ដោយៈ ប​.​ខុន / ភ្នំពេញៈ ក្នុង​ដំណើរ​អញ្ជើញ ចុះ​ពិនិត្យ​ស្ថានភាព​ទឹក និង​ប្រព័ន្ធធារាសាស្ត្រ មួយចំនួន ក្នុងភូមិ​សាស្ត្រ​ខេត្តបាត់ដំបង និង​ខេត្តបន្ទាយមានជ័យ កាលពី​ល្ងាច ថ្ងៃទី​១៥ ខែឧសភា លោក លឹម គានហោ រដ្ឋមន្ត្រីក្រសួង​ធនធានទឹក និង​ឧតុនិយម បានសម្រេច​ឲ្យ​ក្រុមការងារ កាយ​កាត់ផ្តាច់​ប្រឡាយ​ចារ ដែល​កំពុងស្ថិត ក្នុង​គម្រោង​កំពុង​ស្តារ​ពង្រីក ដើម្បី​បើកផ្លូវ​ទឹក ដែល​កំពុង​ជន់​លិច​វាលស្រែ របស់​ប្រជាពលរដ្ឋ នៅក្នុង​ឃុំ​រហាត់ទឹក ស្រុក​មង្គល​បូរី ឱ្យ​ធ្លាក់ចូល​បឹង​ទន្លេសាប បាន​លឿន​។​

​នៅក្នុង​ដំណើរ​ដែលមាន​អមដំណើរ ដោយ​ថ្នាក់ដឹកនាំ​ក្រសួង ប្រធាន​មន្ទីរ​ធនធានទឹក និង​ឧតុនិយម ខេត្តបាត់ដំបង និង​ខេត្ត​បន្ទាយ​ជ័យ ជាមួយ​ក្រុមមន្ត្រី​បច្ចេកទេស ខាងលើ លោក លឹម គានហោ រដ្ឋមន្ត្រីក្រសួង​ធនធានទឹក និង​ឧតុនិយម បាន​វាយតម្លៃ​យ៉ាង​ដូច្នេះ ថាៈ ស្ថានភាព​ទឹក នា​ដើមរដូវ​វស្សា ឆ្នាំ​២០២២ ដែលជា​ឆ្នាំមាន​ភ្លៀង​ធ្លាក់​ឆាប់​ជាង និង​បរិមាណ​ច្រើនជាង បណ្តា​ឆ្នាំ​កន្លងទៅ បានធ្វើឱ្យ​ទំនប់​អាង​កំពីងពួយ មាន​បរិ​មាណទឹក កើនឡើង ៦០ លាន​ម៉ែត្រគូប ស្មើនឹង ៤០ ភាគរយ នៃ​បរិមាណ ដែល​អាច​ស្តុក ក្នុង​អាង​ដល់ ១៥០ លាន​ម៉ែត្រគូប​។​

​ក្នុងឱកាស​ខាងលើនេះ លោក​រដ្ឋមន្ត្រី បានធ្វើ​ការណែនាំ​ដល់ មន្ត្រី​បច្ចេកទេស ឱ្យធ្វើ​ការ កែលម្អ នូវ​ចំណុច​ខ្វះខាត ក្នុង​ការកសាង​គម្រោង ឱ្យធ្វើ​ទំនើបកម្ម លើ​ប្រព័ន្ធធារាសាស្ត្រ អាង​កំពីងពួយ ក្នុងស្រុក​បាណន់ ខេត្តបាត់ដំបង ដែល​កំពុង​ជំរុញ​ការងារ​សាងសង់ យ៉ាងសកម្ម រហូតមកដល់​ពេលនេះ សម្រេចបាន​លទ្ធផល​ការងារ បាន​ជាង ៨០ ភាគរយ នៃ​គម្រោង​ហើយ​។​

​នៅ​ល្ងាច​ថ្ងៃ​ដដែល លោក​រដ្ឋមន្ត្រី​បាន​អញ្ជើញ​ចុះ​ពិនិត្យ​ជាក់ស្តែង អំពី​ស្ថានភាព​ដោះ​ទឹក លិច​ដីស្រែ​បងប្អូន​ប្រជាកសិករ នៅ​ឃុំ​រហាត់ទឹក ស្រុក​មង្គលបុរី ខេត្តបន្ទាយមានជ័យ ដែល​បាន​ជន់​លិច ដោយ​បរិមាណ​ទឹកភ្លៀង ធ្លាក់​លើសលប់ នៅ​ភាគ​ខាងលើ ដោយ​បញ្ជា ភ្លាមៗ ឲ្យ​ក្រុមមន្ត្រី​ប្រើប្រាស់​គ្រឿងចក្រ ធុន​ធ្ងន់ កាយ​កាត់ផ្តាច់​ប្រឡាយ​ចារ ដែល​បាន​និង កំពុង​ស្តារ​ពង្រីក ដើម្បី​បន្ធូរ​ទឹក​ដែល​កំពុង​ជន់​លិច​វាលស្រែ ឱ្យ​ហូរ​ធ្លាក់​ចូលទៅ បឹង​ទន្លេសាប​លឿន​៕/V​