ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រុមហ៊ុន​ផលិត​អាវុធ​នានា​របស់​សហរដ្ឋអាម៉េរិក​បាន​ផលិត​កាំភ្លើង​ជាង ១៣៩ លាន​ដើម​សម្រាប់​ទីផ្សារ​ពាណិជ្ជកម្ម​ក្នុង​រយៈពេល​ពីរ​ទសវត្សរ៍​ចាប់ពី​ឆ្នាំ ២០០០ រួម​ទាំង​កាំភ្លើង ១១,៣ លាន​ដើម​ក្នុង​ឆ្នាំ ២០២០ តែឯង នេះ​បើ​យោងតាម​របាយការណ៍​ថ្មី​របស់​រដ្ឋាភិបាល​។​

​អាវុធ​ចំនួន ៧១ លាន​ដើម​ផ្សេង​ទៀត​ត្រូវបាន​នាំ​ចូល​ក្នុង​រយៈពេល​ដូចគ្នា​នេះ​ធៀប​ទៅ​នឹង​ការនាំ​ចេញ​អាវុធ​ត្រឹមតែ ៧,៥ លាន​ដើម​ប៉ុណ្ណោះ​ដោយ​គូសបញ្ជាក់​ពី​របៀប​ដែល​ប្រទេស​នេះ​កំពុង​ហែល​ក្នុង​​ជំនន់​អាវុធ​ផ្ទាល់ខ្លួន ដែល​បាន​បង្ក​ឱ្យ​មាន​ការកើនឡើង​នៃ​អំពើហិង្សា​ដោយ​កាំភ្លើង ឃាតកម្ម និង​ការធ្វើអត្តឃាត នេះ​បើ​យោងតាម​របាយការណ៍រ​បស់​ក្រសួងយុត្តិធម៌​។​

​របាយការណ៍​បង្ហាញ​ថា ខណៈ​ជនជាតិ​អាម៉េរិក​ចូលចិត្ត​កាំភ្លើង​វាយប្រហារ​ពាក់កណ្តាល​ស្វ័យប្រវត្តិ​ដែល​គេ​ឃើញ​នៅក្នុង​ការបាញ់ប្រហារ​ទ្រង់ទ្រាយ​ធំ ពួកគេ​ក៏​ទិញ​កាំភ្លើងខ្លី​ពាក់កណ្តាល​ស្វ័យប្រវត្តិ ៩ មិល្លីម៉ែត្រ​ដែល​មាន​តម្លៃ​ថោក ងាយស្រួល​ប្រើ និង​បាញ់​ច្បាស់​កាន់តែ​ច្រើនឡើងៗ​ដូច​កាំភ្លើងខ្លី ៩ មិល្លីម៉ែត្រ​ដែល​ប៉ូលិស​ភាគច្រើន​កំពុង​ប្រើប្រាស់​ផងដែរ​។

​ហើយ​របាយការណ៍​បង្ហា​ញ​ថា អាជ្ញាធរ​ប្រឈមមុខ​នឹង​ការកើនឡើង​នៃ “​កាំភ្លើង​ខ្មោច​” ដែល​មិន​បាន​ចុះបញ្ជី​ផលិត​នៅតាម​ផ្ទះ​ជាមួយនឹង​គ្រឿងបន្លាស់​អាច​ទិញ​បាន​តាម​អ៊ីនធឺណិត​និង​ផលិត​ដោយ​​ម៉ាស៊ីន​បោះពុម្ព 3-D ព្រមទាំង​កាំភ្លើងខ្លី​និង​កាំភ្លើង​វែង​ដែល​មាន​បង់​ខ្លី​និង​សាហាវ​ដូច​កាំភ្លើង​ពាក់កណ្តាល​ស្វ័យប្រវត្តិ ដែល​ប្រើ​ក្នុង​ការបាញ់ប្រហារ​ទ្រង់ទ្រាយ​ធំ​។​

​អគ្គ​រដ្ឋអាជ្ញារង​លោកស្រី លី​សា ម៉ូ​ណាកូ (Lisa Monaco)​បាន​និយាយថា “​យើង​អាច​ដោះស្រាយ​ការកើនឡើង​នៃ​អំពើហិង្សា​នាពេល​បច្ចុប្បន្ន​បាន​ប្រសិនបើ​យើង​មាន​ព័ត៌មាន​ល្អ​បំផុត​និង​ប្រើប្រាស់​​ឧបករណ៍​និង​ការស្រាវជ្រាវ​ដែលមាន​ប្រសិទ្ធភាព​បំផុត​ដើម្បី​ជំរុញ​កិច្ចខិតខំ​ប្រឹងប្រែង​របស់​យើង​”​។​

“​របាយការណ៍​នេះ​គឺជា​ជំហាន​ដ៏​សំខាន់​មួយ​ក្នុងទិសដៅ​នោះ​។​ក្រសួង​នឹង​បន្ត​ប្រមូល​ទិន្នន័យ​ចាំបាច់​ដើម្បី​កែសម្រួល​វិធីសាស្ត្រ​របស់​យើង​ចំពោះ​អ្នក​ជំរុញ​ឱ្យមាន​អំពើហិង្សា​ដោយ​កាំភ្លើង​និង​ចាប់​​អ្នក​បាញ់បោះ​ចេញពី​ផ្លូវ​ឱ្យ​អស់​”៕

កាំភ្លើង​ដាក់លក់​នៅ​ហាង​មួយ​នៅ​រដ្ឋ​ផ្លរីដា