ដោយ​: ពៅ​និមល / ភ្នំពេញ​: គម្រោង “​គ្លីនិក​បរិវត្ត​កម្ម​ឌីជីថល នៃ​សហគ្រាស​ខ្នាតតូច និង​មធ្យម ដើម្បី​ជំរុញ​កំណើនសេដ្ឋកិច្ច​ឌីជីថល (Clinic for MSMEs Digital Acceleration for New Growth in Digital Economy)” កាលពី​រសៀល ថ្ងៃទី​១៣ ខែឧសភា ឆ្នាំ​២០២២ បានដាក់​ឲ្យ​ដំណើរការ ដើម្បី​គាំទ្រ ការធ្វើ​បរិវត្ត​កម្ម​ឌីជីថល របស់​សហគ្រាស​ធុន​មីក្រូ​តូច និង​មធ្យម (MSMEs) នៅ​កម្ពុជា​។​

​លោក ជា វ៉ាន់​ដេ​ត រដ្ឋមន្ត្រីក្រសួង​ប្រៃសណីយ៍ និង​ទូរគមនាគមន៍ បាន​មានប្រសាសន៍ថាៈ គម្រោង​នេះ ពិត​ជាមាន​សារៈសំខាន់​ណាស់ រវាង​រដ្ឋ និង​វិស័យ​ឯកជន តាមរយៈ ការអភិវឌ្ឍ​ជំនាញ និង​ចំណេះដឹង ក្នុងការ​ចាប់យក និង​ការប្រើប្រាស់​បច្ចេកវិទ្យា​ឌីជីថល សម្រាប់​អាជីវកម្ម ឆ្ពោះទៅរក​ពាណិជ្ជកម្ម តាម​ប្រព័ន្ធ​ឌីជីថល ក្នុង​ទីផ្សារ​តំបន់ និង​ពិភពលោក​។​

​លោកមា​នស​ង្ឈឹ​ម​ជឿជាក់ថាៈ តាមរយៈ​ការអនុវត្ត​គម្រោង​នេះ សហគ្រាស​ធុន​មីក្រូ​តូច និង​មធ្យម នឹង​បង្កើត​តម្លៃបន្ថែម ដែលនាំឱ្យ​ផលិតផល និង​សេវាកម្ម របស់​ពួកគេ មានការ​រីកចម្រើន និង​ភាព​ប្រកួតប្រជែង កាន់តែ​ប្រសើរឡើង ទាំង​ក្នុង​តំបន់ និង​ពិភពលោក​។​

​សូមបញ្ជាក់ថា គម្រោង “​គ្លីនិក​បរិវត្ត​កម្ម​ឌីជីថល នៃ​សហគ្រាស​ខ្នាតតូច និង​មធ្យម ដើម្បី ជំរុញ​កំណើនសេដ្ឋកិច្ច​ឌីជីថល​” ក្រោម​ការ​ឧបត្ថម​ថវិកា ដោយ​មូលនិធិ នៃ​ការកសាង សមត្ថភាព ការស្រាវជ្រាវ និង​ការអភិវឌ្ឍ វិស័យ​ទូរគមនាគមន៍ បច្ចេកវិទ្យា​គមនាគមន៍ និង​ព័ត៌មាន (CBRD)​។ កម្មវិធី​នេះ រៀបចំ​ដោយ សមាគម​សហគ្រិន​វ័យក្មេង​កម្ពុជា និង​គាំទ្រ​ដោយ​បណ្ឌិត្យសភា​បច្ចេកវិទ្យា​ឌីជីថល​កម្ពុជា និង​មានការ​អញ្ជើញ​ចូលរួម ពី​ថ្នាក់ដឹកនាំ​ក្រសួង​ប្រៃសណីយ៍ និង​ទូរគមនាគមន៍ តំណាង Jetro ព្រមទាំង​ក្រុមប្រឹក្សា ភិ​បាល សមាជិក សមាជិកា សមាគម​ប្រមាណ ១០០ នាក់ ៕/V​