​ដោយៈ បាយ័ន / សៀមរាបៈ ត្រឹម​ឆ្នាំ ២០២២​នេះ ការពង្រីក​បណ្តាញ​ផ្គត់ផ្គង់​អគ្គិសនី ទូទាំងប្រទេស សម្រេចបាន ៩៨ ភាគរយ នៃ​ចំនួន​ភូមិ​សរុប នៅក្នុង​ប្រទេស​កម្ពុជា​។ នេះ​ជាការ​អះអាង​របស់លោក ស៊ុយ សែម រដ្ឋមន្ត្រីក្រសួង​រ៉ែ និង​ថាមពល នៅពេល​លោក បាន​អញ្ជើញ​ចូលរួម​ជា​អធិបតី ក្នុង​ពិធី​ប្រកាស​ចូលកាន់​តំណែង ប្រធាន​មន្ទីរ រ៉ែ និង​ថាមពល ខេត្តសៀមរាប​នេះ ។

​យោងតាម​ប្រកាស​របស់​ក្រសួង​រ៉ែ និង​ថាមពល លោក ឡេង លាត បាន​ត្រូវ​សម្រេច តែងតាំង ជា​ប្រធាន​មន្ទីរ រ៉ែ និង​ថាមពល ខេត្តសៀមរាប ។ នេះ​បើតាម​ការផ្សាយ របស់ សាលាខេត្ត​សៀមរាប នៅ​រសៀល​ថ្ងៃទី​១៨ ខែឧសភា ឆ្នាំ​២០២២ នេះ ។​

​នៅក្នុង​ឱកាស​នោះ លោក​រដ្ឋមន្ត្រី ស៊ុយ សែម បាន​ថ្លែងថាៈ បច្ចុប្បន្ននេះ ប្រទេស​កម្ពុជា មានលទ្ធភាព​ផ្គត់​ផ្គត់​អគ្គិសនី ប្រមាណ​ជា ៣.៨០០ មេ​ហ្គា​វ៉ា​ត់ ក្នុងនោះ ខេត្តសៀមរាប បាន​ប្រើប្រាស់​អស់​ប្រមាណ​ជា ១០០ មេ​ហ្គា​វ៉ា​ត់ ប៉ុន្តែ​ដោយសារ​វិបត្តិ​នៃ ជំងឺ​កូ​វីដ​-១៩ ការប្រើប្រាស់​ចរន្តអគ្គិសនី នៅក្នុង​ប្រទេស​កម្ពុជា បាន​ធ្លា​ក់មក​ត្រឹមតែ​ជាង ២ ពាន់​មេ​ហ្គា​វ៉ា​ត់ ដែល​កត្តា​នេះ បានធ្វើ​ឲ្យ​អគ្គិសនី​កម្ពុជា ខាត​ធន​យ៉ាងច្រើន​។​

​លោក​រដ្ឋមន្ត្រី បាន​មានប្រសាសន៍ថាៈ បើទោះជា​យ៉ាងនេះ​ក្តី គោលនយោបាយ​របស់ រាជរដ្ឋាភិបាល​កម្ពុជា ក្រោម​ការដឹកនាំ​របស់ សម្តេច​អគ្គមហាសេនាបតី​តេ​ជោ ហ៊ុន សែន បាន​ខិតខំ​ស្វែងរក​នូវ ប្រភព​ថាមពល មក​ផ្គត់ផ្គង់ ចែកចាយ ជូន​ប្រជាពលរដ្ឋ ឲ្យ​បាន​គ្រប់គ្រាន់ និង​មាន​ស្ថេរភាព និរន្តរភាព និង​តម្លៃ​សមរម្យ​។​

