​ប្រែ​សម្រួលៈ​បំណង​(ST)៖ អង់គ្លេស​កាលពី​ថ្ងៃ​សុក្រ​ទី​១៣​ឧសភា​បាន​ដាក់​ទណ្ឌកម្ម​លើ​សមាជិក​១២​នាក់​នៃ​រង្វង់​គ្រួសារ​របស់​មេដឹកនាំ​រុស្ស៊ី វ្ល៉ា​ឌី​មៀ ពូ​ទីន រួមមាន​មិត្តស្រី​របស់​លោក​ម្នាក់ ដោយ​ចោទប្រកាន់​​ពួកគេ​ថា​លាក់​ទុក​លុយ​រាប់​ពាន់​លាន​ដុល្លារ​ជំនួស​អោយ​លោក​។​

​នាង​កា​បា​អ៊ី​វ៉ា ដែល​ត្រូវ​បាន​រដ្ឋាភិបាល​លោកខាងលិច​អះអាងថា​មាន​កូន​បី​នាក់​ជាមួយ​ពូ​ទីន រង​ទណ្ឌកម្ម​ពី​អង់គ្លេស​

​ក្នុង​បញ្ជី​ទណ្ឌកម្ម​រួមមាន អតីត​ភរិយា​របស់​ពូ​ទីន លោកស្រី​លូត​មី​ឡា អូ​សេ​រេ​ត​ណា​យ៉ា​(Lyudmila Ocheretnaya )​និង​នាង​អា​លី​ណា កា​បា​អ៊ី​វ៉ា​(Alina Kabaeva) អតីត​អត្ត​ពលលិក​អូឡាំពិច​​ម្នាក់​ដែល​ពួក​មន្ត្រី​អង់គ្លេស​ពណ៌នា​ថា​ជា​«​ដៃគូ​ស្នេហ៍​បច្ចុប្បន្ន​»​របស់​ពូ​ទីន ព្រម​ទាំង​ម្តាយ​របស់​នាង​កា​បា​អ៊ី​វ៉ា​លោកស្រី អាន់​ណា ហ្សា​ត​សេប​លី​ណា​(Anna Zatseplina)​។​

​សហភាព​អឺរ៉ុប​ក៏​បាន​ស្នើ​ដាក់​ទណ្ឌកម្ម​លើ​នាង កា​បា​អ៊ី​វ៉ា ដែល​ត្រូវ​បាន​រដ្ឋាភិបាល​លោកខាងលិច​អះអាងថា​មានកូន​យ៉ាងតិច​បី​នាក់​ជាមួយ​ពូ​ទីន​។​

​ទោះជា​សហភាព​អឺរ៉ុប​និង​អង់គ្លេស​ចាត់ការ ក៏​រដ្ឋាភិបាល​អាម៉េរិក​មិន​បាន​ផ្តោត​ការវាយប្រហារ​លើ​នាង កា​បា​អ៊ី​វ៉ា ដោយ​ទំនង​ខ្លាច​ថា​វា​នឹង​កាន់តែ​ធ្វើអោយមាន​អារិភាព​កាន់តែ​អាក្រក់​ទៅ​ជាមួយ​លោក​​ពូ​ទីន នេះ​បើ​តាម​របាយការណ៍​ក្នុង​សារព៍ត៌មាន​អាម៉េរិក the Wall Street Journal​។​

​រដ្ឋមន្ត្រីការបរទេស​អង់គ្លេស​លោកស្រី លីហ្ស៍ ត្រាស់ បាន​និយាយ​នៅក្នុង​សេចក្តីថ្លែងការណ៍​មួយ​ថា «​យើង​ស្វែងរក​និង​ផ្តោត​លើ​បណ្តាញសម្ងាត់​របស់​ពូ​ទីន​ដើម្បី​បង្ហាញអោយឃើញ​ជីវិត​ប្រកប​ដោយ​ប្រណិត​​ភាព​របស់​គាត់​ហើយ​រឹតបន្តឹង​ពួក​រង្វង់​ផ្ទៃក្នុង​របស់​គាត់​។​យើង​នឹង​បន្ត​ដាក់ទណ្ឌកម្ម​លើ​អ្នក​ដែល​ជួយ​និង​សមគំនិត​នឹង​ផែនការ​ឈ្លានពាន​របស់​ពូ​ទីន រហូត​ដល់​អ៊ុយ​ក្រែន​ត្រូវ​បាន​រំដោះ​»​។​

