​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ មនុស្ស​រាប់ពាន់​នាក់​ប្រមូលផ្តុំ​ពេញ​ទីក្រុង​ចាស់ (Old City)​នៃ​ទីក្រុង​ហ្ស៊េ​រុយ​សាឡិម​កាលពី​ថ្ងៃ​សុក្រ​ទី​១៣​ឧសភា​សម្រាប់​ការ​បញ្ចុះសព​អ្នកយក​ព័ត៌មាន​​ជើងចាស់​របស់​ទូរទស្សន៍ Al Jazeera គឺ​លោកស្រី ស៊ី​រី​ន អា​ប៊ូ អា​ក់ឡេ​ក (Shireen Abu Akleh) បន្ទាប់ពី​ប៉ូលិស​អ៊ីស្រាអែល​បង្ក្រាប​ការចាប់ផ្តើម​នៃ​ពិធី​បុណ្យសព​។​

​រូបភាព​តាម​ទូរទស្សន៍​បាន​បង្ហាញ​អ្នក​លី​ក្តារ​មឈូស​ពិបាក​ទប់​មឈូស​របស់​លោកស្រី​អា​ប៊ូ​អា​ក់ឡេ​ក​កុំឱ្យ​រអិល​ធ្លាក់​ដល់​ដី​ខណៈ​ប៉ូលិស​ប្រដាប់​ដោយ​ដំបង​បាន​វាយ​លើ​ពួកគេ​និង​ចាប់​ទាញ​យក​​ទង់ជាតិ​ប៉ាឡេ​ស្ទីន​ពី​អ្នក​កាន់ទុក្ខ​។​

​ទីក្រុង​វ៉ាស៊ីនតោន​បាន​និយាយថា ខ្លួន “​រង​ការរំខាន​យ៉ាងខ្លាំង​” ដោយ​ឈុត​ឆាក​របៀបនេះ ខណៈ​សហភាព​អឺរ៉ុប​និយាយថា ខ្លួន​តក់ស្លុត​ចំពោះ​ការប្រើ​កម្លាំង​មិនចាំបាច់​។​

​អឌ្ឍចន្ទ​ក្រហម​ក្រុង​ហ្ស៊េ​រុយ​សាឡិម​និយាយថា មនុស្ស ៣៣ នាក់​បាន​រងរបួស​ក្នុងអំឡុងពេល​ដង្ហែ​សព ដែល​ក្នុងនោះ​ប្រាំមួយ​នាក់​ត្រូវបាន​បញ្ជូន​ទៅ​មន្ទីរពេទ្យ ហើយ​ប៉ូលិស​អ៊ីស្រាអែល​បាន​និយាយថា ពួកគេ​បាន​ចាប់ខ្លួន​មនុស្ស​ប្រាំមួយ​នាក់​។ មន្ត្រី​រដ្ឋាភិបាល​ម្នាក់​បាន​និយាយថា អ្នក​កាន់​ទុក្ខ​បាន​គប់​ដុំថ្ម​និង​ដប​កែវ​។​

​នៅ​តំបន់​កាន់កាប់​វេស​ប៊ែង កង​កុម្មង់ដូ​អ៊ីស្រាអែល​ម្នាក់​ត្រូវបាន​សម្លាប់​ក្នុងអំឡុង​ការបាញ់ប្រហារ​ថ្មី​ជាមួយ​ខ្មាន់កាំភ្លើង​ប៉ាឡេ​ស្ទីន​នៅ​ជិត​ទីក្រុង​ជេ​នី​ន (Jenin)​។ ក្រុម​ជី​ហាត​អ៊ីស្លាម​បាន​និយាយថា អ្នក​ប្រយុទ្ធ​របស់ខ្លួន​ជា​អ្នកទទួលខុសត្រូវ​។​

​អ៊ីស្រាអែល​និង​ប៉ាឡេ​ស្ទីន​បាន​ធ្វើ​ការស្តីបន្ទោស​គ្នា​ចំពោះ​ការបាញ់​សម្លាប់​លោក​ស្រី​អា​ប៊ូ​អា​ក់ឡេ​ក​ក្នុងអំឡុង​ការ​វាយ​ឆ្ម​ក់​របស់​អ៊ីស្រាអែល​នៅ​ទីក្រុង​ជេនី​ន​កាលពី​ថ្ងៃ​ពុធ​។​

​កងទ័ព​អ៊ីស្រាអែល​បាន​និយាយថា ការស៊ើបអង្កេត​បណ្តោះអាសន្ន​មួយ​មិន​អាច​កំណត់​ថា​អ្នកណា​ជា​អ្នកបាញ់​គ្រាប់កាំភ្លើង​ដ៏​ប្រល័យ​មួយ​នេះ​ទេ​ដោយ​កត់សម្គាល់ថា​ការបាញ់​កាំភ្លើង​គ្មាន​ទិស​​ដៅ​របស់​ប៉ាឡេ​ស្ទី​ន​ឬ​ការបាញ់កាំ​ភ្លើងរបស់​អ៊ីស្រាអែល​សំដៅ​ទៅលើ​ពួក​សកម្មប្រយុទ្ធ​គឺ​ទំនង​ជា​មូលហេតុ​បណ្តាលឱ្យ​ស្លាប់​អ្នកកាសែត​៕

អំពើហិង្សា​ផ្ទុះ​ឡើង​រវាង​ប៉ូលិស​អ៊ីស្រាអែល​និង​អ្នកចូលរួម​កាន់ទុក្ខ​អ្នកកាសែត Al Jazeera គឺ​លោកស្រី ស៊ី​រី​ន អា​ប៊ូ អា​ក់ឡេ​ក កាលពី​ថ្ងៃ​សុក្រ