ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ តារា​រ៉ុក​ជនជាតិ​អៀរ​ឡង់​ឈ្មោះ បូ​ណូ (Bono) បាន​សរសើរ​ការប្រយុទ្ធ​របស់​អ៊ុយ​ក្រែន​សម្រាប់ “​សេរីភាព​”​ក្នុងអំឡុងពេល​ការសម្តែង​នៅក្នុង​ស្ថានីយ​រថភ្លើង​​ក្រោម​ដី​ក្នុង​ទីក្រុង​គៀវ​កាលពី​ថ្ងៃអាទិត្យ ទី​៨ ឧសភា កន្លែង​ដែល​ប្រធាន​ក្រុម​ចម្រៀង U2 រូប​នេះ​ក៏​បាន​បួងសួង​ផ្ទាល់ខ្លួន​ដើម្បី​សន្តិភាព​ផងដែរ​។​

​ពី​វេទិកា​នៃ​ស្ថានីយ​រថភ្លើង​ក្រោម​ដី​ទីក្រុង​គៀវ តារាចម្រៀង​រ៉ុក​អាយុ ៦១ ឆ្នាំ​រូប​នេះ​បាន​ច្រៀង​បទ​ពី​ដើម​របស់​ក្រុម U2 ដូចជា​បទ Sunday Bloody Sunday, Desire និង With Or Without You​។​

​លោកបូ​ណូបាន​និយាយ​អំឡុង​ពេល​សម្រាក​ថា “​ប្រជាជន​នៅ​អ៊ុយ​ក្រែន​មិន​គ្រាន់តែ​ប្រយុទ្ធ​ដើម្បី​សេរីភាព​ផ្ទាល់ខ្លួន​របស់​អ្នក​ទេ អ្នក​កំពុង​ប្រយុទ្ធ​ដើម្បី​យើងទាំងអស់គ្នា​ដែល​ស្រឡាញ់​សេរីភាព​”​។​

​តារា​ចម្រៀង​រូប​នេះ​ក៏បាន​លើកឡើង​ពី​ជម្លោះ​កន្លងមក​នៅ​ប្រទេស​អៀរ​ឡង់​របស់​ក្រុម​នេះ​ផងដែរ និង​បញ្ហា​ដែល​ខ្លួន​មាន​ជាមួយនឹង​ប្រទេស​ជិតខាង​ដែល​មាន​អំណាច​ជាង​។​

​លោកបូ​ណូបាន​និយាយថា “​យើង​សូម​បួងសួង​ឱ្យ​អ្នក​ទទួលបាន​នូវ​សន្តិភាព​ក្នុងពេល​ឆាប់ៗ​នេះ​”​។​

​ការបង្ហាញ​ខ្លួន​ដ៏​គួរឱ្យភ្ញាក់ផ្អើល​របស់លោក​បូ​ណូ ដែលជា​អ្នក​មនុស្សធម៌​ជា​យូរ​មក​ហើយ ដែល​ជារឿយៗ​ផ្តល់​សំឡេង​របស់​គាត់​ចំពោះ​បុព្វហេតុ​ជាច្រើន​រួម​ទាំង​ការប្រយុទ្ធប្រឆាំង​នឹង​ភាពក្រីក្រ​និង​ជំងឺ​​អេដស៍ បាន​កើតឡើង​នៅពេលដែល​សំឡេង​ស៊ី​រ៉ែ​ន​បន្លឺឡើង​លាន់​ពេញ​មេឃ​នៅក្នុង​រដ្ឋធានី​អ៊ុ​យក្រែន និង​ការប្រយុទ្ធ​គ្នា​បាន​ផ្ទុះឡើង​នៅ​ភាគ​ខាងកើត​របស់​ប្រទេស​៕

​លោកបូ​ណូនៃ​ក្រុមចម្រៀង U2 សម្តែង​នៅ​ស្ថានីយ​រថភ្លើង​ក្រោម​ដី​ទីក្រុង​គៀវ​កាលពី​ថ្ងៃអាទិត្យ​