​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្នុងអំឡុង​យុទ្ធនាការ​បោះឆ្នោត​របស់​គាត់ ប្រធានាធិបតី​ជាប់ឆ្នោត​កូរ៉េខាងត្បូង​លោក យូ​ន ស៊ុក​យ៉ូល (Yoon Suk Yeol)​បាន​បញ្ចេញ​សម្តី​ថ្លោស​ដាក់​មេ​ដឹក​​នាំ​កូរ៉េខាងជើង​លោក គីម ជុង​អ៊ុន ដោយ​និយាយថា​គាត់​នឹង​បង្រៀន​គូ​ប្រជែង​របស់​គាត់​នូវ​សុជីវធម៌​និង​ដោះស្រាយ​យ៉ាង​ម៉ឺងម៉ាត់​ចំពោះ​ការសាកល្បង​កាំជ្រួច​បង្កហេតុ​របស់​កូរ៉េខាងជើង​ក្រោម​កិច្ច​​សហការ​ជាមួយនឹង​សម្ពន្ធភាព​ដ៏​រឹងមាំ​ជាមួយ​សហរដ្ឋ​អាម៉េរិក​។​

​ប៉ុន្តែ​ខណៈ​ដែល​គាត់​ត្រៀម​ចូលកាន់​តំណែង​នៅ​ថ្ងៃ​អង្គារ​ទី​១០​ឧសភា​សម្រាប់​អាណត្តិ​រយៈពេល​ប្រាំ​ឆ្នាំ​ពេលនេះ​លោក​យូ​ន​ដែលជា​អ្នក​អភិរក្សនិយម​ត្រូវតែ​ប្រឈម​មុខ​នឹង​លោក​គីម​ដែល​មាន​កំហឹង​កាន់តែខ្លាំង​ឡើង និង​ដែល​បាន​គំរាម​ប្រើ​គ្រាប់បែកបរមាណូ​ដោយ​បើកចំហ ហើយ​តាម​ដឹង​កំពុង​ត្រៀម​សាកល្បង​អាវុធ​នុយក្លេអ៊ែរ​លើកដំបូង​របស់​គាត់​ចាប់តាំងពី​ឆ្នាំ ២០១៧​ដែល​ជា​ផ្នែក​នៃ​កិច្ច​ខិតខំ​ប្រឹង​​ប្រែង​ដើម្បី​បង្កើត​ក្បាល​គ្រាប់​ដែល​ផ្តោត​គោលដៅ​ជាពិសេស​ទៅលើ​កូរ៉េខាងត្បូង​។​

​កូរ៉េ​ខាងជើង​មាន​ប្រវត្តិ​ព្យាយាម​ធ្វើ​ឱ្យ​រង្គោះរង្គើ​រដ្ឋាភិបាល​ថ្មី​នៅ​ទីក្រុង​សេ​អ៊ូ​ល​និង​វ៉ាស៊ីនតោន​ដើម្បី​ទទួលបាន​ឥទ្ធិពល​នៅក្នុង​ការចរចា​នាពេល​អនាគត​។​ប៉ុន្តែ​ប្រសិនបើ​លោក​គីម​បញ្ជា​ឱ្យ​ធ្វើ​សាក​​ល្បង​នុយក្លេអ៊ែរ នោះ​លោក​យូ​ន​នឹង​នៅ​មាន​ជម្រើស​តិចតួច​ណាស់​ដើម្បី​ដោះស្រាយ​ជាមួយ​លោក​គីម នៅ​ពេល​ចាប់ផ្តើម​កាន់តំណែង​ជា​ប្រធានាធិបតី​។​

​មាន​ការសង្ស័យ​ក្នុងចំណោម​អ្នកជំនាញ​ជុំវិញ​ថា​តើ​លោក​យូ​ន ទោះបីជា​មាន​វោហា​សាស្ត្រ​ខ្លាំងៗ អាច​សម្រេចបាន​នូវ​អ្វី​ដែល​មាន​ន័យ​ខុសពី​ប្រធានាធិបតី​ដែល​ត្រៀម​ចាកចេញ មូន ជែ​អ៊ីន ដែរ​ឬ​អត់ ខណៈ​កូរ៉េខាងជើង​នៅតែ​បន្ត​បដិសេធ​កិច្ចពិភាក្សា ហើយ​ផ្តោតលើ​ការពង្រីក​កម្មវិធី​នុយក្លេអ៊ែរ​និង​មី​ស៊ី​ល​របស់ខ្លួន បើទោះបីជា​មាន​ធនធាន​តិចតួច​និង​ការលំបាក​ផ្នែក​សេដ្ឋកិច្ចក្តី​។​

​លោក ផាក វ៉ុន គុន (Park Won Gon)​សាស្ត្រាចារ្យ​នៅ​សាកលវិទ្យាល័យ​អេវ៉ា​វ៉ូ​មែន (Ewha Womans) នៃ​ទីក្រុង​សេ​អ៊ូ​ល​បាន​និយាយថា “​កូរ៉េ​ខាងជើង​មាន​គំនិត​ផ្តួចផ្តើម​បែបនេះ​។​មិន​ថា​​អ្នក​អភិរក្សនិយម ឬ​អ្នក​សេរីនិយម​កំពុងកាន់​អំណាច​នៅក្នុង​ប្រទេស​កូរ៉េខាងត្បូង​នោះទេ កូរ៉េ​ខាងជើង​នឹង​បន្ត​ជំរុញ​ការសាកល្បង​កាំជ្រួច ក្រោម​តារាង​ពេលវេលា​អភិវឌ្ឍន៍​អាវុធ​របស់​ខ្លួន​មុន​​ពេលដែល​ខ្លួន​ព្យាយាម​ផ្តល់​តុល្យភាព​នៅ​ពេល​ក្រោយ​។ ឥឡូវនេះ កូរ៉េ​ខាងជើង​នឹង​បន្ត​ការបង្ក​ហេតុ​របស់​ខ្លួន ប៉ុន្តែ​គ្មាន​មធ្យោបាយ​ណា​អាច​បញ្ឈប់​រឿងនេះ​បានឡើយ​”៕

​លោក​យូ​ន ស៊ុក​យ៉ូល (​ឆ្វេង​) ចុះ​ពិនិត្យ​ជំរំកងទ័ព​អាម៉េរិក​-​កូរ៉េ​នៅ​ខេត្ត​ព្យឹង​ថែ​កកាល​ពី​ថ្ងៃទី​៧​ខែ​មេសា​ឆ្នាំ​២០២២