​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ បងប្អូន​ស្រី​ពីរ​នាក់​បាន​រៀបការ​ច្រឡំ​កូនកំលោះ​គ្នា​ដោយ​ចៃដន្យ នៅពេល​ការ​ដាច់​ចរន្ត​អគ្គិសនី​បណ្តាល​ងងឹតសូន្យ​សុង​ក្នុង​ពិធីមង្គលការ​រួមគ្នារ​បស់​ពួកគេ​។​

​ពិធីមង្គលការ​បាន​ធ្វើ​ឡើង​នៅក្នុង​ភូមិ​អា​ស្លា​ណា (Aslana) ក្នុង​រដ្ឋ​ម៉ា​ដ​យ៉ាប្រា​ដេស (Madhya Pradesh) ប្រទេស​ឥណ្ឌា​នៅពេល​ដែល​ការ​ដាច់​ចរន្ត​អគ្គិសនី​បង្ក​ឱ្យ​មាន​ភាពច្របូកច្របល់​​ក្នុង​ពិធីមង្គលការ​។​

​ក្នុងពេល​កំពុង​ច្របូកច្របល់ លោក​អាចារ្យ​បាន​បន្ត​ធ្វើ​ពិធី ប៉ុន្តែ​ចៃដន្យ​បាន​ច្រឡំ​គូស្នេហ៍​។​

​ឪពុក​របស់​កូនក្រមុំ​លោក រ៉ា​ម៉េស ឡាល់ (Ramesh Lal) បាន​និយាយថា អាចារ្យ​ប្រហែលជា​ភ័ន្តច្រឡំ ដោយសារ​ស្ត្រី​ទាំង​ពីរ​នាក់​នោះ​ស្លៀកពាក់​ពណ៌​ក្រហម​ជាមួយនឹង​ស្បៃ​គ្រប​មុខ​ដូចគ្នា​។​

​គេ​មិន​ច្បាស់​ទេ​ថា​តើ​បងប្អូន​ស្រី​ទាំងពីរ​បាន​ស្គាល់​បុរស​ដែល​ខ្លួន​កំពុង​រៀបការ​ឬ​អត់​។​

​វា​ជា​ទំនៀមទម្លាប់​មួយ​ដែល​បុរស​ឥណ្ឌា​ក៏​ពាក់​ស្បៃ​មុខ​ផ្កា​ដែរ​ពេល​រៀបការ​ជាមួយ​កូនក្រមុំ​។​

​ទោះបីជា​កំហុស​នេះ​ត្រូវ​បានកែតម្រូវ​នៅពេល​ក្រោយ​ក៏ដោយ ក៏​ប៉ុន្តែ​វា​បាន​បង្ហាញ​ពី​អត្រា​ដាច់​ភ្លើង​ញឹកញាប់​នៅក្នុង​ប្រទេស​ឥណ្ឌា ដោយសារ​តែ​ការកើនឡើង​នៃ​តម្រូវការ​ថាមពល​ចំ​ពេល​ប្រទេស​ជួប​អាកាសធាតុ​ក្តៅ​ខ្លាំង​៕