ដោយៈ គង់ហេង / កំពង់ចាមៈ លោក អ៊ុន ចាន់ដា អភិបាលខេត្តកំពង់ចាម បានថ្លែងថាៈ ប្រទេសជាតិ មានការអភិវឌ្ឍ រីកចម្រើន គឺអាស្រ័យដោយមាន ធនធានមនុស្ស ពោលគឺ កុំនិយាយពាក្យថា អភិវឌ្ឍន៍ ដោយគ្មានធនធានមនុស្ស និងសន្តិភាពបានឡើយ។
លោកអភិបាលខេត្តកំពង់ចាម បានពោល និងថ្លែងបែបនេះ នៅក្នុងជំនួបសំណេះ សំណាល ជាមួយក្រុមគ្រូបង្រៀន និងគណៈអាជីវករផ្សារ សរុបប្រមាណជិត ១.០០០ នាក់ នៅក្នុងសាលាខេត្តនេះ នាព្រឹកថ្ងៃទី ១៦ ឧសភា នេះ។
លោកបានថ្លែងទៀតថាៈ ប្រទេសរបស់យើង ចាំបាច់បំផុត តម្រូវការនូវធនធានមនុស្ស គឺដើម្បីបណ្តុះបណ្តាលយុវជន ឱ្យមានសមត្ថភាព ហើយយកចំណេះដឹងទាំងនោះ មកបម្រើជាតិវិញ គឺនេះទើបជាការតបស្នង និងកសាងនូវ អនាគតល្អរបស់គេ (យុវជន) ឱ្យស្របពាក្យថា « ទំពាំងស្នងឬស្សី»។ សមត្ថភាពយើង (លោកគ្រូអ្នកគ្រូ) ប៉ុននេះ អាចចែករំលែក ដល់សិស្សានុសិស្ស ក្នុងកម្រិត។ ពិសេសគ្រូៗ ចេញពីមហាវិទ្យាល័យ ចេញពីគរុកោសល្យ មកហើយ តែងតែរៀនតទៅទៀត គឺដើម្បីបង្កើនសមត្ថភាពបន្ថែម និងកុំឱ្យភ្លេច។
លោកបានបន្ថែមថាៈ តាមការពិនិត្យជាក់ស្តែង បច្ចុប្បន្ន អាចសន្និដ្ឋានបាន គឺវិស័យអប់រំ មានការរីកចម្រើនខ្លាំង តាមរយៈការដាក់ចេញ នូវកម្មវិធីកំណែទម្រង់នានារបស់ រាជរដ្ឋាភិបាល។ ដោយគ្រូៗ សប្បាយចិត្ត ក្នុងការបង្រៀន ហើយសិស្សានុសិស្ស សប្បាយចិត្ត ក្នុងការរៀន។ នេះជាការរួមចំណែកទាំងអស់គ្នា ឱ្យបានរីកចម្រើន លើវិស័យអប់រំ ដែលជាការខិតខំប្រឹងប្រែង ដោះស្រាយបញ្ហា ហើយលោកគ្រូ អ្នកគ្រូ បង្រៀនសិស្សទាំងអស់នេះ គឺជាការចូលរួមចំណែក ក្នុងការអនុវត្តធនធានមនុស្ស។
លោកបានបន្តថាៈ ការកសាងធនធានមនុស្ស គឺជារឿងសំខាន់ណាស់ សម្រាប់ប្រទេស យើង ដែលកំពុងអភិវឌ្ឍន៍ហើយក៏កុំនិយាយដល់ ការអភិវឌ្ឍ ដរាបណា គ្មានធនធាន មនុស្ស។ ជាពិសេសប្រទេសអភិវឌ្ឍន៍ ទៅបាន គឺលុះត្រាមាន ធនធានមនុស្ស។ មុនដំបូង រាជរដ្ឋាភិបាល បានដាក់ចេញគោលនយោបាយ យុទ្ធសាស្ត្រចតុកោណ ដំណាក់កាលទី៤ ដោយយកវិស័យចំនួន បួន ជាអាទិភាព គឺផ្លូវ ភ្លើង ទឹក និង មនុស្ស។ ប៉ុន្តែមកដល់បច្ចុប្បន្ន បានយកមនុស្ស គឺធនធានមនុស្ស ប៉ូលអាទិភាពទី១ វិញម្តង ហើយក៏មិនអាចចោល កត្តាសន្តិភាពបានដែរ៕/V
