ដោយ​៖ ដេប៉ូ / ភ្នំពេញ​៖ អង្គជំនុំជម្រះ​វិសាមញ្ញ ក្នុង​តុលាការ​កម្ពុជា (​អ​.​វ​.​ត​.​ក​) បានចេញ​សេចក្តី ប្រកាស​ព័ត៌មាន ពី​ការបិទ​បញ្ចប់​សិក្ខាសាលា រយៈពេល​បី​ថ្ងៃ ស្តីពី «​ជនរងគ្រោះ និង​ការ​ផ្សព្វ ផ្សាយ​របាយការណ៍​ប្រឹក្សា ស្តីពី​សកម្មភាព​នានា ពាក់ព័ន្ធ​នឹង​ជនរងគ្រោះ របស់ អ​.​វ​.​ត​.​ក នៅ​អំឡុង​ដំណាក់កាល ដែល​នៅ សេសសល់​»​។​

​សូម​រំលឹកថា សិក្ខាសាលា​នេះ បានរៀបចំ​ឡើង អស់​រយៈពេល បី​ថ្ងៃ ចាប់ពី​ថ្ងៃទី​៣ រហូតដល់ ថ្ងៃទី​៥ ខែឧសភា ឆ្នាំ​២០២២ នៅ​សណ្ឋាគារ Hyatt Regency រាជធានី​ភ្នំពេញ​។​

​ព្រឹត្តិការណ៍​នេះ បាន​ប្រារព្ធ​ធ្វើឡើង ដោយមាន​វត្តមាន យ៉ាងសកម្ម​របស់ ដើម​បណ្តឹងរដ្ឋប្បវេណី និង​ជនរងគ្រោះ ដែលជា​អ្នក​នៅរស់​រាន មានជីវិត ពី​របប​កម្ពុជា​ប្រជាធិបតេយ្យ ចំនួន ១៩ នាក់​។ ពួកគាត់​បាន​ចូលរួម យ៉ាង​ទៀង ទាត់ ក្នុង​កិច្ចពិភាក្សា​ក្រុមការងារ ជាមួយ​អ្នកចូលរួម​ដទៃទៀត ហើយ​ពួកគាត់ បាន​ចែករំលែក​គំនិត យ៉ាងច្រើន នៅ​វគ្គ​ពេញអង្គ បិទ​បញ្ចប់​នា​ថ្ងៃនេះ​។​

​នៅក្នុង​កម្មវិធី​បិទ​សិក្ខាសាលា ពួកគាត់​ត្រូវបាន​តំណាង ដោយ​ដើមបណ្តឹង រដ្ឋប្បវេណី លោក ចាន់ សាត និង​លោកស្រី ពេជ្រ ស្រី​ផល ដែល​ពួកគាត់ បានកត់សម្គាល់ ដោយ​សង្ខេប ហើយ​បានស្នើ​សុំឱ្យ​ក្រសួង​ស្ថាប័ន នៅក្នុង​រាជរដ្ឋាភិបាល​កម្ពុជា និង​អង្គការ​អន្តរជាតិ​នានា ផ្តល់​ការគាំទ្រ​បន្ថែមទៀត ដល់​ជនរងគ្រោះ ដែលជា​អ្នក​នៅ​រស់រានមានជីវិត ដែលមាន​វ័យ ចំណាស់ នៅពេល​ខាងមុខ ហើយ​ឲ្យ​ពួកគាត់ អាច​ចែករំលែក បទពិសោធន៍​របស់​ពួកគាត់ ជាមួយ​សាធារណជន​ទូទៅ ដើម្បី​ធានាថា មិនមាន​ការកើតឡើង​សារជាថ្មី នូវ​ជម្លោះ​បែបនេះ ឡើយ​។​

​សិក្ខាសាលា បី​ថ្ងៃនេះ ក៏​ទទួលបាន​នូវ​ចំណាប់អារម្មណ៍ និង​ការចូលរួម​របស់ សហគមន៍ ការទូត​អន្តរជាតិ ផងដែរ​។ សិក្ខាសាលា​នេះ បាន​ប្រារព្ធ​ឡើង កាលពី​ថ្ងៃទី​៣ ខែឧសភា ឆ្នាំ​២០២២ ដោយមាន​សុន្ទរកថា​បើក ដ៏​គួរឱ្យ​ចាប់ អារម្មណ៍​របស់ លោក Jacques PELLET ឯកអគ្គរដ្ឋទូត​បារាំ​ង ប្រចាំ​នៅ ប្រទេស​កម្ពុជា និង​លោក កែវ រ៉េមី រដ្ឋមន្ត្រី​ប្រតិភូ​អម នាយករដ្ឋមន្ត្រី និង​ជា​អនុប្រធាន​អចិន្ត្រៃយ៍ នៃ​ក្រុមការងារ​រាជ​រដ្ឋបាល ជួយ អ​.​វ​.​ត​.​ក ហើយ​ត្រូវបាន​បិទ​បញ្ចប់ នៅ​ថ្ងៃទី​៥ ខែឧសភា ឆ្នាំ​២០២២ ដោយ​សុន្ទរកថា ដ៏​កក់ក្តៅ ស្តីពី​ការគាំទ្រ​ពី​លោក MIKAMI Masahiro ឯកអគ្គរាជទូត​ជប៉ុន ប្រចាំ​នៅ​ប្រទេស​កម្ពុជា​។

