ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រុម​មន្ត្រី​សុខាភិបាល​អាម៉េរិក​បាន​និយាយ​កាលពី​ថ្ងៃ​អង្គារ ទី​១៧ ឧសភា​ថា ការកើនឡើង​ករណី​កូវី​ដ​១៩​កំពុង​ជំរុញ​ឱ្យ​មាន​ការព្យាបាល​ដោយ​ប្រើ​ថ្នាំ​ប្រឆាំង​​វីរុស​លេប​តាម​មាត់ Paxlovid របស់​ក្រុមហ៊ុន Pfizer Inc​កើនឡើង ៣១៥ ភាគរយ​ក្នុង​រយៈពេល​បួន​សប្តាហ៍​កន្លងមកនេះ​។​

​ការកើនឡើង​នៃ​ករណី​ឆ្លង​និង​ការ​សម្រាក​ព្យាបាល​នៅ​មន្ទីរពេទ្យ​នៅ​សហរដ្ឋ​អាម៉េរិក​កំពុង​ចាប់ផ្តើម​ប៉ះពាល់​ដល់​ការណែនាំ​អំពី​អាកប្បកិរិយា ដោយ​ទីក្រុង​ញូវយ៉ក​ដែល​ជា​ទីក្រុង​មាន​ប្រជាជន​ច្រើន​​ជាង​គេ​របស់​ប្រទេស​នេះ បាន​ផ្តល់​ដំបូន្មាន​ដល់​ការប្រើប្រាស់​ម៉ាស់​យ៉ាង​តឹងរ៉ឹង ប៉ុន្តែ​មិន​មាន​វិធានការ​ចាំបាច់​ថ្មី​ទេ​។ ក្រុមហ៊ុន Apple បាន​លុបចោល​ផែនការ​វិលត្រឡប់​ទៅកាន់​ការិយាល័យ​វិញ​។​

​លោក​វេជ្ជបណ្ឌិត វី​លលៀម សា​ហ្វន័រ (William Schaffner) អ្នកជំនាញ​ជំងឺឆ្លង​នៅ​មជ្ឈមណ្ឌល​វេជ្ជសាស្ត្រ​សាកលវិទ្យាល័យ​វ៉ាន់​ដឺ​ប៊ីល (Vanderbilt) នៅ​ទីក្រុង​ណាស់​វី​ល (Nashville) បាន​និយាយថា “​យើង​នឹង​ឃើញ​មេរោគ​នេះ​វាយប្រហារ​កាន់តែ​ខ្លាំង​ឡើង​លើ​មនុស្ស​ដែល​មាន​វ័យ​ចំណាស់ ទន់ខ្សោយ មាន​ជំងឺ​ប្រចាំកាយ ឬ​មាន​ភាពស៊ាំ​ខ្សោយ​។​ប៉ុន្តែ​ឥឡូវនេះ​យើង​មាន​ការព្យាបាល​​ប្រសើរ​ជាង​មុន ហើយ​មនុស្ស​ទាំងនោះ​ភាគច្រើន​នឹង​ចាកចេញ​ពី​មន្ទីរពេទ្យ​ទាំង​នៅ​រស់​ជា​ជាង​ស្លាប់​”​។​

​សហរដ្ឋ​អាម៉េរិក​កំពុង​មាន​ករណី​ថ្មី​ជា​មធ្យម​ជិត​៩៧.០០០​នាក់​ក្នុង​មួយថ្ងៃ ដោយ​កើនឡើង​ពី​ករណី​ប្រមាណ​៧៣.០០០​នាក់​កាល​ពី​មួយ​សប្តាហ៍​មុន នេះ​បើ​យោង​តាម​តួលេខ​របស់​រ៉​យ​ទ័រ​។​ករណី​ឆ្លង​បាន​​កើនឡើង​ជា​បណ្តើរៗ ចាប់តាំងពី​ឈាន​ដល់​កម្រិត​ទាប​បំផុត​នៃ​ការឆ្លង​ថ្មី​ចំនួន ៣០.០០០ នាក់​ក្នុង​មួយ​ថ្ងៃ​នៅ​ចុង​ខែ​មីនា​។​

​មជ្ឈមណ្ឌល​គ្រប់គ្រង​និង​បង្ការ​ជំងឺ​របស់​សហរដ្ឋ​អាម៉េរិក​កាលពី​ថ្ងៃ​អង្គារ​បាន​ប៉ាន់ប្រមាណ​ថា​ប្រហែល​ពាក់កណ្តាល​នៃ​ការឆ្លង​កាលពី​សប្តាហ៍​មុន​គឺ​មកពី​មេរោគ​បំប្លែង BA.2.12.1​ដែល​ជា​បងប្អូន​​របស់​អូ​មី​ក្រុង ដែល​បាន​កើន​ឡើង​តាំងពី​ពាក់កណ្តាល​ខែ​មេសា ហើយ​ក្លាយជា​មេរោគ​លេចធ្លោ​រួច​ទៅ​ហើយ​នៅ​ឆ្នេរ​ខាងកើត​៕

​សហរដ្ឋ​អាម៉េរិក​កំពុង​មាន​ករណី​ថ្មី​ជា​មធ្យម​ជិត​៩៧.០០០​នាក់​ក្នុង​មួយថ្ងៃ