​ដោយៈ ដកស្រង់​ពី​វចនានុក្រម សម្តេច​សង្ឃរាជ ជួន ណាត​

​ដោយ​

​កិរិយាសព្ទ​

​ព្រម​តាម​, ប្រតិបត្តិ​តាម​
​កូន​នេះ​ដោយ​ដំបូន្មាន​ណាស់​, កូន​នោះ​មិន​ដោយ​ដំបូន្មាន​សោះ ។​
​ជាប់​តាម​, ជាប់​ទៅជា​មួយ​
​អ្នក​រើ​យក​អីវ៉ាន់​ទៅ ដោយ​ទាំង​សំពត់​ហូល​របស់ខ្ញុំ​មួយ​ទៅ​ផង ។​
​សេពមេថុនធម្ម​, ធ្វើ​សេវនកិច្ច​, រួម​សង្វាស​, រួម​ប្រវេណី​
​គោ​ដោយ​ញី​ឈ្មោល ។​
​ស្រឡាញ់​ស្នេហ៍ស្និទ្ធ​
​បង​ឯង​នេះ គ្មាន​ស្រី​ណា​គេ​ដោយ​ទេ !

​អាយតនិបាត​

​នឹង​; ពាក្យ​ប្រាប់​ដំណើរ​សម្រេច​នូវ​អំពើ​; សម្រាប់​ប្រើ​និយាយ​ភ្ជាប់​នាំមុខ​នាម​នាម​, ដូច​ពាក្យ​ថា​
​ធ្វើការ​ដោយ​ដៃ​, ដើរ​ដោយ​ជើង ។​ល​។​

​ដំឡើង​

​កិរិយាសព្ទ​

​ធ្វើ​ឲ្យ​ឡើង​, ធ្វើ​ឲ្យ​ខ្ពស់ជាង​មុន​, ធ្វើ​ឲ្យ​មាន​កម្លាំង​, ធ្វើ​ឲ្យ​ឃើញ​សម្បើម​
​ដំឡើងពន្ធដារ​, ដំឡើងថ្លៃ​អីវ៉ាន់​, ដំឡើងស្នា​, ដំឡើងគ្រូ​, ដំឡើងឫក​, ដំឡើង​ឫទ្ធិ ។​
​លើក​ផ្គុំ​រៀបចំ​តាម​លំនាំ​ស្រាប់​
​ដំឡើងរទេះ​, ដំឡើងរថយន្ត ។​

​គុណសព្ទ​

​ឈ្មោះ​រដូវ​ដែល​ទឹក​ឡើង​
​រដូវ​ដំឡើង​, ខែ​ដំឡើង ។​

​នាមសព្ទ​

​ឈ្មោះ​រដូវ​ដែល​ទឹក​ឡើង​
​រដូវ​ដំឡើង​, ខែ​ដំឡើង ។​

​តួ​

​នាមសព្ទ​

​រូប​, រាង​, សព៌ាង្គកាយ​, ខ្លួន​
​តួអក្សរ​, តួលេខ​, តួល្ខោន​, តួខ្លួន ។​
​ទាសៈ​, ទាសី ក៏​ហៅថា តួ បានដែរ​
​លោះ​តួ​ម្នាក់ (​ព​. បុ​.)​។​

​នាមសព្ទ​

(​ចិ​. តួ៎​) សំបុត្រ​; សំបុត្រ​អនុញ្ញាត​, សំបុត្រ​ប្រាប់​ទំនិញ​
​ផ្ញើ​តួ​ជាមួយនឹង​អីវ៉ាន់ ។​

​ទុក​

កិរិយាសព្ទ​

​ដាក់​វត្ថុ​អ្វី​ក្នុង​ទីណា​មួយ​ដើម្បី​ឲ្យ​គង់នៅ ឬ​រក្សា​អ្វីៗ​ឲ្យ​គង់​
​ទុកទ្រព្យ ។​
​បម្រុង​ឲ្យ​, ផ្គង​ឲ្យ​
​ទុក​បាយ​ឲ្យ​, ទុក​ប្រាក់​ឲ្យ ។​
​ទុកដាក់ ទុក​អីវ៉ាន់​មាន​របៀប​, ទុក​ដោយ​ប្រយ័ត្ន ។ ទុកដាក់​កូនចៅ រៀបចំ​ឲ្យ​កូន​ឬ​ចៅ​មានគូស្រករ ។ ព​. ទ​. បុ​. ថា​
​ធ្វើស្រែ​មើល​ស្មៅ ទុកដាក់​កូនចៅ​មើលផៅសន្ដាន (​មាន​អត្ថន័យ​រាក់​ដែរ​ទេ​) ។​មួយ​យ៉ាង​ថា : ទុកដាក់​កូនចៅ ត្រូវ​ពិនិត្យ​ផៅ​ពង្ស​; មួយ​យ៉ាង​ទៀតថា : មុននឹង​ទុកដាក់​កូន ត្រូវ​សួរ​បងប្អូន​និង​ចិត្ត​កូន​សិន (​នេះ​ក៏មាន​អត្ថន័យ​រាក់ៗ​ដែរ ) ។ យកចិត្តទុកដាក់ ផ្ចង់ចិត្ត​ប្រុងប្រយ័ត្ន​ជានិច្ច ។​

​ទូទាត់​

​កិរិយាសព្ទ​

​ផាត់ទាត់​កាត់កង​ឲ្យ​រួច​លែង​ទាក់ទិន​គ្នា​ទៅវិញទៅមក​
​ខ្ញុំ​បាន​យក​អីវ៉ាន់​អ្នក​ពី​ថ្ងៃមុន​មិនទាន់​សង​តម្លៃ​នៅឡើយ​, ឥឡូវនេះ យើង​ទូទាត់​គ្នា​ឲ្យ​ជ្រះស្រឡះ​ទៅ ។​