​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ្នក​ហូប​បួស​ម្នាក់ ដែល​ផឹក​ទឹកនោម​ផ្អាប់​ទុក​រយៈពេល​មួយ​ខែ​ហើយ​លាប​វា​ពេញ​មុខ​របស់​ខ្លួន បាន​អះអាង​ថា ប្អូនស្រី​របស់​គាត់​ឥឡូវ​ស្អប់​គាត់​ណាស់​ព្រោះ​តែ​ទម្លាប់​គួរឱ្យ​ខ្ពើម​នេះ​។​

​លោក ហា​រី ម៉ា​តា​ឌី​ន (Harry Matadeen) មកពី​តំបន់​ហាំសា​យ​អឺ (Hampshire) នៃ​ចក្រភព​អង់គ្លេស បានចាប់ផ្តើម​ផឹក​ទឹកនោម​ខ្លួន​ឯង​នៅ​ឆ្នាំ ២០១៦ ដោយសារតែ​គាត់​”​អស់សង្ឃឹម​​ក្នុង​ការព្យាបាល​” បញ្ហា​សុខភាព​ផ្លូវចិត្ត​របស់​គាត់​។​

​គាត់​បាន​និយាយថា ទឹកនោម​របស់គាត់ ដែល​គាត់​ផឹក ២០០​មិ​ល្លី​លីត្រ​រៀងរាល់ថ្ងៃ បាន​ធ្វើឱ្យ​គាត់​មាន​អារម្មណ៍ “​សុខសាន្ត ស្ងប់ស្ងាត់ និង​តាំងចិត្ត​បានល្អ​”​ហើយ​បាន​ព្យាបាល​គាត់​ឱ្យ​ជា​សះ​​ស្បើយ​ស្ទើរតែ​មួយ​រំពេច​។​

​ហើយ​បុរស​អាយុ ៣៤ ឆ្នាំ​ដែល​ជួនកាល​យក​ទឹកនោម​លាងមុខ​ខ្លួនឯង បាន​អះអាង​ថា​វា​ជា “​អាថ៌កំបាំង​នៃ​យុវវ័យ​ជា​អមតៈ​”​។​ប៉ុន្តែ​លោក​ម៉ា​តា​ឌី​ន ដែល​សរសេរ​សៀវភៅ​អំពី​អត្ថប្រយោជន៍​សុខ​ភាព​នៃ​​ទម្លាប់​របស់​គាត់ បាន​និយាយថា គាត់​ត្រូវបាន​ប្អូនស្រី​ស្អប់ខ្ពើម ដោយសារ​តែ​ការព្យាបាល​ដោយ​ប្រើ​ទឹកនោម​របស់គាត់​។​

​ក្រុម​អ្នកតស៊ូ​មតិ​បាន​និយាយថា ទឹកនោម ដែល​មាន​ជាតិ​ទឹក ៩០ ភាគរយ អាច​ព្យាបាល​គ្រប់បែប​យ៉ាង​ចាប់ពី​ជំងឺ​ស្វ័យ​ស៊ាំ (Autoimmune) រហូត​ដល់​ការឈឺចាប់​រ៉ាំរ៉ៃ​។​

​ប៉ុន្តែ​ក្រុម​គ្រូពេទ្យ​ព្រមាន​ថា​មិន​មាន​ភស្តុតាង​ថា​ទឹកនោម​មាន​អត្ថប្រយោជន៍​អ្វី​នោះទេ​។ ពួកគេ​និយាយថា ការអនុវត្ត ដែល​គេ​គិតថា​មាន​ប្រភព​ដើម​នៅអេ​ហ្ស៊ី​បបុរា​ណ បង្កើន​ល្បឿន​នៃ​ការ​ខះ​ជាតិ​ទឹក និង​ធ្វើឱ្យ​អ្នក​ផឹក​ប្រឈម​ឆ្លង​បាក់តេរី​។​

​តារាចម្រៀង​ម៉ា​ដូ​ណា និង​នាង​កេសា (Kesha) ក៏​ធ្លាប់​អះអាង​ថា​ផឹក​ទឹកនោម​ខ្លួនឯង​ផង​ដែរ​៕

​លោក ហា​រី ម៉ា​តា​ឌី​ន ផឹក​ទឹកនោម​ផ្អាប់​ទុក​របស់​ខ្លួន​រាល់ថ្ងៃ​ដើម្បី​ព្យាបាល​ជំងឺ​ផ្លូវចិត្ត​និង​ជួយ​រក្សា​ស្បែក​ឱ្យ​ក្មេង​ជាង​វ័យ