ដោយៈ គ្រី សម្បត្តិ / ពោធិ៍សាត់ៈ លោក សូ ខន​ឬ​ទ្ធិ​គុណ រដ្ឋលេខាធិការ ក្រសួងបរិស្ថាន បាន​អំពាវនាវ​ឱ្យ​អាជ្ញាធរ​មូលដ្ឋាន​ពាក់ព័ន្ធ និង​ប្រជា​សហគមន៍ រួមគ្នា​ថែរក្សា​ព្រៃឈើ ដែល​ដាំ​ស្តារឡើងវិញ ក្នុង​តំបន់​ព្រៃ​លិច​ទឹក ក្នុង​តំបន់​៣ នៃ​តំបន់​បឹង​ទន្លេសាប ដើម្បី​ជា​ប្រយោជន៍ ទៅ​ថ្ងៃ​អនាគត ។​

​ការលើកឡើង​បែបនេះ ក្នុង​ឱកាសលោក បាន​អញ្ជើញ​ជា​អធិបតី ក្នុង​ពិធី​ដាំ ស្តារឡើងវិញ នូវ​ព្រៃ​លិច​ទឹក ក្នុង​តំបន់​៣ តំបន់​បឹង​ទន្លេសាប ស្ថិត​ក្នុងភូមិ ត្រពាំង​រំដេញ ឃុំ​ក្បាល​ត្រាច ស្រុក​ក្រគរ ខេត្តពោធិ៍សាត់ ដោយមាន​ការ ចូលរួម​ពី ថ្នាក់ដឹកនាំ​ក្រសួង តំណាង​គណៈ អភិបាល ខេត្តកំពង់ឆ្នាំង មន្ទីរ​ពាក់ព័ន្ធ កងកម្លាំងប្រដាប់អាវុធ​គ្រប់​ប្រភេទ អាជ្ញាធរ​មូលដ្ឋាន ប្រជា​ពលរ​ដ្ធ និង​សិស្សានុសិស្ស ជាច្រើន​នាក់ នា​ព្រឹក​ថ្ងៃទី​២៦ ខែមេសា ឆ្នាំ​២០២២ ។​

​លោក សូ ខន​ឬ​ទ្ធិ​គុណ បាន​គូសបញ្ជាក់ថាៈ ការដាំ​ស្តារឡើងវិញ ដើមឈើ ក្នុង​តំបន់​ព្រៃ លិច​ទឹក ក្នុង​តំបន់​៣ នៃ​តំបន់​បឹង​ទន្លេសាប គឺជា​ការ​បំផុសគំនិត ប្រជា​ពលរ​ដ្ធ គ្រប់រូប ប​ញ្ឍ​ប់​ការកាប់​ទន្ទ្រាន​ដី ដោយ​ខុសច្បាប់ ចូលរួម​ថែ រក្សា​ព្រៃឈើ ឱ្យបាន​គង់វង្ស ដែលជា​ប្រយោជន៍ ដល់​ក្មេងៗ​ជំនាន់​ក្រោយ ទប់ស្កាត់​ការ​បម្រែបម្រួល​អាកាសធាតុ រក្សាបាន​នូវ​សម្បត្តិ​ធនធានធម្មជាតិ ពិសេស​ផ្តល់​ជា​ជម្រក​ដល់​ជីវៈចម្រុះ​គ្រប់​ប្រភេទ ។​

​ជាមួយគ្នានេះ លោក ចេង ឡៃ អភិបាលរង នៃ​គណៈ​អភិបាល ខេត្តពោធិ៍សាត់ បានឱ្យដឹងថាៈ ស្របតាម​យុទ្ធសាស្ត្រ​របស់ រាជរដ្ឋាភិបាល​កម្ពុជា រដ្ឋបាល ខេត្តពោធិ៍សាត់ បាន​ចូលរួម​ការពារ និង​អភិរក្ស​ព្រៃ​លិច​ទឹក​តំបន់​៣ ក្នុងភូមិ​សាស្ត្រ​ខេត្តពោធិ៍សាត់ ដើម្បី​ធ្វើឱ្យមាន​ជីវៈចម្រុះ សម្បូរបែប លើកស្ទួយ​ជីវភាព​សហគមន៍​ឲ្យ​រុងរឿង និង​ចូលរួម​អភិវឌ្ឍន៍ សេដ្ឋកិច្ចជាតិ ។​

​សូមបញ្ជាក់ថា ការដាំ​ស្តារឡើងវិញ នូវ​ព្រៃ​លិច​ទឹក ក្នុង​តំបន់​៣ តំបន់​បឹង ទន្លេសាប ស្ថិត​ក្នុងភូមិ​ត្រពាំង​រំដេញ ឃុំ​ក្បាល​ត្រាច ស្រុក​ក្រគរ ខេត្តពោធិ៍សាត់ នា​ថ្ងៃនេះ បានរៀបចំ​ឡើង លើ​ផ្ទៃដី ៥០ ហិកតា និង​បាន​ដាំ​កូនឈើ ចំនួន ២ ម៉ឺន​ដើម រួមមានៈ រាំង​ទឹក​ចំនួន ១២.០០០ ដើម សណ្តាន់ ចំនួន ៤.០០០ ដើម ម្តេ​ញ ៣.៥០០ ដើម និង​ឫស្សី​ចំនួន ៥០០ ដើម ៕/V​-PC