​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រុមហ៊ុន​ផលិត​ដ្រូ​ន​ខ្នាត​យក្ស​របស់​ចិន DJI Technology Co បាន​និយាយថា​ខ្លួន​នឹង​ផ្អាក​អាជីវកម្ម​ជា​បណ្ដោះអាសន្ន​នៅក្នុង​ប្រទេស​រុស្ស៊ី​និង​អ៊ុ​យក្រែន​​ដើម្បី​ធានា​ថា ផលិតផល​របស់​ខ្លួន​មិន​ត្រូវបាន​ប្រើប្រាស់​ក្នុង​ការប្រយុទ្ធ​ដែល​ធ្វើឱ្យ​វា​ក្លាយ​ជា​ក្រុមហ៊ុន​ចិន​ដ៏​ធំ​ដំបូង​គេ​បញ្ឈប់​ការលក់​ទៅកាន់​រុស្ស៊ី​ចាប់តាំងពី​ទីក្រុង​មូ​ស្គូ​បាន​ឈ្លានពាន​អ៊ុ​យក្រែន​​ក្នុង​ខែកុម្ភៈ​។​

​ក្រុមហ៊ុន​ឯកជន​នេះ​បាន​និយាយ​នៅក្នុង​សេចក្តីថ្លែងការណ៍​មួយ​កាលពី​ល្ងាច​ថ្ងៃ​អង្គារ ទី​២៦ មេសា​ថា “DJI​កំពុង​វាយ​តម្លៃ​ផ្ទៃក្នុង​ឡើងវិញ​នូវ​តម្រូវការ​អនុលោម​តាម​ច្បាប់​នៅក្នុង​យុត្តាធិការ​ផ្សេងៗ​។ ដោយ​រង់ចាំ​ការត្រួតពិនិត្យ​បច្ចុប្បន្ន DJI នឹង​ផ្អាក​សកម្មភាព​អាជីវកម្ម​ទាំងអស់​នៅក្នុង​ប្រទេស​រុស្ស៊ី​និង​អ៊ុយ​ក្រែនជា​បណ្តោះអាសន្ន​”​។​

​ទោះបីជា​ក្រុមហ៊ុន​លោក​ខាងលិច​បាន​ដកខ្លួន​ចេញពី​ប្រទេស​រុស្ស៊ី​ក្នុង​ការតវ៉ា​ក៏ដោយ​ក៏​ក្រុមហ៊ុន​ចិន​ជាច្រើន​នៅ​តែ​ស្នាក់​នៅ​ទីនោះ​ដោយ​ប្រកាន់យក​ជំហរ​របស់​ទីក្រុង​ប៉េកាំង​ក្នុង​ការបដិសេធ​រិះគន់​​ទីក្រុង​មូ​ស្គូ​ជុំវិញ​ការឈ្លានពាន​នេះ​។​

​កាលពី​ថ្ងៃ​ពុធ អ្នកនាំពាក្យ​របស់ DJI បាន​ប្រាប់​ទីភ្នាក់ងារ​សារព័ត៌មាន​រ៉​យ​ទ័​រថា ការផ្អាក​អាជីវកម្ម​នៅក្នុង​ប្រទេស​រុស្ស៊ី​និង​អ៊ុយ​ក្រែន​គឺ “​មិនមែន​ដើម្បី​ធ្វើ​សេចក្តីថ្លែងការណ៍​អំពី​ប្រទេស​ណាមួយ​នោះទេ ប៉ុន្តែ​ដើម្បី​ធ្វើ​សេចក្តីថ្លែងការណ៍​អំពី​គោលការណ៍​របស់​យើង​”​។​

“DJI ស្អប់ខ្ពើម​ការប្រើប្រាស់​ដ្រូ​ន​របស់​យើង​ដើម្បី​បង្ក​គ្រោះថ្នាក់ ហើយ​យើង​នឹង​ផ្អាក​ការលក់​ជា​បណ្តោះអាសន្ន​នៅក្នុង​ប្រទេស​ទាំងនេះ​ដើម្បី​ជួយ​ធានាថា​គ្មាន​នរណា​ម្នាក់​ប្រើប្រាស់​ដ្រូ​ន​របស់​យើង​​ក្នុង​ការប្រយុទ្ធ​”​។​

​មន្ត្រី​និង​ពលរដ្ឋ​អ៊ុយ​ក្រែន​បានចោទប្រកាន់​ក្រុមហ៊ុ​ន DJI ដែលជា​ក្រុមហ៊ុន​ផលិត​ដ្រូ​ន​ប្រើប្រាស់​និង​ដ្រូ​ន​ឧស្សាហកម្ម​ធំ​ជាង​គេ​លើ​ពិភពលោក ថា​បាន​ទម្លាយ​ទិន្នន័យ​ស្តី​ពី​យោធា​អ៊ុយ​ក្រែន​ទៅកាន់​រុស្ស៊ី​។​

​កាលពី​ខែ​មុន DJI​បាន​ច្រានចោល​ការចោទប្រកាន់​ទាំងនោះ​ថា “​មិន​ពិត​សុទ្ធសាធ​”​។ ក្រុមហ៊ុន​លក់រាយ​មួយ​របស់​អាល្លឺម៉ង់​បាន​ទាញ​យក​ហេតុផល​នេះ​ដើម្បី​ដកចេញ​ផលិតផល DJI​ចេញ​ពី​ធ្នើ​របស់​​ខ្លួន​៕

​មន្ត្រី​និង​ពលរដ្ឋ​អ៊ុយ​ក្រែន​បានចោទប្រកាន់​ក្រុមហ៊ុ​ន DJI ថា​បាន​ទម្លាយ​ទិន្នន័យ​ស្តី​ពី​យោធា​អ៊ុយ​ក្រែន​ទៅកាន់​រុស្ស៊ី​