ដោយៈ​បូកគោ​/​កំពត​:​ប្រជាពលរដ្ឋ​ក្នុង​ខេត្តកំពត​បាន​អបអរសាទរ​និង​សម្តែង​ក្តីសប្បាយ​រីករាយ​ក្រោយពី​សម្តេច​ប្រមុខ​រាជ រដ្ឋាភិបាល​សម្រេច​ដក​កាតព្វកិច្ច​ពាក់​ម៉ាស​ទូទាំងប្រទេស​ដោយ​ផ្អែកលើ​ស្ថានភាព​កូ​វីដ​-១៩​ហាក់​សាបរលាប​ទៅវិញ​។ នេះ​ជា​លទ្ធផល​ដ៏​គាប់ប្រសើរ​ដែល​ផ្តើមចេញពី​ការទទួល​វ៉ាក់សាំង​ដោយ​ឥតគិតថ្លៃ​គ្រប់ៗ​គ្នា​ចាប់តាំងពី​ដូ​ស​ដំបូង​។​

​លោក សៅ ភា​រី អ្នកបើក​ត្រីចក្រយានយន្ត​ដឹក​ភ្ញៀវ​ក្នុង​ក្រុង​កំពត​បាន​រៀបរាប់ថា​លោក​សូម​ចូលរួម​អបអរសាទរ​ជូន​ចំពោះ សម្តេច​តេ​ជោ​ដែល​បានសម្រេច​លុបចោល​កាត​ព្វ​កិច្ច​ពាក់​ម៉ាស​នៅ​ទីសាធារណ​:​ទូទាំង​កម្ពុជា​។​ទាំងនេះ​ក៏​ព្រោះតែ​ការឆ្លង​រាលដាល​ជំងឺ​កូ​វីដ​១៩​បាន​ថមថយ​ស្ទើរ​ទាំងស្រុង​បន្ទាប់ពី​ពលរដ្ឋ​គ្រប់រូប​បាន​ចាក់​វ៉ាក់សាំង​ដោយ​ភាគច្រើន​រហូតដល់​ដូ​ស​ទី​៤​នោះ​។ បុរស​ដដែល​បាន​បន្តថា កន្លងមក​ភ្ញៀវ​ខ្លះ​បាន​រអ៊ូរទាំ​ពី​ភាព​រំខាន​ច្លះ​ដោយ​ការពាក់​ម៉ាស ដូចជា​ថប់ៗ​ដង្ហើម និយាយ​ស្តាប់​គ្នា​មិនសូវ​បាន ខំ​ញញឹម​ដាក់​គេ​តែ​សាមីខ្លួន​មិនបាន​ដឹង​ជាដើម​។ កាលណោះ​ដាច់ខាត​ត្រូវតែ​ពាក់​ព្រោះ​ជា​កាតព្វកិច្ច​ក្នុងការ​បង្ការ​ឆ្លង​មេរោគ​កូ​វីដ​រវាង​ខ្លួន និង​អ្នកដទៃ​។​
នារី​លក់​ម៉ាស​ត្រង់ចំណុច​គល់ស្ពាន​ឥន្ទធនូ​ត្រើយ​ខាងកើត​ក្នុង​ក្រុង​កំពត​បាន​បញ្ចេញ​អំពី​អារម្មណ៍​ផ្ទាល់ខ្លួន​ថា​កាល​អំឡុងពេល​កូ​វីដ​-១៩​ឆ្លង​រាលដាល​ខ្លាំង ការលក់​ម៉ាស​ដាច់​មែនទែន​រហូត​ថ្ងៃ​ខ្លះ​បញ្ជា​ទិញ​ស្ទើរ​មិនទាន់​ពេល​។ ប៉ុន្តែ​ប៉ុន្មាន​ខែ​ចុង​ក្រោយនេះ ទាំង​ម៉ាស ទាំង​អាល់កុល ជែ​ល​មិនសូវមាន​អ្នក​មក​សួរ​ទិញ​ទេ​។​

ពាក់ព័ន្ធ​នឹង​ការប្រកាស​របស់​សម្តេច​នាយករដ្ឋមន្ត្រី អ្នកលក់​ដដែល​បាន​រៀបរាប់ថា អ្នកនាង​សូម​គាំទ្រ​ចំពោះ​ការលុបចោល​កាតព្វកិច្ច​ពាក់​ម៉ាស​ដោយ​ផ្អែកលើ​ភាព​ធូរស្រាល​នៃ​វិបត្តិ​កូ​វីដ​-១៩​នេះ​។ ចំពោះ​អ្នក​ដែល​ធ្លាប់​ពាក់​រហូត​សម្រប​ខ្លួន​បាន​នោះ​ពួកគាត់​អាច​នឹង​បន្ត​ប្រើប្រាស់​ព្រោះ​ការពាក់​ម៉ាស​មិនមែន​សម្រាប់តែ​ការពារ​ជំងឺ​កូ​វីដ​-១៩​ទេ​។ សម្រាប់​អ្នកលក់​ម្ហូបអាហារ​នំចំណី ការពាក់​ម៉ាស់​បានបង្ហាញ​ពី​ភាព​អនាម័យ​សម្រាប់​ទំនិញរ​បស់​ខ្លួន​ដើម្បីឱ្យ​ភ្ញៀវ​បរិភោគ​ដោយ​ចិត​ហ​ត​ជ្រះស្រឡះ​។ ការពាក់​ម៉ាស់​ពេលធ្វើ​ដំណើរ​តាម​កង់ ម៉ូតូ​នឹង​អាច​បញ្ចៀស​បាន​ពី​ធូលី​ដី​ហុយ​ចូល​មាត់ និង​ការពារ​សម្រស់​ផ្ទៃមុខ​ផងដែរ​។ ដូច្នេះ អ្នកនាង​ជឿជាក់ថា​ការលក់​ម៉ាស់​នឹង​នៅតែ​អាច​ដំណើរការបាន​ដដែល​ទោះ​ជំងឺ​កូ​វីដ​-១៩​ផុតរលត់​ទៅវិញ​ក៏ដោយ​។

បញ្ជាក់​ឱ្យដឹង​កាលពី​ព្រឹក​ថ្ងៃទី​២៦ ខែមេសា ឆ្នាំ​២០២២ លោក​វេជ្ជបណ្ឌិត​ហេង ចាន់ថា ប្រធានការិយាល័យ​បច្ចេកទេស​មន្ទីរ​សុខាភិបាល​នៃ​រដ្ឋបាល​ខេត្តកំពត​បា​ន​ប្រាប់​ឱ្យដឹងថា បច្ចុប្បន្ន​ស្ថានភាព​កូ​វីដ​-១៩​ក្នុង​ខេត្តកំពត​មាន​លក្ខណ​:​ល្អប្រសើរ​។ អំឡុងពេល​មួយ​សប្តាហ៍​ចុងក្រោយ​នេះ ទូទាំង​ខេត្ត​មិនមាន​ករណី​វិជ្ជមាន​ជំងឺ​កូ​វីដ​-១៩​កើតឡើង​ទេ​៕​សរន​