​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ការខ្លាច​ខ្ពស់​គឺ​ជា​អារម្មណ៍​កើតមាន​ខ្លះៗ ខណៈ​អ្នកទេសចរ​ដំបូង​គេ​បាន​ដើរ​លើ​ស្ពាន​យោល​ថ្មើរជើង​វែង​បំផុត​របស់​ពិភពលោក​ដែល​លាតសន្ធឹង​លើ​ជ្រលង​ភ្នំ​​ក្នុង​សាធារណរដ្ឋ​ឆែក​។​

​ខណៈ​ដើរចូល​ទៅ​ជិត​ស្ពាន​ប្រវែង ៧២១ ម៉ែត្រ ដែល​ព្យួ​រលើ​មេឃ​កម្ពស់ ៩៥ ម៉ែត្រ​នៅ​ចំណុច​ខ្ពស់​បំផុត​របស់​វា​និង​បើក​ជា​សាធារណៈ​កាលពី​ថ្ងៃ​សុក្រ​ទី​១៣ ឧសភា អ្នក​ឡើង​ភ្នំ​ឈ្មោះ មី​ឃែ​ឡា ក្លេ​ស្ទីឡូ​វ៉ា (Michaela Klestilova) បាន​និយាយថា “​យើង​មក​ទី​នេះ​ព្រោះ​យើង​ចូល​ចិត្ត​ក្តីរំភើប​នៅ​ទី​ខ្ពស់​”​។​

“​យើង​មក​ទី​នេះ​ដោយ​ថ្មើរជើង ហើយ​ឥឡូវ​យើង​កំពុង​ស្វែងរក​រង្វាន់​តបស្នង​របស់​យើង​”​។​

​មានឈ្មោះ​ថា Sky Bridge 721 វា​ត្រូវ​បាន​សាងសង់​ពីរ​ឆ្នាំ​ក្នុងតម្លៃ ២០០ លាន​ក្រោន (៨,៤១ លាន​ដុល្លារ​) ហើយ​ត្រូវបាន​ព្យួរ​ដោយ​ខ្សែកាប​ជំនួយ​សំខាន់ៗ​ចំនួន ៦ និង​ខ្សែពួរ​ចំនួន ៦០ ។​

​វា​ស្ថិត​នៅ​កម្ពស់​ជាង ១.១០០ ម៉ែត្រ​ពី​លើ​នីវ៉ូ​ទឹកសមុទ្រ និង​ត​ភ្ជាប់​ជួរ​ភ្នំ​ពីរ​នៅក្នុង​តំបន់​ភាគ​ឦសាន​របស់​ប្រទេស ដែល​មាន​ចម្ងាយ ២០០ គីឡូម៉ែត្រ​ពី​ទីក្រុង​ប្រាក និង​នៅ​ជិត​ព្រំដែន​ជាមួយ​ប្រទេស​ប៉ូឡូញ​។​

​ស្ពាន​នេះ​គឺ​វែង​ជាង​ស្ពាន Arouca ប្រវែង ៥១៦ ម៉ែត្រ​ក្នុងប្រទេស​ព័រ​ទុយ​ហ្គាល់ ដែល​ពីមុន​ជា​ស្ពាន​យោល​ព្យួរ​វែង​ជាង​គេ​លើ​លោក​៕

 

​ស្ពាន​យោល Sky Bridge 721 ត្រូវបាន​សាងសង់​ពីរ​ឆ្នាំ​ក្នុងតម្លៃ ៨,៤១ លាន​ដុល្លារ