកញ្ញា ឆ្នាំ​២០២០ តាម​មាត្រា​៤៧ មាត្រា​៤២ និង​មាត្រា​៤៨ នៃ​ច្បាប់​ស្តីពី ការត្រួតពិនិត្យ​គ្រឿងញៀន​។​

​គួររំលឹកថា កាលពី​ថ្ងៃទី​២១ ខែកញ្ញា ឆ្នាំ​២០២០ កម្លាំង​នគរបាល​សន្តិសុខ​ផ្ទៃក្នុង ក្រសួងមហាផ្ទៃ បាន​ចុះបង្ក្រាប​ករណី ផលិត ដឹកជញ្ជូន ជួញដូរ​ដោយ​ខុសច្បាប់ នូវ​សារធាតុ​ញៀន ទ្រង់ទ្រាយ​ធំ នៅ​ទីតាំង​សង្កាត់​ចោមចៅ​២ ខណ្ឌ​ពោធិ៍​សែន​ជ័យ រាជធានី​ភ្នំពេញ (​កញ្ចប់​បញ្ញើ មាន​លាក់​បង្កប់​សារធាតុ​ញៀន ផ្ញើ​ចេញពី​ក្រុមហ៊ុន ឌី​អេ​ច​អិ​ល កម្ពុជា ទៅ​ប្រទេស​អង់គ្លេស និង ក្រិច​៕/V​