ដោយ​: ប​.​ជ័យ / បន្ទាយ​មាន​ជ័​យៈ ករណី​មន្ត្រីប៉ូលិស​ការិយាល័យ​កិច្ចការ​ផ្ទៃក្នុង ក្រសួងមហាផ្ទៃ​ម្នាក់ បាញ់​អ្នក​ឃ្វាលក្របី ដែល​ចូល​ស៊ី​ស្មៅ​ក្នុង​ដី​វាល​របស់ខ្លួន នៅ​ឃុំ​អូរ​បី​ជាន់ ស្រុក​អូរជ្រៅ ខេត្តបន្ទាយមានជ័យ កន្លងមក ឥឡូវនេះ ភាគី​បង្ក​បាន​ទៅ​ចរចា ២​លើក​ហើយ ជាមួយ​ភាគី​រងគ្រោះ ដើម្បី​ជួយ​សំណង រដ្ឋប្បវេណី ក្នុងនោះ ជនបង្ក​បាន​សុខចិត្ត​សងជំងឺចិត្ត ចំនួន ៥ ពាន់​ដុល្លារ​អាម៉េរិក នៅពេល​ខាង​ជនរងគ្រោះ ទាមទារ​សំណង ដល់​ទៅ ៥ ម៉ឺន​ដុល្លារ អាម៉េរិក ឯណោះ​។ ប៉ុន្តែ​អ្វីដែល​សំខាន់​នោះ គឺ​ជនដៃដល់ បន្ត​នៅក្រៅ​ដៃ​សមត្ថកិច្ច ដដែល​ទេ​។​

​ចំពោះ​ជនរងគ្រោះ ដែល​រងរបួស​បាក់ឆ្អឹង​តួច និង​ដាច់​សរសៃ​ធំ កំភួនជើង​ឆ្វេង នោះ​វិញ មកទល់ពេលនេះ បន្ត​ស្ថិតនៅក្នុង​ការព្យាបាល ក្នុង​មន្ទីរពេទ្យ​មិត្តភាព កម្ពុជា ជប៉ុន​នៅឡើយ ហើយ​គ្រូពេទ្យ បាន​និយាយថាៈ ស្ថានភាព​ជំងឺ នៅ​មិនទាន់​ធូរស្រាល​នៅឡើយ ។​

​នេះ​បើតាម​អ្នកស្រី រស់ រដ្ឋ ត្រូវជា​ភរិយា​របស់​ជនរងគ្រោះ ដែលជា​អ្នក​ឃ្វាល ក្របី មានឈ្មោះ ឃាង វណ្ណា អាយុ ៥៥ ឆ្នាំ រស់នៅ​ភូមិ​ថ្នល់​បត់ ឃុំ​អូរ​បី​ជាន់ ស្រុក​អូរជ្រៅ ខេត្តបន្ទាយមានជ័យ បាន​ប្រាប់​កាសែត​រស្មី​កម្ពុជា កាលពី​ថ្ងៃទី​១៨ ខែឧសភា ឆ្នាំ​២០២២​។​

​អ្នកស្រី បាន​បន្តថា​: តាំងពី​កើតហេតុ​មក ភាគី​ខាង​ជនបង្ក បានមក​ចរចា​នឹង​ខាង ភាគី​អ្នកស្រី ចំនួន ២ លើក​ហើយ នៅ​អធិការដ្ឋាន​នគរបាល ស្រុក​អូរជ្រៅ ដោយ​ស្នើ​ជួយ​សំណង​រដ្ឋប្បវេណី ទៅខាង​ជនរងគ្រោះ​របស់​អ្នកស្រី ។ ក្នុងនោះ ជំនួប​លើក​ទី​២ បានធ្វើ​កាលពី​ថ្ងៃទី​១៦ ខែឧសភា កន្លងទៅនេះ​។ អ្នកស្រី បាន​បន្តថាៈ ខាង​ភាគី​រងគ្រោះ​របស់​អ្នកស្រី ទាមទារ​ចំនួន ៥ ម៉ឺន​ដុល្លារ​អាម៉េរិក ។ ប៉ុន្តែ​ភាគី​ខាង​ជនបង្ក ហ៊ាន​ឱ្យតែ ៥​ពាន់​ដុល្លារ​ប៉ុណ្ណោះ ។​

​អ្នកស្រី បាន​បន្តទៀតថាៈ នៅ​លើក​ទី​៣ ខាងមុខ ភាគី​ខាង​គ្រួសារ​អ្នកស្រី អាច​ទាមទារ​ចំនួន ៣៥.០០០ ដុល្លារ ដើម្បី​ជួយ​ព្យាបាល និង​ចិញ្ចឹម​ជីវី​តរបស់​ប្តី អ្នកស្រី ព្រោះ​ស្ថានភាព​ប្តី​អ្នកស្រី នឹងត្រូវ​រស់នៅ ក្នុង​លក្ខណ​:​ជា​ជនពិការ មួយជីវិត​។ ពោលគឺ បើ​គាត់​នៅ​ជាធម្មតា គាត់​អាច​ធ្វើការ ឬ​ស៊ីឈ្នួល​គេ បាន​កម្រៃ​ពី ៣០០ ទៅ ៦០០ ដុល្លារ ក្នុង​១​ខែ​ឯណោះ​។​

