ដោយ​:​ពៅ​និមល​/​ភ្នំពេញ​: សេចក្តីព្រាងច្បាប់​ស្តីពី សុវត្ថិភាព​ម្ហូបអាហារ របស់​ក្រសួងពាណិជ្ជកម្ម ត្រូវបាន​ព្រឹទ្ធសភា​អនុម័ត​គាំទ្រ​ទាំងស្រុងក្នុង​សម័យប្រជុំ​ព្រឹទ្ធសភា​វិសាមញ្ញនីតិកាល​ទី​៤ កាលពី​ព្រឹក​ថ្ងៃទី​១៨ ខែឧសភា ឆ្នាំ​២០២២​នេះ​។​

​ប្រភពពី​ក្រសួងពាណិជ្ជកម្មបាន​ឲ្យ​រស្មី​កម្ពុជា​ដឹងថា នៅក្នុង​កិច្ចប្រជុំនៅ​វិមាន​ព្រឹទ្ធសភាក្រោម​អធិបតីភាព​ដ៏​ខ្ពង់ខ្ពស់​សម្ដេច​វិបុល​សេនា​ភក្ដី សាយ ឈុំ ប្រធានព្រឹទ្ធសភានោះ លោក អង្គ វង្សវ​ឌ្ឍា​នា ទេសរដ្ឋមន្ត្រី​ទទួលបន្ទុក​បេសកកម្ម​ពិសេស បាន​បញ្ជាក់ថា សេចក្ដីព្រាងច្បាប់​នេះ ពិត​ជាមាន​សារៈសំខាន់​ណាស់​ក្នុង​ការធានា​ការពារ​សុខភាព និង​អាយុជីវិត​របស់​ប្រជាពលរដ្ឋ​គ្រប់រូប តាមរយៈ​ការទទួល​ទាន​អាហារ​ប្រកបដោយ​គុណភាព សុវត្ថិភាព និង​អនាម័យ​ល្អ ជាហេតុ​ធ្វើឱ្យ​ប្រជាពលរដ្ឋ​មាន​សុខភាព​ល្អ និង​ជៀសវាង​ការកើត​ជំងឺ​ផ្សេងៗ​រាប់រយ​ប្រភេទ​។ លើសពីនេះ សេចក្ដីព្រាងច្បាប់​នេះ នឹង​ផ្ដល់​អត្ថប្រយោជន៍​ជាច្រើន​ទៀត​ដល់​កម្ពុជា បន្ទាប់ពី​សេចក្ដីព្រាងច្បាប់​នេះ​ចូល​ជា​ធរមាន​។​

