​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ វា​មាន​រយៈពេល​ពីរ​បី​សប្តាហ៍​ហើយ​ចាប់តាំងពី​ហ្វូង​មនុស្ស​ចាយ​លុយ​អេឡិចត្រូនិក (Crypto)​ធ្វើ​ពិធី​ជប់លៀង​នៅ​ម៉ៃ​អា​មី​។​

​ស្ថាបនិក​ក្រុមហ៊ុន Coinbase Global លោក ប្រាយ​អែន អាម​ស្ត្រង (Brian Armstrong) មាន​ទ្រព្យសម្បត្តិ​ផ្ទាល់ខ្លួន​ចំនួន ១៣,៧ ពាន់​លាន​ដុល្លារ​អាម៉េរិក​កាលពី​ខែវិច្ឆិកា និង​ប្រហែល ៨ ពាន់​លាន​ដុល្លារ​អាម៉េរិក​នៅ​ចុង​ខែ​មីនា​។ យោង​តាម​ស​ន្ទ​ស្សន៍​មហាសេដ្ឋី Bloomberg ឥឡូវ​នេះ​វា​នៅសល់តែ ២,៣ ពាន់​លាន​ដុល្លារ​អាម៉េរិក​ប៉ុណ្ណោះ បន្ទាប់​ពី​ការលក់​រូបិយប័ណ្ណ​ឌីជីថល​ពី Bitcoin ទៅ Ether បាន​បង្ក​ឱ្យ​មាន​ការធ្លាក់​ចុះ​យ៉ាងខ្លាំង​នៃ​តម្លៃ​ទីផ្សារ​ក្រុមហ៊ុន Coinbase ដែល​ជា​ទីផ្សារ​ប្តូរ​រូបិយប័ណ្ណ​ឌីជីថល​ធំ​បំផុត​របស់​សហរដ្ឋ​អាម៉េរិក​។​

​ភាគហ៊ុន​របស់​ក្រុមហ៊ុន​បាន​ធ្លាក់ចុះ​ជិត ៨៦ ភាគរយ​ចាប់តាំងពី​ការលក់​ហ៊ុន​ជា​សាធារណៈ​លើក​ដំបូង​ក្នុង​ខែ​មេសា ២០២១ របស់​ពួកគេ​រហូត​ដល់​ថ្ងៃ​ពុធ​ទី​១១ ឧសភា​ឆ្នាំ​២០២២​បន្ទាប់ពី​ក្រុមហ៊ុន​បាន​​ព្រមាន​ថា បរិមាណ​ជួញដូរ​និង​អ្នកប្រើប្រាស់​ប្រតិបត្តិការ​ប្រចាំខែ​ត្រូវបាន​រំពឹងថា​នឹង​មាន​ទាប​នៅក្នុង​ត្រីមាស​ទី​ពីរ​ជាង​ត្រីមាស​ទីមួយ​។​

​វា​បាន​ចោទ​ជា​សំណួរ​អំពី​សមត្ថភាព​របស់​ក្រុមហ៊ុន Coinbase ក្នុងការ​ទប់ទល់​នឹង​ការធ្លាក់​ចុះ​យ៉ាងខ្លាំង​នៃ​តម្លៃ​លុយ Crypto ដោយ​បង្ខំ​ឱ្យ​លោក​អាម​ស្ត្រង​ចូលទៅ Twitter​ដើម្បី​ការពារ​ក្រុម​​ហ៊ុន​។ លោក​អាម​ស្ត្រង ជា​នាយក​ប្រតិបត្តិ​របស់​ក្រុមហ៊ុន​បាន​និយាយថា “​មិន​មាន​ហានិភ័យ​នៃ​ការ​ក្ស័យធន​ទេ​” សូម្បី​ចំពេល​មាន​ព្រឹត្តិការណ៍ “​ក្ងាន​ខ្មៅ​”​ហើយ​មូលនិធិ​របស់​អ្នកប្រើប្រាស់​គឺ​មាន​សុវត្ថិ​​ភាព​។​

​បន្ទាប់មក​គឺ​មាន​លោក​ម៉ៃ​ឃើ​ល ណូវ៉ូ​ហ្គ្រា​ត​ស៍ (Michael Novogratz)​។ នាយក​ប្រតិបត្តិ​នៃ​ធនាគារ Galaxy Digital រូបនេះ​បាន​ឃើញ​ទ្រព្យសម្បត្តិ​របស់​គាត់​ធ្លាក់ចុះ​មក​នៅត្រឹម ២,៩ ពាន់​លាន​ដុល្លារ​ពី ៨,៥ ពាន់​លាន​ដុល្លារ​នៅ​ដើម​ខែ​វិច្ឆិកា​។ គាត់​បាន​ក្លាយជា​អ្នកការពារ​លុយ​អេឡិចត្រូនិក TerraUSD​ដែល​ឥឡូវ​មាន​ហានិភ័យ​នៃ​ការដួលរលំ​ទាំងស្រុង​ចំពេល​មាន​ការធ្លាក់​ចុះ​តម្លៃ​​លុយ​អេឡិចត្រូនិក​នៅក្នុង​ប្រព័ន្ធ​អេកូ​ដូចគ្នា គឺ Luna ។​

​លោក​ណូវ៉ូ​ហ្គ្រា​ត​ស៍​បាន​និយាយ​នៅ​ឯ​សន្និសីទ Bitcoin 2022 នៅ​ម៉ៃ​អា​មី​កាលពី​ថ្ងៃទី ៦ ខែ​មេសា​ថា “​ខ្ញុំ​ប្រហែល​ជា​បុរស​តែ​ម្នាក់​គត់​នៅ​ក្នុង​ពិភពលោក​ដែល​មាន​ទាំង​រូបសាក់ Bitcoin និង Luna”​។​

​ទ្រព្យសម្បត្តិ​របស់​មហា​សេដ្ឋី​លុយ​អេឡិចត្រូនិក ដែល​កើនឡើង​ក្នុង​រយៈពេល​ពីរ​ឆ្នាំ​ចុងក្រោយ​នេះ កំពុង​បាត់​ទៅ​វិញ​យ៉ាង​លឿន​បន្ទាប់ពី​ការលក់​ចេញ​ដែល​បាន​ចាប់ផ្តើម​ពេល​ដែល​ភាគហ៊ុន​បច្ចេកវិជ្ជា​​បាន​ហក់​ចូលទៅ​ក្នុង​លុយ​ឌីជីថល​។ Bitcoin ដែល​ជា​រូបិយប័ណ្ណ​ឌីជីថល​ដ៏​ពេញនិយម​បំផុត និង Ether បាន​ធ្លាក់ចុះ​ជាង ៥០ ភាគរយ​ចាប់តាំងពី​ឡើងថ្លៃ​ខ្ពស់​មិន​ធ្លាប់​មាន​កាលពី​ចុងឆ្នាំ​មុន​៕

​ស្ថាបនិក​ក្រុមហ៊ុន Coinbase Global លោក ប្រាយ​អែន អាម​ស្ត្រង (​ឆ្វេង​) និង​នាយក​ប្រតិបត្តិ​ក្រុមហ៊ុន Binance លោក ចា​វ ចាង​ផឹង (Zhao Changpeng) ទាំង​ពីរ​នាក់​បាន​រាយ​ការណ៍​ពី​ការខាតបង់​ទ្រព្យសម្បត្តិ​ផ្ទាល់​ខ្លួន​យ៉ាងច្រើន​