​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ប្រទេស​ចិន​គ្រោង​នឹង​បង្កើត​ប្រព័ន្ធ​សម្រាប់​តាមដាន​អាចម៍ផ្កាយ​ដែល​បង្ក​ការគំរាមកំហែង​ដល់​ផែនដី​ដោយ​បង្ហាញ​ពី​មហិច្ឆតា​កំពុង​កើនឡើង​​របស់​ប្រទេស​នេះ​សម្រាប់​កម្មវិធី​អវកាស​របស់ខ្លួន​។​

​លោក វូ យ៉ាន​ហួ (Wu Yanhua) នាយករង​រដ្ឋបាល​អ​វ​កាស​ចិន បាន​ប្រាប់​ទូរទស្សន៍​មួយ​ថា ប្រទេស​ចិន​ក៏​នឹង​រិះរក​មធ្យោបាយ​ដើម្បី​កម្ចាត់​អាចម៍ផ្កាយ​ដែល​បង្ក​គ្រោះថ្នាក់​ដល់​ភពផែនដី​ផងដែរ នេះ​​បើ​យោង​តាម​ការចុះផ្សាយ​របស់​ទីភ្នាក់ងារ​សារព័ត៌មាន​ស៊ីនហួ​។​

​លោក​វូ​បាន​បន្ថែមថា ដើម្បី​សាកល្បង​ប្រព័ន្ធ​នេះ ចិន​មាន​បំណង​បញ្ជូន​យានអវកាស​ឆ្ពោះទៅ​រក​អាចម៍ផ្កាយ​នៅ​ឆ្នាំ ២០២៥ ឬ ២០២៦ ដើម្បី​សិក្សា​វា ហើយ​បន្ទាប់​មក​បង្វែរ​ទិសដៅ​របស់​វា ដោយ​មិន​ផ្តល់​ព័ត៌មាន​លម្អិត​អំពី​របៀប​ដែល​ប្រព័ន្ធ​នេះ​នឹង​ដំណើរការ​នោះ​ទេ​។​

​ប្រទេស​អាស៊ី​នេះ​បាន​ជំរុញ​ទៅ​មុខ​ជាមួយ​នឹង​ផែនការ​ជាច្រើន​សម្រាប់​កម្មវិធី​អវកាស​របស់​ខ្លួន​ក្នុង​ប៉ុន្មាន​ឆ្នាំ​ថ្មីៗ​នេះ​។ កាលពី​ខែ​មករា លោក​វូ​បាន​និយាយថា​ទីក្រុង​ប៉េកាំង​បាន​ចុះហត្ថលេខា​​លើ​កិច្ចព្រមព្រៀង​ជាមួយ​រុស្ស៊ី​ដើម្បី​សាងសង់​មូលដ្ឋាន​នៅ​លើ​ឋាន​ព្រះ​ចន្ទ ហើយ​កាលពី​ឆ្នាំមុន​យាន​បេសកកម្ម​ឋាន​ព្រះ​ចន្ទ​របស់​ចិន​បាន​វិលត្រឡប់​មក​ផែនដី​វិញ​ជាមួយ​នឹង​សំណាក​ព្រះ​ចន្ទ​។​

​សេចក្តីប្រាថ្នា​របស់​ចិន​សម្រាប់​កម្មវិធី​អវកាស​របស់ខ្លួន​បាន​បង្កើន​ភាព​តានតឹង​ជាមួយ​សហរដ្ឋ​អាម៉េរិក​។ ភាគី​ទាំងពីរ​បាន​ឈ្លោះប្រកែក​គ្នា​ជុំវិញ​ផ្កាយរណប SpaceX​ដែល​ទីក្រុង​ប៉េកាំង​និយាយថា​ចូល​​មក​ជិត​ស្ថានីយ​អវកាស​របស់ខ្លួន​យ៉ាង​គ្រោះថ្នាក់ ហើយ​កាលពី​ដើមខែ​នេះ មន្ទីរ​បញ្ច​កោណ​បាន​និយាយថា ចិន​និង​រុស្ស៊ី​បន្ត​ដាក់ពង្រាយ​អាវុធ​ដែល​អាច​វាយប្រហារ​ផ្កាយរណប​របស់​អាម៉េរិក​។​

​រដ្ឋបាល​អាកាសចរណ៍​និង​អវកាស​ជាតិ (​ណា​សា​) តែងតែ​ឃ្លាំមើល​លំហ​សម្រាប់​អាចម៍ផ្កាយ​ដែល​អាច​នឹង​បុក​ជាមួយ​ផែនដី​។ ប្រព័ន្ធ​ប្រកាសអាសន្ន​ចុងក្រោយ​នៃ​ផលប៉ះពាល់​អាចម៍ផ្កាយ ដែល​ប្រើ​តេ​ឡេ​ស្កូប​នៅ​រដ្ឋហា​វ៉ៃ ឈី​លី និង​អាហ្វ្រិក​ខាងត្បូង ត្រូវ​បាន​ធ្វើឱ្យ​ប្រសើរឡើង​កាលពីដើមឆ្នាំ​នេះ ដូច្នេះ​វា​តែង​ស្កែន​ផ្ទៃមេឃ​រៀងរាល់ ២៤ ម៉ោង​ម្តង​៕

ចិន​មាន​បំណង​បញ្ជូន​យានអវកាស​ឆ្ពោះទៅ​រក​អាចម៍ផ្កាយ​នៅ​ឆ្នាំ ២០២៥ ឬ ២០២៦