​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ការសិក្សា​ថ្មី​មួយ​បាន​ព្រមាន​ថា កង្វះខាត​ទឹកនឹង​កើន​ឡើង​ក្នុង​រយៈពេល​ប៉ុន្មាន​ទសវត្សរ៍​ខាង​មុខ​នៅ​ក្នុង​ផ្ទៃ​ដី​ដាំ​ដុះ​របស់​ពិភពលោក​ប្រមាណ ៨០​ភាគរយ​​ដោយសារ​តែ​ការប្រែប្រួល​អាកាសធាតុ​។​

​ពួក​អ្នក​ស្រាវជ្រាវ​បាន​ពិនិត្យ​មើល​តម្រូវការ​ទឹក​បច្ចុប្បន្ន​និង​អនាគត​សម្រាប់​កសិកម្ម​ពិភពលោក​ដើម្បី​កំណត់​ថា​តើ​កម្រិត​ទឹក​ត្រូវការ​នឹង​អាច​រកបាន​នៅ​ឆ្នាំ ២០៥០ ឬ​អត់​។​

​ក្រុម​អ្នកស្រាវជ្រាវ​មក​ពី​បណ្ឌិត្យសភា​វិទ្យាសាស្ត្រ​ចិន​នៅ​ទីក្រុង​ប៉េកាំ​ង​បាន​ពិនិត្យមើល​កម្រិត​អតិបរមា​នៃ​ទឹក​ដែល​អាច​កើត​ចេញពី​ទឹកភ្លៀង និង​ប្រព័ន្ធ​ធារាសាស្ត្រ​នៅក្នុង​តំបន់​ដំណាំ​នីមួយៗ​។​ពួកគេ​​បាន​បង្កើត​ស​ន្ទ​ស្សន៍​មួយ​ដើម្បី​វាស់​ស្ទង់​និង​ព្យាករណ៍​ពី​កង្វះ​ទឹក​នៅ​ក្នុង​ប្រភព​កសិកម្ម​សំខាន់ៗ រួម​មាន​ដី ទឹកភ្លៀង ប្រព័ន្ធធារាសាស្ត្រ និង​ទន្លេ ដោយ​រកឃើញថា ៨០​ភាគរយ​នៃ​ផ្ទៃ​ដី​ដំណាំ​ទាំងអស់​​នៅ​ជុំវិញ​ពិភពលោក​នឹង​មិន​មាន​ទឹក​គ្រប់គ្រាន់​នៅ​ត្រឹម​ឆ្នាំ ២០៥០ នោះទេ​។​

​ក្នុង​រយៈពេល ១០០ ឆ្នាំ​ចុងក្រោយ​នេះ តម្រូវការ​ទឹក​នៅ​ទូទាំង​ពិភពលោក​បាន​កើនឡើង​ពី​រដង​លឿន​ស្មើនឹង​ចំនួន​មនុស្ស​ដែរ ដោយ​កង្វះ​ទឹក​គឺជា​បញ្ហា​កើនឡើង​ខ្ពស់​នៅក្នុង​តំបន់​ដែល​រងគ្រោះ​ដោយ​គ្រោះរាំងស្ងួត ដូចជា​បណ្តារ​ដ្ឋ​នៅ​ភាគ​ខាងលិច​សហរដ្ឋ​អាម៉េរិក ដោយសារ​អាង​ទន្លេ​ខូ​ឡូ​រ៉ាដូ​ខ្សត់​ទឹក​។​

​កាលពីដើម​សប្តាហ៍​នេះ ក្រុមមន្ត្រី​អាម៉េរិក​បានប្រកាស​ពីអ្វី​ដែល​ពួកគេ​ហៅ​ថា​ជំហាន​វិសាមញ្ញ​លើ​ការរក្សា​ទឹក​រាប់រយ​ពាន់​លាន​ហ្គា​ឡុង​ដែល​ត្រូវ​រក្សាទុក​នៅក្នុង​អាង​ស្តុក​ទឹកឡេក​ផូវែល (Lake Powell)​។​

​រឿង​នេះ​ត្រូវបាន​ធ្វើឡើង​ដើម្បី​ការពារ​ទឹក​កុំឱ្យ​ថយ​ចុះ​បន្ថែមទៀត​ចំ​ពេល​មាន​គ្រោះរាំងស្ងួត​យូរ​និង​ការប្រែប្រួល​អាកាសធាតុ ដែល​ឃើញ​អាង​ស្តុក​ទឹក​នៅក្នុង​តំបន់​ស្រក​ទឹក​ដល់​កម្រិត​ទាប​មិន​ធ្លាប់​មាន​។​

​ក្រុម​អ្នកស្រាវជ្រាវ​បាន​លើកឡើង​ថា “​បច្ចេកទេស​កសិកម្ម​ដែល​រក្សា​ទឹកភ្លៀង​នៅក្នុង​ដី​កសិកម្ម​អាចជួយ​កាត់បន្ថយ​ការខ្វះខាត​ទឹក​នៅក្នុង​តំបន់​ស្ងួត​បែក​ក្រហែង​បាន​”៕

​កង្វះខាត​ទឹកនឹង​កើន​ឡើង​ក្នុង​រយៈពេល​ប៉ុន្មាន​ទសវត្សរ៍​ខាង​មុខ​នៅ​ក្នុង​ផ្ទៃ​ដី​ដាំ​ដុះ​របស់​ពិភពលោក​ប្រមាណ ៨០ ភាគរយ​ដោយសារតែ​ការប្រែប្រួល​អាកាសធាតុ