​សេចក្តីថ្លែងការណ៍​របស់​អង់គ្លេស​បាន​និយាយថា ប្រាក់ខែ​និង​ទ្រព្យសម្បត្តិ​ផ្លូវការ​របស់​មេដឹកនាំ​រុស្ស៊ី​រូប​នេះ​ខុស​គ្នា​នឹង​របាយការណ៍​សារព័ត៌មាន​ដែល​បាន​ភ្ជាប់​រូប​លោក​ទៅ​នឹង​ទ្រព្យសម្បត្តិ​ពាសវាល​​ដែល​គេ​ហៅថា​”​វិមាន​របស់​ពូ​ទីន​” ។​«​តាមពិត​ទ្រព្យសម្បត្តិ​របស់​គាត់​បង្កប់ទុក​ក្នុង​បណ្តាញគ្រួសារ​មួយ មិត្ត​ភ័ក្តិ​កាលពី​ក្មេង​និង​សមាជិក​ឥស្សរជន​រុស្ស៊ី​ដែល​ត្រូវបាន​តែងតាំង​អោយ​កាន់​មុខតំណែង​​មាន​ឥទ្ធិពល ជា​ថ្នូរ​នឹង​ភាពស្មោះត្រង់​ឥត​ងាករេ​របស់​គេ​»​។​

​មន្ត្រី​អង់គ្លេស​បាន​និយាយថា នាង អា​លី​ណា កា​បា​អ៊ី​វ៉ា ជា​ប្រធាន​ក្រុម​ប្រព័ន្ធ​ផ្សព្វផ្សាយ​ជាតិ​រុស្ស៊ី​។​ធនាគារ​រ៉ូស៊ី​យ៉ា​(Rossiya)​របស់​រុស្ស៊ី មាន​ភាគហ៊ុន​មួយ​ភាគបី​នៃ​ក្រុម​សារព័ត៌មាន​នេះ​និង​ជា​«​បណ្តាញ​​ជាក់​ច្បាស់​»​មួយ​សំរាប់​លុយ​របស់​ពូ​ទីន​។​

​លោក​អ៊ី​ហ្គ័​រ ពូ​ទីន និង លោក​រ៉ូ​ម៉ាន ពូ​ទីន ដែលជា​ជីដូនមួយ​របស់​មេដឹកនាំ​រុស្ស៊ី ហើយ​នឹង​លោក អា​ឡេស​ង់​ឌ័​រ ផ្លេ​ខូវ​(Alexander Plekhov)​ដែល​ជា​មិត្ត​ជិតដិត​របស់​ពូ​ទីន និង​ជា​ប្រធាន​ក្រុមហ៊ុន​Vital Development Corp​ក៏​ស្ថិត​ក្រោម​ទណ្ឌកម្ម​របស់​អង់គ្លេស​។​

​អង់គ្លេស​បាន​និយាយថា ខ្លួន​ឥឡូវ​ដាក់​ទណ្ឌកម្ម​លើ​បុគ្គល​រុស្ស៊ី​ជាង​១.០០០​នាក់ និង​អង្គភាព​ប្រមាណ​១០០ រួម​មាន​ពួក​មហាសេដ្ឋី​ជាមួយនឹង​ទ្រព្យ​ជាង​១៤០​ពាន់​លាន​ដុល្លារ ចាប់តាំងពី​ពូ​ទីន​បញ្ជា​ទ័ព​ចូល​​ឈ្លានពាន​អ៊ុយ​ក្រែន​កាលពី​ចុងខែ​កុម្ភៈ​មក​៕