​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ គិត​ត្រឹម​ខែ​កុម្ភៈ​ឆ្នាំ​នេះ ៥៨ ភាគរយ​នៃ​ចំនួន​ប្រជាជន​អាម៉េរិក ឬ​ជាង ១៩០ លាន​នាក់​បាន​ឆ្លងកូវី​ដ នេះ​បើ​យោង​តាម​ការ​ស្ទង់​មើល​អង្គ​បដិ​ប្រាណ​​ដែល​ធ្វើឡើង​ដោយ​មជ្ឈមណ្ឌល​គ្រប់គ្រង​និង​បង្ការ​ជំងឺ (CDC)​ហើយ​ដែល​បាន​ចេញផ្សាយ​កាលពី​ថ្ងៃ​អង្គារ​ទី​២៦​មេសា​។​

​តួលេខ​នេះ​គឺ​ខ្ពស់ជាង ៨០ លាន​ករណី​ដែល​ត្រូវបាន​កត់ត្រា​ជា​ផ្លូវការ ដោយ​ភាគច្រើន​នៃ​ការឆ្លង​មេរោគ​នេះ​មិន​ត្រូវបាន​ធ្វើ​រោគ​វិនិច្ឆ័យ គ្មាន​រោគសញ្ញា ឬ​មិន​មាន​ការរាយការណ៍​។​

​ប្រហែល ៧៥ ភាគរយ​នៃ​មនុស្ស​អាយុ​ក្រោម ១៨ ឆ្នាំ​បាន​ឆ្លង​មេរោគ​កូរ៉ូណា នេះ​បើ​យោង​តាម​ឯកសារ​ដែល​ផ្អែក​លើ​ការសិក្សា​តំណាង​ថ្នាក់ជាតិ​អំពី​កម្រិត​អង្គ​បដិ​ប្រាណ​។​

​វា​មាន​ការឆ្លង​កើនឡើង​យ៉ាង​ខ្លាំង​ក្នុងអំឡុងពេល​រលក​អូ​មី​ក្រុង​កាល​ពី​រដូវរងា​ឆ្នាំមុន ជាពិសេស​ក្នុងចំណោម​កុមារ​។​

​រៀងរាល់​ខែ​ចាប់ពី​ខែ​កញ្ញា ឆ្នាំ ២០២១ ដល់​ខែ​មករា ឆ្នាំ ២០២២ ការសិក្សា​នេះ​បាន​ពិនិត្យ​សំណាក​ឈាម​ចំនួន ៧៥.០០០ នៅ​ទូទាំង​ប្រទេស ក៏ដូចជា​សំណាក​ចំនួន ៤៥.០០០ នៅ​ខែ​កុម្ភៈ​។​

​ការសិក្សា​នេះ​បាន​ពិនិត្យ​តែ​អង្គ​បដិ​ប្រាណ​ដែល​បង្កើតឡើង​ក្នុង​ការឆ្លើយតប​មុនពេល​ឆ្លងកូវី​ដ មិនមែន​អំឡុងពេល​ចាក់​វ៉ាក់សាំង​នោះទេ​។​

​បន្ទាប់​មក​ការប៉ាន់ប្រមាណ​ថ្នាក់ជាតិ​ត្រូវ​បាន​ផលិត​ឡើង​ដោយ​ប្រើ​វិធីសាស្ត្រ​ស្ថិតិ​ដើម្បី​ថ្លឹងថ្លែង​តាម​អាយុ ភេទ និង​ស្ថានភាព​ទីក្រុង​។​

​លោកស្រី គ្រីស្ទី ក្លា​ក (Kristie Clarke) សហប្រធាន​សម្រាប់​ក្រុម​កិច្ចការ​សេរ​វិទ្យាកូ​វីដ​១៩​ថ្នាក់ជាតិ បាន​និយាយថា “​ការ​មាន​អង្គ​បដិ​ប្រាណ​ដែល​បង្កឡើង​ដោយការ​ឆ្លង​មេរោគ​មិន​មាន​ន័យ​ថា​អ្នក​ត្រូវបាន​ការពារ​ប្រឆាំងនឹង​ការឆ្លង​មេរោគ​នេះ​នាពេល​អនាគត​នោះ​ទេ​”​។​

​លោកស្រី​បាន​បន្ថែមថា “​ការឆ្លង​មេរោគ​ពី​មុន​ត្រូវ​បាន​បង្ហាញថា​ផ្តល់នូវ​ការការពារ​ប្រឆាំង​នឹង​ការឈឺ​ធ្ងន់ធ្ងរ​និង​ការ​សម្រាក​នៅ​មន្ទីរពេទ្យ ហើយ​ការចាក់​ថ្នាំ​បង្ការ​មិន​ថា​មុន​ឬ​ក្រោយ​ពេល​ឆ្លង ផ្តល់​ការការពារ​បន្ថែម​”៕

គិត​ត្រឹម​ខែ​កុម្ភៈ​ឆ្នាំ​នេះ ៥៨ ភាគរយ​នៃ​ចំនួន​ប្រជាជន​អាម៉េរិក ឬ​ជាង ១៩០ លាន​នាក់​បាន​ឆ្លងកូវី​ដ