ដោយ​: ប​.​ខុន / ភ្នំពេញ​: រដ្ឋមន្ត្រីក្រសួង​ធនធានទឹក​និង​ឧតុនិយម នៅ​រសៀល​ថ្ងៃទី​១៤ ខែឧសភា ឆ្នាំ​២០២២ បាន​អញ្ជើញ​ចុះ​ពិនិត្យ​គម្រោង​អភិវឌ្ឍន៍​ទំនប់​សាលា​តា​អន ជា​គម្រោង​សង់កាត់​ស្ទឹង​សង្កែ​នៅ​ផ្នែក​ខាងក្រោម​ស្ថិតក្នុង​ស្រុក ឯក​ភ្នំ​និង​ស្រុក​សង្កែ ខេត្តបាត់ដំបង​ដែល​បានចាប់ផ្តើម​អនុវត្ត​កាលពី​ខែមករា​ឆ្នាំ​២០១៩ មកដល់ពេលនេះ (១៤​ឧសភា​២០២២) សម្រេច​លទ្ធផល​ការងារ​បាន​ប្រមាណ​ជា​៩៧​ភាគរយ​នៃ​គម្រោង​ហើយ​។​

​លោក​លឹម គានហោ រដ្ឋមន្ត្រី​មន្ត្រី​ក្រសួង​ធនធានទឹក​និង​ឧតុនិយម​មានប្រសាសន៍​នៅក្នុង​ឱកាស​ខាងលើ​ថា “​គម្រោង​អភិវឌ្ឍន៍​ទំនប់​សាលា​តា​អន​គឺ ជា​ក្តី ស្រមៃ​របស់ខ្ញុំ អស់​រយ​:​ពេល​ជាង​៤០​ឆ្នាំ​មកហើយ ដែល​ខ្ញុំ ចង់ បាន សំណង់ ដូច នេះ ពេលនេះ​បាន​ក្លាយជា​ការពិតហើយ នៅក្នុង​សម័យ​តេ​ជោ​សែន​សន្តិភាព​។​គម្រោង​នេះ​ពិត​ជាមាន​សារៈសំខាន់​និង​មាន​អត្ថប្រយោជន៍​ខ្លាំងណាស់ ក្នុងការ​បម្រើ​ដល់​ជីវភាព​ប្រជាពលរដ្ឋ​និង​សោភ័ណភាព​ក្រុង​បាត់ដំបង ។​”

​នៅក្នុង​ឱកាស​នេះ លោក​រដ្ឋមន្ត្រី​បាន​កោតសរសើរ​ដល់​ក្រុមការងារ​សាងសង់ ដែល​បាន​ខិតខំ​ធ្វើការ​ទោះ​ជួប​ឧបសគ្គ និង​បញ្ហា​ប្រឈម​ខ្លះៗ​មួយចំនួន​ក៏ដោយ និង​បាន​ណែនាំ​ដល់​មន្ទីរ​ធនធានទឹក​ខេត្តបាត់ដំបង ឱ្យ​បន្តធ្វើ​ការតាមដាន និង​សហការ​ជាមួយ​អាជ្ញាធរ​ដែនដី ធ្វើយ៉ាងណា​ឲ្យ​សំណង់​នេះ​មានគុណ​ភាពរឹងមាំ​យូរអង្វែង​ដើម្បី​បម្រើ​ជា​ប្រយោជន៍​ដល់ ការងារ​បង្កបង្កើនផល ផ្ត​ត់​ផ្គង់​ទឹក​ប្រើប្រាស់ ជួយ​សម្រួល​ដល់​ជីវភាព​ប្រចាំថ្ងៃ​របស់​បងប្អូន​ប្រជាពលរដ្ឋ​ក្នុង​តំបន់​។​

​គម្រោង​អភិវឌ្ឍន៍​ទំនប់​សាលា​តា​អន ជា​គម្រោង​មួយ​ក្រោម​ហិរញ្ញប្បទាន​សម្បទាន​របស់​សាធារណរដ្ឋ​កូរ៉េ​។ គម្រោង​នេះ បានចាប់ផ្តើម​សាងសង់​កាលពី​ខែមករា ឆ្នាំ​២០១៩ រហូតដល់​ខែឧសភា​ឆ្នាំ​២០២២​នេះ​សម្រេច​លទ្ធផល​ការងារ​បាន​ប្រមាណ​ជា​៩៧​ភាគរយ​ហើយ ។​

​គម្រោង​អភិវឌ្ឍន៍​ទំនប់​សាលា​តា​អន​ជា​ប្រព័ន្ធធារាសាស្ត្រ​មួយ​ដែល​បញ្ជា​ដោយ​ស្វ័យប្រវត្តិ​តាមរយៈ​កុំព្យូទ័រ ក្នុងការ​បិទទ្វារ​ទឹក​សំណង់​មេ​ស្ទាក់​ទឹកស្ទឹង មាន​ទទឹង ៧៥​ម៉ែត្រ ដើម្បី​ស្ទាក់​ថែរក្សា​ទឹក​ទុក​ក្នុង​ស្ទឹង​សង្កែ​នៅ​ផ្នែក​ខាងក្រោម បន្ទាប់ពី​នៅ​ផ្នែក​ខាងលើ​មាន​អាងទឹក​ពហុ​បំណង​សេក​សក និង​ទំនប់​ក​ង្ហ​ត មុននឹង​ធ្លាក់​ចូលទៅ​បឹង​ទន្លេសាប​។​

​គម្រោង​នេះ​មានលទ្ធភាព​ស្រោចស្រព​លើ​ផ្ទៃដី​ស្រូវវស្សា​ចំនួន​ប្រមាណ​ជា ១១.០០០​ហិកតា​និង​ស្រូវប្រាំង​ចំនួន ៤.៧០០​ហិកតា​។​ផ្តល់​ទឹក​សម្រាប់​ផ្គត់ផ្គង់​ដល់​ការផលិត​ទឹកស្អាត​នៅ​ស្រុក​ឯក​ភ្នំ ស្រុក​សង្កែ ស្រុក​ថ្មគោល​និង​ក្រុង​បាត់ដំបង​។​ប្រព័ន្ធធារាសាស្ត្រ​នេះ​បានផ្តល់​នូវ​សោភ័ណភាព​និង​ទាក់ទាញ​សក្តានុពល​ទេសចរ​ណ៌​ដល់​ខេត្តបាត់ដំបង​ផងដែរ​៕​