​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ មន្ត្រី​ប្រេ​ស៊ីល​ជឿថា ពួកគេ​អាច​នឹង​ប្រទះ​ឃើញ​ដោយ​ចៃដន្យ​នូវ​មនុស្ស​អាយុ​វែង​ជាង​គេ​បំផុត​នៅលើ​ពិភពលោក បន្ទាប់​ពី​ក្រុមគ្រូពេទ្យ​បាន​ព្យាបាល​ស្ត្រី​អាយុ ១២១ ឆ្នាំ​នៅ​ផ្ទះ​របស់​គាត់​។​

​ការរកឃើញ​ដ៏​គួរឱ្យ​ភ្ញាក់ផ្អើល​នេះ​ត្រូវបាន​ធ្វើឡើង​នៅពេល​ដែល​ក្រុមគ្រូពេទ្យ​ចល័ត​មួយ​ត្រូវបាន​បញ្ជូន​ទៅកាន់​លំនៅដ្ឋាន​របស់​លោកយាយ ម៉ា​រៀ ហ្គោ​ម៉េស ដូស រ៉េ​អ៊ី​ស (Maria Gomes dos Reis) ក្នុង​ទីក្រុង​បុម​យ៉េ​ស៊ូ​សដា​ឡា​ប៉ា (Bom Jesus da Lapa) ។​

​លោកយាយ​ម៉ា​រៀ ហ្គោ​ម៉េស ដូស រ៉េ​អ៊ី​ស​កើត​នៅ​ថ្ងៃទី ១៦ ខែមិថុនា ឆ្នាំ ១៩០០ នៅក្នុង​ភូមិ​បេឡា​វី​ស្តា (Bela Vista) នៃ​ទីក្រុង​បុម​យ៉េ​ស៊ូ​សដា​ឡា​ប៉ា នេះ​បើ​យោងតាម​សំបុត្រ​កំណើត​របស់​លោក​​យាយ​។

​ពិតជា​មិន​គួរ​ឱ្យ​ជឿ លោកយាយ​នៅតែ​រស់នៅក្នុង​ទីក្រុង​តូច​របស់​លោកយាយ​ដដែល នេះ​បើ​យោង​តាម​សារព័ត៌មាន​ប្រេ​ស៊ីល G1​។​

​កូនៗ​ទាំងអស់​របស់​លោកយាយ​បាន​ស្លាប់​អស់ហើយ ហើយ​ឥឡូវនេះ​លោកយាយ​រស់នៅ​ជាមួយ​ចៅស្រី​ឈ្មោះ សេ​លី​យ៉ា ហ្គោ​ម៉េស (Célia Gomes) ។​

​លោកស្រី​ហ្គោ​ម៉េស​បាន​និយាយថា ជីដូន​របស់​គាត់​ពិត​ជា​សកម្ម​ណាស់​រហូតដល់​ប្រាំបី​ឆ្នាំ​មុន​នេះ នៅពេល​ដែល​គាត់​រៀបចំ​អាហារ បោកគក់ និង​ចូលរួម​ពិធី​ធំដុំ​នានា​។ លោក​ស្រី​និយាយថា ជីវិត​របស់​គាត់​ឥឡូវ​ជាប់រវល់​មើលថែ​ជីដូន​៕

លោកយាយ​ម៉ា​រៀ ហ្គោ​ម៉េស ដូស រ៉េ​អ៊ី​ស​កើត​នៅ​ថ្ងៃទី ១៦ ខែមិថុនា ឆ្នាំ ១៩០០