ប្រែសម្រួលៈបំណង(ដេល្លីម៉េល)៖ រុស្ស៊ីកាលពីថ្ងៃចន្ទបានបន្តវាយប្រហាររោងចក្រដែកនៅទីក្រុងម៉ារីវប៉ូល ដែលជាទីតាំងតស៊ូចុងក្រោយនៅទីក្រុងភាគខាងត្បូងក្រោយផ្អាកការប្រយុទ្ធគ្នាមួយរយៈពេលខ្លីដើម្បីអនុញ្ញាតអោយមានប្រតិបត្តិការជម្លៀសជនស៊ីវិលចេញកាលពីចុងសប្តាហ៍។
ក្នុងពេលជាមួយគ្នា មន្ត្រីអាម៉េរិកជាន់ខ្ពស់ម្នាក់បានព្រមានថា រុស្ស៊ីមានផែនការដាក់ចំណែកទឹកដីធំៗនៅអ៊ុយក្រែនខាងកើតជាឧបសម្ពន្ធរបស់ខ្លួននៅខែនេះនិងទទួលស្គាល់ទីក្រុងឃឺសុន(Kherson)ភាគខាងត្បូងជាសាធារណរដ្ឋឯករាជ្យមួយ។
ម៉ៃឃើល ខាផេនធឺ(Michael Carpenter)ឯកអគ្គរដ្ឋទូតអាម៉េរិកប្រចាំអង្គការសន្តិសុខនិងកិច្ចសហប្រតិបត្តិការនៅអឺរ៉ុប បាននិយាយថា អំពើសង្ស័យនៅក្នុងផែនការរបស់វិមានក្រឹមឡាំងទាំងនេះនឹងមិនត្រូវសហរដ្ឋអាម៉េរិកនិងសម្ពន្ធមិត្តទទួលស្គាល់ឡើយ។
នៅទីក្រុងម៉ារីវប៉ូល មនុស្សជាង១០០នាក់ រួមមានស្ត្រីចំណាស់និងម្តាយជាមួយនឹងកូនតូចៗ បានចាកចេញពីរោងចក្រដែកអាហ្សូវស្តាល់កាលពីថ្ងៃអាទិត្យ និងបានឡើងជិះរថយន្តក្រុងនិងឡានពេទ្យឆ្ពោះទៅកាន់ទីក្រុង ហ្សាប៉ូរីសយ៉ាដែលគ្រប់គ្រងដោយអ៊ុយក្រែននៅចម្ងាយ២៣០គីឡូម៉ែត្រពីគ្នា។
ជនស៊ីវិលខ្លះទំនងជានាំទៅកាន់ភូមិមួយដែលគ្រប់គ្រងដោយពួកផ្តាច់ទឹកដីគាំទ្រដោយរុស្ស៊ី។យោធារុស្ស៊ីបាននិយាយថា អ្នកត្រូវបានជម្លៀសខ្លះបានជ្រើសរើសទៅស្នាក់នៅក្នុងតំបន់ផ្តាច់ខ្លួន និងខ្លះទៀតចាកចេញទៅកាន់តំបន់គ្រប់គ្រងដោយអ៊ុយក្រែន។
ការទម្លាក់គ្រាប់ បាញ់ផ្លោងនិងវាយប្រហារដោយកាំជ្រួចរុស្ស៊ីបានបន្តឡើងវិញកាលពីថ្ងៃចន្ទ ក្រោយការជម្លៀសជនស៊ីវិលចេញមួយចំនួន នេះបើតាមការអះអាងរបស់កងពលអាហ្សូវ ដែលជួយការពាររោងចក្រដែកនេះខណៈការចរចានៅបន្តក្នុងចំណោមតំណាងរុស្ស៊ី អ៊ុយក្រែននិងអង្គការអន្តរជាតិ ស្តីពីការជម្លៀសមនុស្សថែមទៀត។
រុស្ស៊ីកាលពីថ្ងៃចន្ទបាននិយាយថា ខ្លួនបានវាយប្រហារគោលដៅយោធារាប់សិបកន្លែងនៅក្នុងតំបន់នៅមួយថ្ងៃកន្លងមកនេះ។រដ្ឋាភិបាលទីក្រុងមូស្គូ បានអះអាងថាខ្លួនបានវាយប្រហារលើទាហាន និងសព្វាវុធរួមទាំងឃ្លាំងគ្រាប់មួយនៅក្បែរទីក្រុងឆែរវ៉ូន(Chervone)ក្នុងតំបន់ហ្សាប៉ូរីសយ៉ា ។
អ៊ុយក្រែនក៏បាននិយាយថា រុស្ស៊ីបានវាយប្រហារផ្លូវយុទ្ធសាស្ត្រមួយនិងស្ពានផ្លូវដែកមួយនៅក្រុងអូដេសា(Odesa) ហើយខ្លួនបានបំផ្លាញទូកល្បាតរុស្ស៊ីពីរគ្រឿងនៅសមុទ្រខ្មៅ៕
ជនស៊ីវិលជាង១០០នាក់ត្រូវបានជម្លៀសចេញពីរោងចក្រដែកក្នុងក្រុងម៉ារីវប៉ូល និងជិះរថយន្តក្រុងទៅកាន់កន្លែងមានសុវត្ថិភាពកាលពីចុងសប្តាហ៍