​ព្រឹត្តិការណ៍​នេះ ក៏មាន​ការចូលរួម​ផងដែរ ពី​សំណាក់​ឯកអគ្គរាជទូត​ចក្រភព អង់គ្លេស ប្រចាំ​នៅ​ប្រទេស​កម្ពុជា គឺ​លោកស្រី Tina REDSHAW ។ តំណាង​ស្ថានទូត ការិយាល័យ​ការទូត ប្រទេស​អូស្ត្រាលី សហរដ្ឋអាមេរិក អាល្លឺម៉ង់ សហភាព​អឺរ៉ុប ស្វី​ស តួ​ក​គី ថៃ និង វៀតណាម ក៏បាន​ចូលរួម​ផងដែរ​។ ការិយាល័យ​សន្តិភាព​ស៊ីវិល GIZ របស់​ប្រទេស​អាល្លឺម៉ង់ ក៏បាន​បញ្ជូន សិក្ខាកាម​ធម្មតា​យ៉ាងច្រើន ដែល​ពួកគេ​បាន​ចូលរួមចំណែក យ៉ាង​លើសលប់ ជា​យោបល់ និង​ការគាំទ្រ នៅក្នុង​កម្មវិធី​សិក្ខាសាលា​ទាំងមូល​។ អង្គ​សិក្ខា សាលា សូម​ថ្លែង​នូវ​អំណរគុណ យ៉ាង​ជ្រាលជ្រៅ ចំពោះ​ការចូលរួម​ទាំងអស់នេះ ព្រមទាំង​ការប្តេជ្ញាចិត្ត ជាមួយ អ​.​វ​.​ត​.​ក ក្នុងពេលដែល អ​.​វ​.​ត​.​ក ឈានដល់ ដំណាក់កាល នៅ​សេសសល់​របស់ខ្លួន​។​

​អ្វីដែល​ជាការ​សំខាន់​នោះ គឺ​អង្គសិក្ខាសាលា មានការ​ចូលរួម​យ៉ាង​សកម្ម និង​ដោយ​យកចិត្ត ទុកដាក់ ពី​សិក្ខាកាម​ជាង ៩០ នាក់ ដែល​ក្នុងនោះ រួមមាន តំណាង​អង្គការ​មិនមែន​រដ្ឋាភិបាល ក្នុងស្រុក អង្គការ​អន្តរជាតិ ស្ថាប័នរដ្ឋ និង​សារមន្ទីរ មេធាវី​តំណាង​ដើម​បណ្តឹងរដ្ឋប្បវេណី អ្នកសិក្សា​ឯករាជ្យ មេធាវី និង​អ្នកស្រាវជ្រាវ ព្រមទាំង​ភាគី​នានា នៃ អ​.​វ​.​ត​.​ក និង​បុគ្គលិក អ​.​វ​.​ត​.​ក ផងដែរ ដែល​ពួកគាត់​ទាំងអស់ បាន​ចូលរួម​រយៈពេល បី​ថ្ងៃ ហើយ​បាន​ចូលរួមចំណែក នូវ​ព័ត៌មាន​លម្អិត យ៉ាងច្រើន និង​សំបូរបែប សម្រាប់​ក្របខណ្ឌ និង​កម្មវិធី​នៃ ដំណាក់កាល នៅ​សេសសល់ ដែល​នឹង​ឈានចូល​មកដល់​របស់ អ​.​វ​.​ត​.​ក ។​

​ដូចដែល លោក ក្រាញ់ តូ​នី ប្រធានការិយាល័យ​រដ្ឋ​បាល​ស្តីទី និង​លោក Knut ROSANDHAUG អនុប្រធាន​ការិយាល័យ​រដ្ឋបាល នៃ អ​.​វ​.​ត​.​ក បានបញ្ជាក់ យ៉ាងច្បាស់ នៅក្នុង​សុន្ទរកថា​បើក​និង សុន្ទរកថា​បិទ របស់​ពួកគាត់ ហើយ​ថា សិក្ខាសាលា​រយៈពេល បី​ថ្ងៃនេះ គឺជា​ជំហាន​ដំបូង​បំផុត ដែល អ​.​វ​.​ត​.​ក ជនរងគ្រោះ និង​ដើម​បណ្តឹងរដ្ឋប្បវេណី និង​អ្នកតំណាង​របស់​ពួកគាត់ និង​អ្នក ពាក់ព័ន្ធ​នានា ចាប់ផ្តើម​ធ្វើការ​ពិចារណា និង​អនុវត្ត​នូវ​អាណត្តិ​ការងារ នៅ​សេសសល់​៕ /V​-PC