ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ចៅក្រម​ញូវយ៉ក​ម្នាក់​កាលពី​ថ្ងៃ​ចន្ទ ទី​២៥ មេសា​បាន​ចោទ​អតីត​ប្រធានាធិបតី​ដូណាល់ ត្រាំ​ថា​មើលងាយ​តុលាការ​ចំពោះ​ការ​មិន​ព្រម​បង្ហាញ​ឯកសារ​នៅក្នុង​​ការស៊ើបអង្កេត​រដ្ឋប្បវេណី​របស់​រដ្ឋអាជ្ញា​នៃ​រដ្ឋ​ញូវយ៉ក​អំពី​ការប្រតិបត្តិ​អាជីវកម្ម​របស់​គាត់ ហើយ​បាន​បង្គាប់​ឱ្យ​ផាកពិន័យ​ត្រាំ​ជា​ប្រាក់​ចំនួន ១០.០០០ ដុល្លារ​ក្នុង​មួយ​ថ្ងៃ​រហូត​ដល់​គាត់​ធ្វើតាម​បង្គាប់​។​

​លោក​ត្រាំ​បាន​បាត់បង់​ការប្រឹងប្រែង​ដើម្បី​ទាត់ចោល​ដីកា​ពី​អគ្គ​រដ្ឋអាជ្ញា ឡេ​ទីធ្យា ជែម​ស៍ (Letitia James) ហើយ​បន្ទាប់មក​បាន​ខកខាន​ក្នុង​ការបង្ហាញ​ឯកសារ​ទាំងអស់​តាម​កាលបរិច្ឆេទ​​កំណត់​ដោយ​តុលាការ​នៅ​ថ្ងៃទី ០៣ ខែ​មីនា ដែល​ក្រោយមក​បាន​ពន្យារ​ពេល​ដល់​ថ្ងៃទី ៣១ ខែ​មីនា តាម​សំណើ​របស់​មេធាវី​របស់​គាត់​។​

​ចៅក្រម អា​ធឺ អេន​ហ្គោ​រ៉ុន (Arthur Engoron) បាន​សម្រេច​ថា ការ​រក​ឃើញ​អំពី​ការ​មើលងាយ​តុលាការ​គឺ​សមរម្យ​ដោយសារ​តែ​អ្វី​ដែល​ចៅក្រម​ហៅថា “​ខកខាន​ម្តង​ហើយ​ម្តងទៀត​”​ក្នុង​ការប្រគល់​​ឯកសារ​ហើយ​ដោយសារ​តែ​មិន​មាន​ភាពច្បាស់លាស់​ថា​តើ​ត្រាំ​ស្វះស្វែង​រក​ឯកសារ​ឆ្លើយតប​ពេញលេញ​ឬ​អត់​។​

​ចៅក្រម​បាន​និយាយថា “​លោក​ត្រាំ​…​ខ្ញុំ​ដឹង​ថា​លោក​យកចិត្តទុកដាក់​ខ្លាំង​លើ​អាជីវកម្ម​របស់​លោក ហើយ​ខ្ញុំ​ក៏​យកចិត្តទុកដាក់​ខ្លាំង​លើ​កិច្ចការ​របស់​ខ្ញុំ​ដែរ​។​ខ្ញុំ​ចោទ​លោក​ពី​បទ​មើលងាយ​តុលាការ​​រដ្ឋប្បវេណី​” ទោះបីជា​ត្រាំ​ខ្លួនឯង​មិន​បាន​ស្ថិតនៅក្នុង​បន្ទប់​សវនាការ​ក៏ដោយ​។​

​មេធាវី​របស់​គាត់ គឺ​លោកស្រី អា​លី​ណា ហាប​បា (Alina Habba) បាន​និយាយថា ត្រាំ​មានបំណង​ប្តឹង​ឧទ្ធរណ៍​ចំពោះ​សេចក្តីសម្រេច​អំពី​ការ​មើលងាយ​តុលាការ​។ ​លោកស្រី​ហាប​បា​បាន​និយាយ​នៅក្នុង​សេចក្តីថ្លែងការណ៍​មួយ​ថា “​យើង​មិន​យល់​ស្រប​ចំពោះ​ការសម្រេចចិត្ត​របស់​តុលាការ​ទេ​”​។​

​ប្រសិនបើ​ត្រាំ​ខកខាន​មិន​បាន​បង់​ប្រាក់​ពិន័យ គាត់​អាច​ជាប់គុក នេះ​បើ​យោង​តាម​លោក​ស្រី សា​រ៉ា គ្រី​សសូ​ហ្វ (Sarah Krissoff) ជា​មេធាវី​នៅ​ញូវយ៉ក ដែល​មិន​ពាក់ព័ន្ធ​នឹង​ករណី​នេះ​ប៉ុន្តែ​​លោក​ស្រី​និយាយថា សេណា​រី​យ៉ូ​បែប​នេះ​មិន​ទំនង​កើត​ឡើង​ទេ ហើយ​ចៅក្រម​អាច​ជ្រើសរើស​មធ្យោបាយ​ដោះស្រាយ​ផ្សេងទៀត ដូច​ជា​ការ​បង្កើន​ចំនួន​ប្រាក់​ផាកពិន័យ​៕

ត្រាំ​នឹងត្រូវ​ផាក​មួយថ្ងៃ​១​ម៉ឺន​ដុល្លា​របើ​មិន​ព្រម​ដាក់​ឯកសារ​ទៅ​អ្នក​ស៊ើបអង្កេត