​ប្រែ​សម្រួលៈ​បំណង​(​ដេល្លី​ម៉េល​)៖ តុលាការ​មួយ​នៅក្នុង​ប្រទេស​មី​យ៉ាន់​ម៉ា​ដែល​គ្រប់គ្រង​ដោយ​យោធា កាលពី​ថ្ងៃ​ពុធ​ទី​២៧​មេសា​បាន​សំរេច​ដាក់ទោស​អតីត​មេដឹកនាំ​រដ្ឋាភិបាល​ស៊ីវិល លោកស្រី អ៊ុង​សាន ស៊ូ​ជី អោយ​ជាប់គុក​ប្រាំ​ឆ្នាំ​ចំពោះ​ការប្រព្រឹត្ត​អំពើពុករលួយ​។​

​ស៊ូ​ជី ដែល​ត្រូវបាន​ទម្លាក់​ចេញពី​តំណែង​និង​ជាប់​ឃុំ​ចាប់​ក្រោយ​រដ្ឋប្រហារ​យោធា​កាលពី​ខែ​កុម្ភៈ​ឆ្នាំមុន បាន​បដិសេធ​ការចោទប្រកាន់​ដែល​ថា​លោកស្រី​បាន​ទទួល​សំណូក​ជា​មាស​និង​ប្រាក់​រាប់សែន​ដុល្លារ​ពី​សហការី​នយោបាយ​ម្នាក់​។​

​ទោស​អតិបរមា​ចំពោះ​បទល្មើស​ដូច្នេះ ត្រូវ​ជាប់គុក​១៥​ឆ្នាំ​និង​ពិន័យ​ប្រាក់​។​

​អ្នកគាំទ្រ​លោក​ស្រី រួម​ទាំង​អ្នកជំនាញការ​ច្បាប់​ឯករាជ្យ​បាន​ថ្កោលទោស​ការកាត់ទោស​នេះ​ថា មិន​ត្រឹមត្រូវ​និង​ត្រូវបាន​រៀបចំឡើង​ដើម្បី​ដក​ស្ត្រី​វ័យ​៧៦​ឆ្នាំ​រូប​នេះ​ចេញពី​នយោបាយ​។​តាមពិត​ស៊ូ​ជី ត្រូវបាន​កាត់ទោស​ដាក់​គុក​ប្រាំមួយ​ឆ្នាំ​ម្តង​មក​ហើយ​ចំពោះ​ករណី​ចោទប្រកាន់​ផ្សេង​។​

​ព័ត៌មាន​អំពី​ការកាត់ទោស​នេះ​ចេញមក​ពី​មន្ត្រី​ច្បាប់​ម្នាក់​ដែល​សុំ​មិន​បញ្ចេញ​អត្តសញ្ញាណ​ដោយសារ​លោក​មិន​បាន​ការអនុញ្ញាត​អោយ​ទម្លាយ​ព័ត៌មាន​ដូច្នេះ​។​សវនាការ​លើ​ស៊ូ​ជី​ត្រូវបាន​ធ្វើឡើង​នៅ​ទីក្រុង​ណៃ​ពីដោរ​ដោយ​មិន​អនុញ្ញា​ត​អោយ​សាធារណជន​ឬ​អ្នកកាសែត​ចូល​ស្តាប់​ទេ​។​

​លោកស្រី​ត្រូវបាន​កាត់ទោស​អោយ​ជាប់គុក​៦​ឆ្នាំ​រួចជាស្រេច​ហើយ​ចំពោះ​ការចោទប្រកាន់​ផ្សេង រួម​មាន​ការ​ញុះញុង រំលោភ​ច្បាប់​កូវី​ដ​១៩ និង​នាំចូល​វិទ្យុទាក់ទង​ខុសច្បាប់ ជា​ការចោទប្រកាន់​ដែល​ពួក​​អ្នកសង្កេតការ​និយាយ​ថា​ត្រូវបាន​រៀបចំឡើង​ដើម្បី​អោយ​អ្នកនយោបាយ​ជើងចាស់​រូប​នេះ​ចេញពី​ឆាកនយោបាយ​៕

​តាមពិត​ស៊ូ​ជី​រង​ការចោទប្រកាន់​សរុប​១០​ករណី និង​ប្រឈម​ការជាប់គុក​១៥០​ឆ្នាំ​បើ​ត្រូវ​កាត់ទោស​គ្រប់​ករណី​ដោយ​គ្មាន​ការ​អត់​ឳ​ន​