ដោយៈ​ប​ញ្ញា​សាស្ត្រ​/​ភ្នំពេញ​៖​លោក ស៊ុំ ស​ន្និ​សិទ្ធ ទេសាភិបាលរង ធនាគារជាតិ​នៃ​កម្ពុជា តំណាង​របស់លោក ជា ចាន់តូ ទេសាភិបាល​ធនាគារជាតិ​នៃ​កម្ពុជា បានអនុញ្ញាត​ឱ្យ​ក្រុម​បេសកកម្ម​មូលនិធិ​រូបិយវត្ថុ​អន្តរជាតិ (IMF)​ដែល​ដឹកនាំ​ដោយ លោក Alasdair Scott ប្រធាន​ក្រុម​បេសកកម្ម​របស់ IMF សម្រាប់​កម្ពុជា​ជួបពិភាក្សា​ការងារ​នៅ​ធនាគារជាតិ​នៃ​កម្ពុជា​។​ក្នុងឱកាស​នោះ​លោក​ជម្រាបជូន​ភ្ញៀវ​ថា “​កម្ពុជា​រំពឹងថា​នឹង​ទទួលបាន​កំណើនសេដ្ឋកិច្ច​រឹងមាំ​ក្នុង​អត្រា ៥,៣​ភាគរយ​”​នៅ​ឆ្នាំនេះ​។​

លោក ស៊ុំ ស​ន្និ​សិទ្ធ ទេសាភិបាលរង ធនាគារជាតិ​នៃ​កម្ពុជា តំណាង​របស់លោក ជា ចាន់តូ ទេសាភិបាល​ធនាគារជាតិ​នៃ​កម្ពុជា បានអនុញ្ញាត​ឱ្យ​ក្រុម​បេសកកម្ម​មូលនិធិ​រូបិយវត្ថុ​អន្តរជាតិ (IMF)​ដែល​ដឹកនាំ​ដោយ លោក Alasdair Scott ប្រធាន​ក្រុម​បេសកកម្ម​របស់ IMF សម្រាប់​កម្ពុជា​ជួបពិភាក្សា​ការងារ​នៅ​ធនាគារជាតិ​នៃ​កម្ពុជា​(រូបថត ធនានាគារជាតិ)

​គួរបញ្ជាក់​ឱ្យដឹង​ដែរ​ថា​ជា​រៀងរាល់ឆ្នាំ​ក្រុម​បេសកកម្ម​របស់​IMF​តែង​មក​បំពេញ​ទស្សនកិច្ច​នៅ​កម្ពុជា​ដើម្បី​តាមដាន​និង​វាយតម្លៃ នូវ​ការវិវត្ត​នៃ​ស្ថានភាព​សេដ្ឋកិច្ច និង​វិស័យ​ហិរញ្ញវត្ថុ​កម្ពុជា ប៉ុន្តែ​ត្រូវ​អាក់ខាន​ក្នុងអំឡុងពេល​នៃ​វិបត្តិ​ជំងឺ​កូ​វីដ​-១៩ ដោយ​កិច្ចការ​នានា​ត្រូវបាន​ធ្វើឡើង​តាមរយៈ​ប្រព័ន្ធ​អន​ឡាញ​ជំនួស​វិញ​។ ស្រប​ពេលដែល​ជំងឺ​កូ​វីដ​-១៩ នៅ​កម្ពុ​ជាមាន​សភាព​ធូរស្រាល និង​ការបើក​ប្រទេស​ឡើងវិញ ក្រុម​បេសកកម្ម​របស់ IMF នឹង​ជួបពិភាក្សា​ការងារ​ដោយផ្ទាល់​ជាមួយ​ក្រសួង​-​ស្ថាប័ន និង​នឹង​អាជ្ញាធរ​ពាក់ព័ន្ធ​ចាប់ពី​ថ្ងៃទី​៩ -១៦ ខែឧសភា ឆ្នាំ​២០២២​។​

ប្រភព​ធនាគារជាតិ​នៃ​កម្ពុជា​បានឱ្យដឹងថា ក្នុងជំនួប​កាលពី​ថ្ងៃ​ចន្ទ​កន្លងទៅនេះ​លោក​ទេសាភិបាលរង បាន​ជម្រាបជូន​ក្រុម​បេសកកម្ម​ថា ស្ថានភាព​ជំងឺ​កូ​វីដ​-១៩ មាន​ភាព ល្អប្រសើរ​ជា​លំដាប់ ដោយ​រាជរដ្ឋាភិបាល​បាន​ចាត់វិធានការ​គ្រប់គ្រង​បាន​ទាន់ពេលវេលា ជាពិសេស​ការចាក់​វ៉ាក់សាំង​បង្កា​ជំងឺ​កូ​វីដ​-១៩ ដល់​ប្រជាជន​បាន​ជាង ៩០% ព្រមទាំង​បានដាក់​ចេញ​នូវ​គោលនយោបាយ​គាំទ្រ​នានា ដើម្បី​ទ្រទ្រង់​ជីវភាព​ប្រជាជន​ដែល​ងាយ​រងគ្រោះ និង​គាំទ្រ​សកម្មភាព​សេដ្ឋកិច្ច​។ កត្តា​ទាំងនេះ​នឹង​ធ្វើឱ្យ​កម្ពុជា​សម្រេចបាន​អត្រាកំណើន​សេដ្ឋកិច្ច​ខ្ពស់ ដោយនៅ​ឆ្នាំ​២០២២​នេះ កម្ពុជា​រំពឹងថា​នឹង​ទទួលបាន​កំណើនសេដ្ឋកិច្ច​រឹងមាំ​ក្នុង​អត្រា ៥,៣​ភាគយ ដែល​គាំទ្រ​ដោយ​កំណើន​ក្នុង​វិស័យ កម្មន្តសាល (៩,៦%) វិស័យ​សំណង់ (១,២%) វិស័យ​កសិកម្ម (១,២%) និង​វិស័យ​ទេសចរណ៍​ដែល​ត្រូវបាន​រំពឹងថា​នឹងមាន​កំណើន​វិជ្ជមាន (៦%) បន្ទាប់ពី​ទទួលរង​ផលប៉ះពាល់​យ៉ាងខ្លាំង​កាលពី​២​ឆ្នាំមុន​។