​លោក​ទេសរដ្ឋមន្ត្រី បាន​បន្តថា សេចក្ដីព្រាងច្បាប់​នេះ​មាន​ចំណុច​សំខាន់ៗ​ចំនួន​៤ រួមមាន​៖ ១.​ការបង្កើតឱ្យមាន​យន្តការ​ទទួលខុសត្រូវ​របស់​ក្រសួង​-​ស្ថាប័ន​ជាតិ ដើម្បី​គ្រប់គ្រង​ប្រតិបត្តិ​ករ​អាជីវកម្ម​ម្ហូបអាហារ នៅ​គ្រប់​ដំណាក់កាល​នៃ​ខ្សែ​ច្រវាក់​ផលិតកម្ម ចាប់ពី​កសិដ្ឋាន​ផលិត​រហូតដល់​តុ​អាហារ និង​ធានាថា​ផលិតផល​ម្ហូបអាហារ​ទាំ​ង​អស់ ដែល​ចរាចរ​នៅ​កម្ពុ​ជាមាន​គុណភាព សុវត្ថិភាព និង​អនាម័យ​ល្អ សម្រាប់​ប្រជាពលរដ្ឋ​គ្រប់ៗ​រូប​។ ២.​ការកំណត់​គោលការណ៍​ជា​មូលដ្ឋាន ដើម្បី​ជំរុញ​ផលិតផល​ម្ហូបអាហារ​ត្រូវបាន​ផលិត កែច្នៃ វេច​ខ្ចប់ និង​ចែកចាយ ផ្អែក​ទៅតាម​ស្តង់ដា​និង​បទ​ប្បញ្ញត្តិ​បច្ចេកទេស​ជាតិ សំដៅ​ធានា​ឱ្យបាន​នូវ​ការការពារ​អាយុជីវិត​និង​សុខភាព​ប្រជាពលរដ្ឋ ព្រមទាំង​ជំរុញឱ្យមាន​ប្រសិទ្ធភាព​ខ្ពស់​ក្នុងការ​អនុវត្ត​ពាណិជ្ជកម្ម​ស្មើភាព​សំដៅ​ការពារ​ផលប្រយោជន៍​អ្នកប្រើប្រាស់ រួមចំណែក​យ៉ាងសំខាន់​ក្នុងការ​កាត់បន្ថយ​ភាពក្រីក្រ​របស់​ប្រជាពលរដ្ឋ​។ ៣.​សុវត្ថិភាព​ម្ហូបអាហារ គឺជា​ការទទួលខុសត្រូវ​រួម និង​មាន​លក្ខណៈ​ពហុ​វិស័យ ដែល​ចាំបាច់​តម្រូវឱ្យ​មានការ​ចូលរួម​ពី​ក្រសួង​-​ស្ថាប័ន​ពាក់ព័ន្ធ ត្រូវ​ទទួលបន្ទុក​អនុវត្ត​ការគ្រប់គ្រង សម្របសម្រួល និង​ត្រួតពិនិត្យ​គុណភាព សុវត្ថិភាព​ម្ហូបអាហារ នៅតាម​គ្រប់​ដំណាក់កាល​នៃ​ខ្សែ​ច្រវាក់​ផលិតកម្ម​។ និង​៤.​សេចក្តីព្រាងច្បាប់​នេះ នឹង​បង្កលក្ខណៈ​ឱ្យ​ប្រទេស​កម្ពុជា រៀបចំ​បាន​នូវ​ប្រព័ន្ធ​សុវត្ថិភាព​ម្ហូបអាហារ ដែលមាន​លក្ខណៈ​ទំនើប តាមរយៈ​ការកសាង​វិធីសាស្ត្រ​ទប់ស្កាត់​ជាមុន និង​ការត្រួតពិនិត្យ​ខ្សែ​ច្រវាក់​ផលិតកម្ម ប្រសើរ​ជាង​ការត្រួតពិនិត្យ និង​វិភាគ​លើ​ផលិតផល​សម្រេច ដែលជា​គោលការណ៍​មួយ​យ៉ាងសំខាន់ ក្នុងការ​ជំរុញ​ផលិតផល​កម្ពុជា ឱ្យមាន​ការទទួលស្គាល់​ក្នុង​ទីផ្សារ​ពិភព​ល‍ោ​ក​។​

​ជា​លទ្ធផលអង្គប្រជុំ​ខាងលើនេះ​បាន​ពិភាក្សា និង​អនុម័ត​គាំទ្រ​លើ​សេចក្ដីព្រាងច្បាប់​នេះ​តាម​ជំពូក និង​មាត្រា​នីមួយៗ ដោយ​រក្សា​ខ្លឹមសារ​ដើម​ទាំងស្រុង​។ ជាមួយគ្នានេះ អង្គ​ប្រជុំបាន​សម្តែង​ការកោតសរសើរ​ដល់គ​ណៈ​ប្រតិភូ​តំណាង​រាជរដ្ឋាភិបាល ចំពោះ​កិច្ចខិតខំ​ប្រឹងប្រែង​ក្នុងការ​រៀបចំតាក់តែង​សេចក្តីព្រាងច្បាប់​ស្តីពី​សុវត្ថិភាព​ម្ហូបអាហារ​នេះ​ឡើង ប្រកបដោយ​ការយកចិត្តទុកដាក់​ខ្ពស់ និង​គិតគូ​ពី​សុខភាព​របស់​ប្រជាពលរដ្ឋ​៕​សរន