​លោក​វរសេនីយ៍ អ៊ឹម សុភារ​: អធិការនគរបាល​ស្រុក​អូរជ្រៅ បាន​ប្រាប់​កាសែត រស្មី​កម្ពុជា នៅ​ថ្ងៃ​ដដែល​ថាៈ តាម​ដឹង ការចរចា​នោះ គឺធ្វើឡើង​រវាង​ភាគី​បង្ក និង​ភាគី​រងគ្រោះ​ប៉ុណ្ណោះ ។​

​សូម​រំលឹកថា គ្រាន់តែ​ក្របី​ចូល​ស៊ី​ស្មៅ​ក្នុង​ដី​ខ្លួន លោក​ស័ក្តិ ៤​កន្លះ នគរបាល ការិយាល័យ កិច្ចការ​ផ្ទៃក្នុង ក្រសួងមហាផ្ទៃ​ម្នាក់ បាញ់​អ្នកស៊ីឈ្នួល​ឃ្វាល​សត្វ ឱ្យ​របួសធ្ងន់ កាលពី​ថ្ងៃទី​៧ ខែឧសភា ឆ្នាំ​២០២២ នៅវេលា​ម៉ោង ១​និង​៣៥​នាទី នៅ​ចំណុច​ដី​ចាក់ ស្ថិតនៅ​ភូមិ​-​ឃុំ​អូរ​បី​ជាន់ ស្រុក​អូរជ្រៅ ខេត្តបន្ទាយមានជ័យ​។​

​មន្ត្រីនគរបាល​ប៉ុស្តិ៍​រដ្ឋបាល​ឃុំ​អូរ​បី​ជាន់ និង​អធិការដ្ឋាន​ស្រុក​អូរជ្រៅ បានឱ្យ ដឹង​កាលពី​ថ្ងៃទី​៨ ខែឧសភា​ថា សមត្ថកិច្ច​ជំនាញ បាន​អង្កេត ស្រាវជ្រាវ និង​កំណត់ ក្នុង​សំណុំរឿង​ថា ជា​ករណី ប៉ុនប៉ង​មនុស្សឃាត​។​

​ជនរងគ្រោះ មានឈ្មោះ ឃាង វណ្ណា អាយុ​៥៥​ឆ្នាំ ភេទ​ប្រុស រស់នៅ​ភូមិ​ថ្នល​បត់ ឃុំ​អូរ​បី​ជាន់ ស្រុក​អូរជ្រៅ ខេត្តបន្ទាយមានជ័យ មុខរបរ ស៊ីឈ្នួល​ឃ្វាលក្របី​។ រីឯ​ជនសង្ស័យ បង្កឡើង មានឈ្មោះ រ៉ា ទឹម​ច័ន្ទ​ពិសី អាយុ​៤២​ឆ្នាំ ភេទ​ប្រុស ឋានន្តរ​ស័​ក្ត វរ​:​សេនីយ៍​ទោ តួនាទី នាយរង​ការិយាល័យ​កិច្ចការ​ផ្ទៃ ក្នុង​ក្រសួង មហាផ្ទៃ ដែល​មក​ស្នាក់នៅ​ប​ណ្តាះ​អាសន្ន នៅ​ភូមិ​អូរ​បី​ជាន់ ឃុំ​អូរ​បី​ជាន់ ស្រុក​អូរជ្រៅ ខេត្តបន្ទាយមានជ័យ​។​

​មុន​កើតហេតុ សត្វ​ក្របី​ដែល​ជនរងគ្រោះ​ស៊ីឈ្នួល​ឃ្វាល បាន​ចូល​ស៊ី​ស្មៅ​ដុះ​ឯង ក្នុង​ដី​វាល អត់​របងរ​បស់ជនស​ង្ស័​យ​។ មិនដឹង​ជា​ខឹងច្រឡោត ឬ​ទឹកចិត្ត​ឃោរ ឃៅ​យ៉ាងណា ពេលនោះ ជនសង្ស័យ បាន​ប្រើ​កាំភ្លើង​ម៉ាក់​វាំង​ឡុង (​ប្រភេទ កាំភ្លើង​បាញ់​សត្វ​) បាញ់​ច្រើន​គ្រាប់ ក្នុងនោះ ត្រូវ​មួយ​គ្រាប់​ចំ​កំភួនជើង ខាងឆ្វេង​របស់​ជនរ​ង​គ្រោះ ចំនួន​១​គ្រាប់ បណ្តាល​រងរបួស​ធ្ងន់ ។​

​ជនសង្ស័យ​ដៃដល់ បាញ់​រួច ឃើញ​ជនរងគ្រោះ រងរបួស​ដួល​ដេក​លើដី ក៏បាន​បាន​រត់គេចខ្លួន បាត់ទៅ​។ ហើយ​មកទល់​ថ្ងៃ​ទិ​១៨ ខែឧសភា ឆ្នាំ​២០២២ នេះ សមត្ថកិច្ច មិនទាន់​ចាប់បាន ជនដៃដល់ នោះ​នៅឡើយ ៕/V​-PC