​លោក​ទេសាភិបាលរង​បន្តថា អតិផរណា​រំពឹងថា​នឹង​កើនឡើង ៤​ភាគរយ ដោយសារ​កំណើន​ថ្លៃ​នៃ ម្ហូបអាហារ ប្រេងឥន្ធនៈ (​ឥទ្ធិពល​ពី​សង្គ្រាម​រុស្សី​-​អ៊ុយ​ក្រែ​ន​) និង​ថ្លៃ​ដឹកជញ្ជូន ស្រប​ពេលដែល មានការ​រអាក់រអួល​នៃ​ខ្សែ​ច្រវាក់​ផ្គត់ផ្គង់ និង​ការកើនឡើង​នៃ​តម្រូវការ​ក្នុងស្រុក​។ ដោយឡែក ប្រព័ន្ធ​ធនាគារ​នៅ​កម្ពុជា​បន្ត​មាន​ស្ថិរភាព និង​រក្សាបាន​នូវ​ភាព​ធន់ ព្រមទាំង​នៅតែ​បន្ត​ដើរតួនាទី​យ៉ាងសំខាន់​ក្នុងការ​ផ្តល់​ហិរញ្ញប្បទាន​ដើម្បី​ទ្រទ្រង់​កំណើនសេដ្ឋកិច្ច​។ គិត​ត្រឹម​ខែធ្នូ ឆ្នាំ​២០២១ ឥណទាន​គ្រឹះស្ថាន​ធនាគារ​មាន​កំណើន ២២,១​ភាគរយ ដោយបាន​បែងចែក​ទៅកាន់​វិស័យ​សំខាន់ៗ​នៃ​សេដ្ឋកិច្ច​។​
​លោក​ទេសាភិបាលរង ក៏បាន​ថ្លែងអំណរគុណ​ដល់ IMF ដែល​បាន​គាំទ្រ ធនាគារជាតិ​នៃ​កម្ពុជា តាមរយៈ ការបណ្តុះបណ្តាល និង​ការ​ផ្តល់ជំនួយ​បច្ចេកទេស ទាំង​រយៈពេល​ខ្លី​និង​វែង​។ ក្នុង​រយៈពេល​កន្លងមក ធនាគារជាតិ​នៃ​កម្ពុជា​បានទទួល​ជំនួយ​បច្ចេកទេស​លើ ការត្រួតពិនិត្យ​ប្រព័ន្ធ​ធនាគារ ស្ថិរភាព​ហិរញ្ញវត្ថុ និង​ផ្នែក​ពាក់ព័ន្ធ​មួយចំនួនទៀត​។​
​លោក​ទេសាភិបាលរង បាន​កោតសរសើរ​និង​វាយតម្លៃ​ខ្ពស់​ចំពោះ​លទ្ធផល​នៃ​ជំនួយ​បច្ចេកទេស​របស់ IMF កន្លងមក និង​បាន​ស្នើសុំ IMF បន្ត​ផ្តល់ជំនួយ​បច្ចេកទេស ដើម្បី​ពង្រឹងសមត្ថភាព​ស្ថាប័ន​និង​មន្ត្រី​ជំនាញ និង​ជួយ​តាមដាន​លើ​វឌ្ឍនភាព​និង​បញ្ហា​ប្រឈម​របស់​សេដ្ឋកិច្ចកម្ពុជា ដើម្បី​រួមចំណែក​បន្ត​ជំរុញ​កំណើន​ប្រកបដោយ​ចីរភាព​និង​បរិ​យា​ប័ន្ន​៕​សរន​

លោក ស៊ុំ ស​ន្និ​សិទ្ធ ទេសាភិបាលរង ធនាគារជាតិ​នៃ​កម្ពុជា តំណាង​របស់លោក ជា ចាន់តូ ទេសាភិបាល​ធនាគារជាតិ​នៃ​កម្ពុជា បានអនុញ្ញាត​ឱ្យ​ក្រុម​បេសកកម្ម​មូលនិធិ​រូបិយវត្ថុ​អន្តរជាតិ (IMF)​ដែល​ដឹកនាំ​ដោយ លោក Alasdair Scott ប្រធាន​ក្រុម​បេសកកម្ម​របស់ IMF សម្រាប់​កម្ពុជា​ជួបពិភាក្សា​ការងារ​នៅ​ធនាគារជាតិ​នៃ​កម្ពុជា​(រូបថត ធនានាគារជាតិ)