​លោក ស៊ុយ សែម បាន​បន្តថាៈ ក្នុង​គោលនយោបាយ​ផ្គត់ផ្គង់​ថាមពល​នេះ កម្ពុជា បាន​អនុវត្ត បាន​នូវ​ការ​អូស​ខ្សែ​ត​ភ្ជាប់ បណ្តាញ​ចរន្តអគ្គិសនី បាន​ចំនួន ៩៨ ភាគរយ នៃ​ចំនួន​ភូមិ​សរុប ចំនួន​ប្រមាណ ១៤.៣៩០ ភូមិ នៅ​ទូទាំងប្រទេស​កម្ពុជា ។​

​លោក​បាន​បន្តថាៈ ប្រជាពលរដ្ឋ ចំនួន ៨៤ ភាគរយ នៃ​ប្រជាពលរដ្ឋ ប្រមាណ ជា ២ លាន ខ្នង​ផ្ទះ ក៏បាន​ត​ភ្ជាប់​បណ្តាញ​ប្រើប្រាស់ រួចរាល់​ហើយ​ដែរ​។ ខណៈ​ត្រឹម​ឆ្នាំ ២០២២​នេះ ការពង្រីក​បណ្តាញ​ផ្គត់ផ្គង់​អគ្គិសនី ទូទាំងប្រទេស សម្រេចបាន ៩៨ ភាគរយ នៃ​ចំនួន​ភូមិ សរុប នៅក្នុង​ប្រទេស​កម្ពុជា​។​

​លោក ស៊ុយ សែម បានលើកឡើង​ថាៈ​ចំពោះ​ភូមិ ២ ភាគរយ ដែល​នៅ​សេសសល់ មិនទាន់បាន​បញ្ជូន បណ្តាញ​អគ្គិសនី ទៅនោះ ជា​ភូមិ​ដាច់ស្រយាល នៅក្នុង​ព្រៃ គ្មាន​ផ្លូវ​ចូល ឬ​ជា​ភូមិ​បណ្តែត​ទឹកជា​ដើម តែ​ទោះជា​យ៉ាងណា ក្រសួង​នឹង​ខិតខំ​រក​ប្រភព ថាមពល​ផ្សេងៗ ដើម្បី​ផ្គត់ផ្គង់​ដល់​ភូមិ​ប្រជាពលរដ្ឋ​ទាំងនោះ​។​

​បច្ចុប្បន្ន កម្ពុ​ជាមាន​ទំ​បន់​វា​រី​អគ្គិសនី ចំនួន​៧ ដែល​កំពុង​ដើរតួនាទី​ជា​ឆ្អឹងខ្នង នៃ​វិស័យ​ថាមពល របស់​កម្ពុជា​។ ក្រៅពីនោះ កម្ពុជា​ក៏​នៅមាន​រោងចក្រ​អគ្គិសនី ដែល​ដើរ​ដោយ​ថាមពល​ធ្យូងថ្ម និង​ប្រភព​ថាមពល ដែល​ទិញ​ពី​ប្រទេសជិតខាង​ផងដែរ​។​

​លោក​រដ្ឋមន្ត្រី បាន​ផ្តាំផ្ញើ​ដល់​ប្រធាន​មន្ទីរ ដែល​ទើបនឹង​ឡើងកាន់តំណែង​ថ្មី​ថា ត្រូវ​រក្សា សាមគ្គីភាព​ផ្ទៃក្នុង ឱ្យ​កាន់តែ​ល្អប្រសើរ​ថែមទៀត ហើយ​ត្រូវ​បន្ត​អនុវត្ត​ការងារ ពី​ប្រធាន​មន្ទីរ ចាស់ ឱ្យបាន​ជោគជ័យ​។ លោក ក៏បាន​ថ្លែងអំណរគុណ ចំពោះ​លោក​ប្រធាន​មន្ទីរ​ចាស់ ដែល​បាន​ខិតខំ​បំពេញការងារ ក្នុង​រយៈពេល​កន្លងមក ដែល​ទទួលបាន​លទ្ធផល​ជា​ផ្លែផ្កា និង​ទទួលបាន​ជោគជ័យ ជាច្រើន​ជូន​ខេត្ត ក៏ដូចជា រាជរដ្ឋាភិបាល ៕/V​