​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ អាស៊ី​ខាងត្បូង​បាន​ស្ថិត​ក្នុង​រលក​កម្តៅ​ខ្លាំង​កាលពី​ថ្ងៃ​សុក្រ ទី​១៣ ឧសភា ដោយ​ផ្នែក​ខ្លះ​នៃ​ប្រទេស​ប៉ា​គី​ស្ថាន​បាន​ក្តៅ​ឡើងដល់ ៥០ អង្សា​សេ​ខណៈ​មន្ត្រី​ព្រមាន​​អំពី​ការខ្វះខាត​ទឹក​ធ្ងន់ធ្ងរ​និង​ការគំរាមកំហែង​ដល់​សុខភាព​។​

​ផ្នែក​ភាគច្រើន​នៃ​ប្រទេស​ប៉ា​គី​ស្ថាន​និង​ប្រទេសជិតខាង​ឥណ្ឌា​ត្រូវ​បាន​វាយប្រហារ​ដោយ​សីតុណ្ហភាព​ខ្ពស់​ចាប់តាំងពី​ខែ​មេសា​នៅក្នុង​អាកាសធាតុ​ធ្ងន់ធ្ងរ​ដែល​អង្គការ​ឧតុនិយម​ពិភពលោក​បាន​ព្រមាន​​ថា​កើត​ឡើង​ដោយសារ​ការប្រែប្រួល​អាកាសធាតុ​។​

​នាយកដ្ឋាន​ឧតុនិយម​ប៉ា​គី​ស្ថាន (PMD)​បាន​និយាយថា កាលពី​ថ្ងៃ​សុក្រ​ទី​ក្រុង​ចាកូ​បាបាត (Jacobabad) ក្នុង​ខេត្ត​ស៊ីន (Sindh)​បាន​ឡើងដល់ ៥០ អង្សា​សេខណៈការ​ព្យាករណ៍​សី​តុ​ណ្ហ​ភាព​នឹង​​បន្ត​ឡើង​ខ្ពស់​រហូតដល់​ថ្ងៃអាទិត្យ​។​

​កម្មករ​ឈ្មោះ សា​ហ្វ៊ី ម៉ូ​ហាម​ម៉ាត់ (Shafi Mohammad)​មកពី​ភូមិ​មួយ​នៅ​ជាយក្រុង​ចាកូ​បាបាត កន្លែង​ដែល​អ្នកស្រុក​ជួប​ការលំបាក​ក្នុង​ការស្វែងរក​ទឹកស្អាត​ដែល​អាច​ទុកចិត្តបាន បាន​និយាយថា “​វា​ដូចជា​ភ្លើង​ឆេះ​នៅ​ជុំវិញ​នេះ​យ៉ាង​អ៊ីចឹង​”​។​

​នៅ​ទូទាំង​ប្រទេស នាយកដ្ឋាន​ឧតុនិយម​បាន​ប្រកាស​អាសន្ន​ថា​អាកាសធាតុ​នឹង​ស្ថិតនៅ​ចន្លោះ​ពី ៦ ទៅ ៩ អង្សា​សេ​លើស​ពី​កម្រិត​ធម្មតា​ដោយ​រដ្ឋធានី​អ៊ី​ស្លា​ម៉ា​បាដ​ក៏​ដូចជា​មជ្ឈមណ្ឌល​នានា​ក្នុង​ខេត្ត​​កា​រ៉ា​ជី ខេត្ត​ឡាហ័​រ និង​ខេត្ត​ប៉េ​សាវ៉ា បាន​កត់ត្រា​សីតុណ្ហភាព​ប្រហែល ៤០ អង្សា​សេ​កាលពី​ថ្ងៃ​សុក្រ​។​

​លោក ហ្សា​ហៀ អា​ម៉ាត់ បា​បា (Zaheer Ahmad Babar) ប្រធាន​អ្នក​ព្យាករណ៍​របស់ PMD បាន​និយាយថា “​ឆ្នាំ​នេះ​យើង​បាន​ហក់​ចូល​ពី​រដូវរងា​ទៅ​រដូវក្តៅ​ភ្លាម​តែម្តង​”៕

​ផ្នែក​ភាគច្រើន​នៃ​ប្រទេស​ប៉ា​គី​ស្ថាន​និង​ប្រទេសជិតខាង​ឥណ្ឌា​ត្រូវ​បាន​វាយប្រហារ​ដោយ​សីតុណ្ហភាព​ខ្ពស់​ចាប់តាំងពី​ខែ​មេសា