​ដោយៈ​សុផល​/​ភ្នំពេញ​៖ សេចក្តីព្រាងច្បាប់ ស្តីពី​វិសោធនកម្ម​មាត្រា​១៤០ នៃ​ច្បាប់​ស្តីពី ការគ្រប់គ្រង​រដ្ឋបាល​រាជធានី ខេត្ត ក្រុង ស្រុក ខណ្ឌ និង​សេចក្តីព្រាងច្បាប់ ស្តីពី​សុវត្ថិភាព​ម្ហូបអាហារ បាន​ត្រូវ​សម័យប្រជុំ​វិសាមញ្ញ នីតិកាល​ទី​៤ ព្រឹទ្ធសភា ពិនិត្យ​និង​ឱ្យយោបល់​ឯកភាព​ទាំងស្រុង កាលពី​ព្រឹក​ថ្ងៃទី​១៨​ខែឧសភា​ឆ្នាំ​២០២២​។​

​សម្តេច​វិបុល​សេនា​ភក្តី សាយ ឈុំ ប្រធានព្រឹទ្ធសភា នៃ​ព្រះរាជាណាចក្រ​កម្ពុជា បាន​ដឹកនាំ​សម័យប្រជុំ​វិសាមញ្ញ នីតិកាល​ទី​៤ នេះ ដោយមាន​សមាជិក​ព្រឹទ្ធសភា​មាន​វត្តមាន​ចំនួន ៥៩​រូប​។​

​សេចក្តីព្រាងច្បាប់​ស្តីពី​វិសោធនកម្ម​មាត្រា​១៤០ នៃ​ច្បាប់​ស្តីពី ការគ្រប់គ្រង​រដ្ឋបាល​រាជធានី ខេត្ត ក្រុង ស្រុក ខណ្ឌ ដែល​ត្រូវ​ប្រកាស​ឱ្យប្រើ​ដោយ​ព្រះរាជក្រម​លេខ នស​/​រកម​/០៥០៨/០១៧ ចុះ​ថ្ងៃទី​២៤ ខែឧសភា ឆ្នាំ​២០០៨​នេះ រៀបចំឡើង​ក្នុង​គោលបំណង​កែសម្រួល​ចំនួន​គណៈ​អភិបាល​រាជធានី ខេត្ត ក្រុង ស្រុក ខណ្ឌ ដើម្បី​បង្កើន​ធនធានមនុស្ស​ក្នុង​ជួរ​គណៈ​អភិបាល ដែលជា​អង្គ​ប្រតិបត្តិ​ឱ្យមាន​ចំនួន​សមស្រប​តាម​ស្ថានភាព​នៃ​កំណើនសេដ្ឋកិច្ច កំណើន​ប្រជាពលរដ្ឋ និង​ភូមិសាស្ត្រ​នៃ​រដ្ឋបាល​ថ្នាក់ក្រោម​ជាតិ​នីមួយៗ ។​

​សេចក្តីព្រាងច្បាប់​នេះ​តាក់តែងឡើង​មាន ០២​មាត្រា ត្រូវបាន​រដ្ឋសភា នៃ​ព្រះរាជាណាចក្រ​កម្ពុជា អនុម័ត​យល់ព្រម​ជា​លើកដំបូង​ចំនួន ១០៦​សំឡេង នៃ​ចំនួន​សមាជិក​រដ្ឋ​សភា​ទាំងមូល កាលពី​ថ្ងៃទី​១១ ខែឧសភា ឆ្នាំ​២០២២ នា​សម័យប្រជុំ​រដ្ឋសភា​លើក​ទី​៧ នីតិកាល​ទី​៦​។​លោក អង្គ វង្ស វ​ឌ្ឍា​នា ទេសរដ្ឋមន្ត្រី​ទទួលបន្ទុក​បេសកកម្ម​ពិសេស អមដោយ​ថ្នាក់ដឹកនាំ មន្ត្រីជាន់ខ្ពស់ និង​មន្ត្រី​ជំនាញ​នៃ​ក្រសួងមហាផ្ទៃ បាន​អញ្ជើញ​មក​ការពារ​សេចក្តីព្រាងច្បាប់​នេះ​។​

​អង្គប្រជុំ​ព្រឹទ្ធសភា​បាន​ពិនិត្យ ហើយ​ឱ្យយោបល់​ឯកភាព​ទាំងស្រុង​លើ​សេចក្តីព្រាងច្បាប់​ទាំងមូល​ដោយ​ឥត​កែប្រែ​ចំនួន ៥៩​សំឡេង នៃ​ចំនួន​សមាជិក​ព្រឹទ្ធសភា​ទាំងមូល​។​

