​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ រឺ​ម៉កក​ង់​បី​ពណ៌​លឿង​និង​បៃតង​មាន​គ្រប់​ទីកន្លែង​នៅលើ​ដងផ្លូវ​ក្នុង​ទីក្រុង​ញូវដេល្លី ប៉ុន្តែ​យានជំនិះ​របស់​លោក ម៉ា​ហេ​នដ្រា គូ​ម៉ា (Mahendra Kumar) មាន​ភាព​លេចធ្លោ​ជាង​គេ ព្រោះ​វា​មាន​សួនច្បារ​នៅលើ​ដំបូល​ដើម្បី​រក្សា​ភាព​ត្រជាក់​ដល់​អ្នកដំណើរ​ក្នុង​រដូវក្តៅ​ស្ទើរ​ឆេះ​។​

​លោក​គូ​ម៉ា​និយាយថា សួន​បៃតង​ក្រាស់​នេះ​ធ្វើ​ឱ្យ​រឺ​ម៉កក​ង់​បី​ត្រជាក់ ទោះបីជា​សីតុណ្ហភាព​កើនឡើង​ដល់​៤៥ អង្សារ​សេ​នៅក្នុង​រដ្ឋធានី​នៃ​ប្រទេស​ឥណ្ឌា ដែល​វា​ក្តៅ​ល្មម​អាចរំលាយ​កៅស៊ូ​នៅលើ​ថ្នល់​។​

​លោក​គូ​ម៉ា​អាយុ ៤៨ ឆ្នាំ​បាន​ដាំ​ដើមឈើ ដំណាំ និង​ផ្កា​ជាង ២០ ប្រភេទ ដែល​ទាក់ទាញ​អ្នក​ធ្វើ​ដំណើរ​និង​អ្នក​ថ្មើរជើង ដែល​ឈប់​ដើម្បី​ថត Selfie និង​រូបថត​នៃ “​សួន​ចល័ត​” តែមួយគត់​នេះ​។​

​លោក​បាន​ប្រាប់​ទីភ្នាក់ងារ​សារព័ត៌មាន AFP ថា “​ប្រហែល​ពីរ​ឆ្នាំ​មុន ខ្ញុំ​មាន​គំនិត​នេះ​ក្នុងអំឡុងពេល​រដូវក្តៅ​។ ខ្ញុំ​គិតថា ប្រសិនបើ​ខ្ញុំ​អាច​ដាំ​រុក្ខជាតិ​លើដំបូល​បាន វា​នឹង​ធ្វើឱ្យ​ម៉ូតូ​កង់​បី​របស់​ខ្ញុំ​ត្រជាក់ និង​ជួយ​បន្ថយ​កម្តៅ​ដល់​អ្នកដំណើរ​”​។​

​គាត់​ក៏បាន​ដំឡើង​កូន​ម៉ាស៊ីនត្រជាក់​ចំនួន​ពីរ​និង​កង្ហារ​នៅ​ខាងក្នុង​ផងដែរ​។​

​ឪពុក​កូន​បី​រូបនេះ​បាន​និយាយថា “​ឥឡូវ​វា​ដូច​ម៉ាស៊ីនត្រជាក់​ធម្មជាតិ​អ៊ីចឹង​។ អ្នកដំណើរ​របស់​ខ្ញុំ​សប្បាយចិត្ត​ខ្លាំង​ណាស់​បន្ទាប់​ពី​ជិះ ដោយ​មិន​ប្រកាន់​ក្នុង​ការបង់ប្រាក់​បន្ថែម ១០ ទៅ ២០ រូពី​ដល់​ខ្ញុំ​”៕

លោក​គូ​ម៉ា​បាន​ដាំ​ដើមឈើ ដំណាំ និង​ផ្កា​ជាង ២០ ប្រភេទ​លើដំបូល​រឺ​ម៉កក​ង់​បី​របស់​គាត់​