ដោយៈ បូកគោ / កំពត​: អគ្គលេខាធិការ ក្រុមប្រឹក្សា​ជាតិ​កម្ពុជា ដើម្បី​អភិវឌ្ឍន៍ យុវជន បានបញ្ជាក់​ថាៈ បច្ចុប្បន្ន កម្ពុ​ជាមាន​យុវជន ដែលជា​កម្លាំង​ថ្មី ប្រមាណ​ជាង ៣៣ ភាគរយ សម្រាប់​ធានា​ដល់​កិច្ច​អភិវឌ្ឍ ប្រកបដោយ​ចីរភាព​។ ស្ថាប័ន​ពាក់ព័ន្ធ​នានា​បាន និង​កំពុង​ប្រមូល​ទិន្នន័យ​បន្ថែម ដើម្បី​ជំរុញ និង​បង្កើន​សមត្ថភាព​យុវជន ឱ្យ​ក្លាយជា​អ្នកដឹកនាំ ប្រកបដោយ​គុណភាព នាពេល​អនាគត​។​

​នា​ព្រឹក​ថ្ងៃទី​៩ ខែឧសភា ឆ្នាំ​២០២២ នៅ​សាលប្រជុំ​មន្ទីរអប់រំ យុវជន និង​កីឡា ខេត្តកំពត មាន​បើក​សិក្ខាសាលា ស្ដីពី​ការអភិវឌ្ឍ​ប្រព័ន្ធ​ព័ត៌មាន គ្រប់គ្រង ទិន្នន័យ​យុវជន​កម្ពុជា ដែលមាន​ការចូលរួម រវាង​ក្រសួង​ពាក់ព័ន្ធ និង​សិក្ខាកាម មកពី ២៥ រាជធានី ខេត្ត ប្រមាណ​ជាង ១០០ នាក់​។​

​ថ្លែង​ក្នុង​ពិធី​ខាងលើ លោកស្រី ស្រូ​យ សុជាតិ អគ្គលេខាធិការ ក្រុមប្រឹក្សា ជាតិ​កម្ពុជា ដើម្បី​អភិវឌ្ឍន៍​យុវជន បាន​មានប្រសាសន៍ថាៈ អគ្គលេខាធិការដ្ឋាន ក្រុមប្រឹក្សា​ជាតិ​កម្ពុជា ដើម្បី​អភិវឌ្ឍ​យុវជន សហការ​ជាមួយ​ក្រសួង ស្ថាប័ន​ពាក់ព័ន្ធ ព្រមទាំង​អង្គការ​ដៃគូ បាន​យកចិត្តទុកដាក់ សិក្សា​ស្រាវជ្រាវ ក៏ដូចជា កំពុង​ធ្វើ​បច្ចុប្បន្នភាព រួច​ចងក្រង​ជា ប្រព័ន្ធ​ព័ត៌មាន គ្រប់គ្រង​ទិន្នន័យ ដើម្បី​ជួយ​ពង្រឹង និង​បង្កើន​សមត្ថភាព​យុវជន ឱ្យ​កាន់តែ​ប្រសើរ ហើយ​ក្លាយ ជា​អ្នក​បន្តវេន​ដ៏​ល្អ ទៅ​ថ្ងៃ​អនាគត​។ នេះ​ជា​កិច្ច​ឆ្លើយតប ចំពោះ​ពាក្យ​ប្តេជ្ញា របស់​រាជរដ្ឋាភិបាល ក្នុងការ​ប្រែក្លាយ​កម្ពុជា ជា​ប្រទេស មាន​ប្រាក់ចំណូល មធ្យម​កម្រិត​ខ្ពស់ នៅ​ឆ្នាំ​២០៥០​។​

​លោក អ៊ុន ស៊ី​វុត្ថា ប្រធាន​ផ្នែក​ពិនិត្យ​តាមដាន និង​វាយតម្លៃ នៃ​ក្រុមប្រឹក្សា ជាតិ​កម្ពុជា ដើម្បី​អភិវឌ្ឍន៍​យុវជន បានបញ្ជាក់​ថាៈ រាជរដ្ឋាភិបាល បានដាក់ ចេញ​នូវ​គោលនយោបាយ ជាតិ ស្តីអំពី​ការអភិវឌ្ឍ​យុវជន តាំងពី​ឆ្នាំ​២០១១ ដោយ​ផែនការ​សកម្មភាព​ជាច្រើន បានធ្វើ​ឡើង​នៅ​ទូទាំងប្រទេស​។ ជាក់ស្តែង សិក្ខាសាលា នា​ថ្ងៃនេះ គឺមាន​គោលបំណង ប្រមូល​ទិន្នន័យ​យុវជន ទូទាំងប្រទេស គ្រប់​និន្នាការ ដើម្បី​បានដឹង​ពី​តម្រូវការ និង​ប្រភព​ទិន្នន័យ ពិសេស​ទាក់ទិន ការអប់រំ​សុខភាព និង​ការងារ​។​

​លោក អុ​ឹ​ង ឆាយ អភិបាលរង​ខេត្តកំពត បាន​មានប្រសាសន៍ ក្នុង​ពិធី​បើក​អង្គ សិក្ខាសាលា ថាៈ វគ្គ​សិក្សា​នេះ ពិត​ជាមាន​សារសំខាន់ ក្នុង​កិច្ច​រៀបចំ​យន្តការ ឧបករណ៍​ពិនិត្យ​តាមដាន និង​វាយតម្លៃ អំពី​ការអភិវឌ្ឍ​យុវជន​។ ទាំងនេះ ដើម្បី​ឆ្លើយតប​នឹង​ការផ្ដល់​អត្ថប្រយោជន៍ ចំពោះ​យុវជន ស្របតាម​គោល នយោបាយ​ជាតិ ស្ដីពី​ការអភិវឌ្ឍ​យុវជន​កម្ពុជា​៕.V​-PC