​ចំណែក​សេចក្តីព្រាងច្បាប់ ស្តីពី​សុវត្ថិភាព​ម្ហូបអាហារ នឹង​បង្កើតឱ្យមាន​ប្រព័ន្ធ​ត្រួតពិនិត្យ​ម្ហូបអាហារ ដោយ​ផ្អែក​តាម​មូលដ្ឋាន​វិទ្យាសាស្ត្រ និង​ការវិភាគ​រក​ហានិភ័យ ព្រមទាំង​កសាងបាន​នូវ​ចំណុច​អាទិភាព និង​ការត្រួតពិនិត្យ​បំពេញបន្ថែម​ឱ្យ​គ្នា​ប្រកបដោយ​ប្រសិទ្ធភាព​។ ការអនុវត្ត​ដោយ​ពេញលេញ​នូវ​ច្បាប់​នេះ​នឹង​បង្កើតឱ្យមាន​រំហូរ​សេរី​នៃ​ទំនិញ សេវាកម្ម និង​ការវិនិយោគ ដើម្បី​ស្រូបយក​អាជីវកម្ម អ្នកជំនាញ ទេពកោសល្យ និង​រំហូរ​នៃ​ដើមទុន​ដោយ​សេរី​។​

​សេចក្តីព្រាងច្បាប់​នេះ នឹង​ផ្តល់​សារសំខាន់​ក្នុងការ​កំណត់​គោលការណ៍​ជា​មូលដ្ឋាន ដើម្បី​ជំរុញ​ឱ្យ​ផលិតផល​ម្ហូបអាហារ​មាន​សុវត្ថិភាព និង​អនុលោម​តាមច្បាប់ និង​លិខិតបទដ្ឋាន​ជាតិ​ជា​ធរមាន សំដៅ​លើកកម្ពស់​សុខុមាល​ភាព និង​ប្រសិទ្ធភាព នៃ​ការការពារ​ផលប្រយោជន៍​អ្នកប្រើប្រាស់ រួមចំណែក​យ៉ាងសំខាន់​ក្នុងការ​កាត់បន្ថយ​ភាពក្រីក្រ​របស់​ប្រជាពលរដ្ឋ​។​

​សេចក្តីព្រាងច្បាប់​នេះ​តាក់តែងឡើង​មាន ១១​ជំពូក និង ៤៣​មាត្រា ត្រូវបាន​រដ្ឋសភា នៃ​ព្រះរាជាណាចក្រ​កម្ពុជា អនុម័ត​យល់ព្រម​ជា​លើកដំបូង​ចំនួន ១០២​សំឡេង នៃ​ចំនួន​សមាជិក​រដ្ឋ​សភា​ទាំងមូល​កាលពី​ថ្ងៃទី​១១ ខែឧសភា ឆ្នាំ​២០២២ នា​សម័យប្រជុំ​រដ្ឋសភា​លើក​ទី​៧ នីតិកាល​ទី​៦​។​

​ក្រោយពី​សមាជិក​ព្រឹទ្ធសភា​ចំនួន​០៥​រូប បាន​ឡើង​មាន​យោបល់ និង​លើក​ជា​សំណួរ​សុំ​ការបំភ្លឺ​រួចមក លោក​អង្គ វង្ស វ​ឌ្ឍា​នា ទេសរដ្ឋមន្ត្រី​ទទួលបន្ទុក​បេសកកម្ម​ពិសេស អមដោយ​ថ្នាក់ដឹកនាំ មន្ត្រីជាន់ខ្ពស់ និង​មន្ត្រី​ជំនាញ​នៃ​ក្រសួងពាណិជ្ជកម្ម បាន​ស្រាយ​បំភ្លឺ​ជូន​អង្គប្រជុំ​ព្រឹទ្ធសភា​។​អង្គប្រជុំ​ព្រឹទ្ធសភា​បាន​ពិនិត្យ ហើយ​ឱ្យយោបល់​ឯកភាព​ទាំងស្រុង​លើ​សេចក្តីព្រាងច្បាប់​ទាំងមូល ដោយ​ឥត​កែប្រែ​ចំនួន ៥៩​សំឡេង នៃ​ចំនួន​សមាជិក​ព្រឹទ្ធសភា​ទាំងមូល​៕​.mara