ដោយៈ សុ​ផានី​តា / កោះកុង​៖ អ្នកឧកញ៉ា គិត ម៉េង ប្រធាន​ក្រុមប្រឹក្សាភិបាល ក្រុមហ៊ុន រ៉ូយ៉ាល់​គ្រុប (Royal GROUP co.Ltd) បរិច្ចាគ​ថវិកា ២០.០០០ ដុល្លារ ជូន​ដល់​សាខា​កាកបាទក្រហមកម្ពុជា ខេត្តកោះកុង ដើម្បី​អបអរ​សារ​ទរ​ទិវា ពិភពលោក កាកបាទក្រហម អឌ្ឍចន្ទ​ក្រហម ៨ ឧសភា ២០២២ ។​

​តាមរយៈ លោក ម៉ៅ លី​ណា តំណាង​អ្នកឧកញ៉ា គិត ម៉េង និង​លោកស្រី ម៉ៅ ចំណាន បាន​នាំយក​ថវិកា​នេះ ជូន​សាខា​កាកបាទក្រហមកម្ពុជា ខេត្តកោះកុង ដើម្បី​ចូលរួម​ការងារ មនុស្សធម៌ នៅក្នុង​ខេត្ត ដើម្បី​ជួយសង្គ្រោះ ដោះស្រាយ ដល់​ប្រជាពលរដ្ឋ​ងាយ​រងគ្រោះ និង​ជួប​ការលំបាក ឬ​គ្រោះមហន្តរាយ​ផ្សេងៗ​។​

​លោក ម៉ៅ លី​ណា បានឱ្យដឹងថា រូបលោក ពិតជា​រីករាយ​យ៉ាងខ្លាំង រាល់​សកម្មភាព​របស់ ក្រុមការងារ សាខា​កាកបាទក្រហមកម្ពុជា ខេត្តកោះកុង ក្នុងការ​ចុះជួយ​សង្គ្រោះ ប្រជាពលរដ្ឋ គ្រា​ជួប​ទុក្ខលំបាក ដោយ​មិន​ប្រកាន់ និន្នាការ​នយោបាយ ទាំង​កន្លងទៅ ក៏ដូចជា​បច្ចុប្បន្ន​។​

​បន្ទាប់ពី​បានទទួល​ថវិកា លោកស្រី មិថុនា ភូ​ថង ប្រធាន​គណៈកម្មាធិការ សាខា​កាកបាទក្រហមកម្ពុជា ខេត្តកោះកុង បាន​សន្យាថា សាខា​កាកបាទ ក្រហម​ខេត្ត នឹង​ប្រើប្រាស់​អំណោយ និង​ថវិកា ដែល​ទទួលបាន​ពី អ្នកឧកញ៉ា គិត ម៉េង និង​សប្បុរសជន​ទាំងអស់ ឲ្យ​ចំ​គោលដៅ និង​ទៅ​ដល់ដៃ​ប្រជាពលរដ្ឋ​ក្រីក្រ ជួប​ការលំបាក ជន​ងាយ​រងគ្រោះ និង​ជួប​គ្រោះមហន្តរាយ​ផ្សេងៗ ដោយ​ពិត ប្រាកដ​។​

​លោកស្រី មិថុនា ភូ​ថង សម្តែង​នូវ​អំណ​អរគុណ យ៉ាង​ជ្រោ​ល​ជ្រៅ ជូន​ចំពោះ អ្នកឧកញ៉ា គិត ម៉េង និង​លោកស្រី ដែល​បាន​ចំណាយ​ថវិកា​ដ៏​ថ្លៃថ្លា ចូលរួម ជាមួយ សាខា​កាកបាទក្រហមកម្ពុជា ខេត្តកោះកុង ក្នុង​គោលដៅ​បន្ត​ផ្តល់​សេវា កម្ម​មនុស្សធម៌ ដែលមាន​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ជា​ប្រធាន កាកបាទក្រហមកម្ពុជា ដោះស្រាយ​បញ្ហា​ប្រឈម​នានា បន្ត​ពង្រឹង​ភាព​ធន់ សហគមន៍ និង​ជួយ​សម្រាល​ទុក្ខលំបាក របស់​ប្រជាពលរដ្ឋ​រងគ្រោះ និង​ងាយ រងគ្រោះ​បំផុត តាម​គោលការណ៍​គ្រឹះ​របស់ ចលនា​អន្តរជាតិ កាកបាទក្រហម និង​អឌ្ឍចន្ទ​ក្រហម​៕/V​-PC