​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ វា​ប្រហែល​មិនមែន​ជា​ផ្ទាំងគំនូរ Matisse ឬ​ផ្ទាំងគំនូរ Warhol​ទេ ប៉ុន្តែ​ការលក់​តម្លៃ​រាប់​លាន​ដុល្លារ​នៅ​ក្រុមហ៊ុន Christie’s​កើត​ចេញ​មក​ពី​ស្នាដៃ​​វិចិត្រករ​ប្រភេទ​ផ្សេង គឺ មាតា​ធម្មជាតិ​។​

​កាលពី​យប់​ថ្ងៃ​ព្រហស្បតិ៍​ទី ១២ ឧសភា ក្រុមហ៊ុន Christie’s បាន​លក់​គ្រោងឆ្អឹង​ពូជ​ដាយ​ណូ​ស័រ Deinonychus Antirrhopus​ដែល​ជា​ប្រភេទ​សត្វ​ដាយ​ណូ​ស័រ​គេ​ស្គាល់​បំផុត​លើ​ពិភព​​លោក​បន្ទាប់ពី​ការចេញផ្សាយ​ភាពយន្ត Jurassic Park ក្នុងតម្លៃ ១២,៤ លាន​ដុល្លារ​បូក​ជាមួយនឹង​ថ្លៃ​សេវា ទៅកាន់​អ្នកទិញ​មិន​បញ្ចេញ​ឈ្មោះ​ម្នាក់​។​

​ការដេញថ្លៃ​ហ្វូ​ស៊ីល​ដែល​មាន​តម្លៃ​ខ្ពស់​កំពុងមាន​និន្នាការ​កើនឡើង ជា​ទម្រង់​មួយ​ដែល​ធ្វើឱ្យ​អ្នកស្រាវជ្រាវ​ផ្នែក​បុរាណវិទ្យា​មួយចំនួន​មានការ​ខឹងសម្បា និង​បារម្ភ​ថា​សំណាក​ដាយ​ណូស័​រអាច​នឹងបាត់​បង់​ពី​ផ្នែក​វិទ្យាសាស្ត្រ ប្រសិនបើ​ពួកវា​ត្រូវបាន​ទិញ​ដោយ​បុគ្គល​ឯកជន​ជា​ជាង​ស្ថាប័ន​សាធារណៈ​។​

​ក្រុមហ៊ុន​ដេញថ្លៃ Christie’s បាន​និយាយថា ហ្វូ​ស៊ីល ដែល​មាន​រហស្សនាម​ថា Hector គឺជា​ការលក់​ជា​សាធារណៈ​លើកដំបូង​នៃ​ដាយ​ណូ​ស័រ​ពូជ Deinonychus​ដែល​គេ​ស្គាល់​ចំពោះ​ក្រ​ញ៉ាំ​ជើង​​គ្រោះថ្នាក់​របស់​វា​។ តម្លៃ​លក់​គឺ​ខ្ពស់ជាង​ទ្វេដង​នៃ​តម្លៃ​ដែល​ក្រុមហ៊ុន​ប៉ាន់ប្រមាណ​ចំនួន​៦​លាន​ដុល្លារ​។​

​ប្រភេទ​សត្វ​ដាយ​ណូ​ស័រ​ភាគច្រើន​ទំនងជា​មិន​ទទួលបាន​ការចាប់អារម្មណ៍​ច្រើន​ទេ បើ​មិន​មែន​ដោយសារ​ភាពយន្ត Jurassic Park​។ នៅក្នុង​រឿង​ប្រលោមលោក​និង​ភាពយន្ត​ឆ្នាំ ១៩៩៣ នេះ សត្វ​ដាយ​ណូ​ស័រ​ហៅថា Velociraptor គឺ​ពិតជា​ដូច​ដាយ​ណូ​ស័រ Deinonychus​។

​ក្រុមហ៊ុន​ដេញថ្លៃ​បាន​និយាយថា សំណាក​គ្រោងឆ្អឹង​នេះ​មាន​ឆ្អឹង​ពិត​ចំនួន ១២៦ ប៉ុន្តែ​នៅ​សេសសល់​ទៀត​ត្រូវបាន​សាងសង់​ឡើង​វិញ រួម​ទាំង​លលាដ៍ក្បាល​ភាគ​ច្រើន​ផង​ដែរ​៕

គ្រោងឆ្អឹង​ដាយ​ណូ​ស័រ Hector