​ដោយៈ បាយ័ន / សៀមរាបៈ បុរស​ម្នាក់ បាន​ច្រក​ដីខ្សាច់​ដាក់​ក្នុងកា​រ៉ុង ថា​ស្ករស ហើយ​យកទៅលក់ ឱ្យ​អាជីវករ លក់​ឥ​វ៉ាន់​ចាបហួយ នៅក្នុង​ស្រុក​ប្រាសាទបាគង ខេត្តសៀមរាប ក្នុង​តំលៃថោក ប៉ុន្តែ​ក្រោយមក ជន​ឆបោក ត្រូវបាន​សមត្ថកិច្ច​ជំនាញ ចាប់ខ្លួន តាម​ពាក្យបណ្ដឹង​របស់​ជនរ​ង​គ្រោះ ។​

​យោងតាម​សមត្ថកិច្ច​ប៉ុស្ដិ៍នគរបាល​រដ្ឋបាល​ក​ណ្តែ​ក បានទទួល​បណ្តឹង ពី​ជនរងគ្រោះ ឈ្មោះ ហៅ លី​ហេង ភេទ​ស្រី អាយុ ៣៩ ឆ្នាំ នៅ​ភូមិ​ល្អក់ ឃុំ​ក​ណ្តែ​ក ស្រុក​ប្រាសាទបាគង ខេត្តសៀមរាប បាន​ប្តឹង​ថាៈ នៅ​ថ្ងៃទី ១៦-០៥-២០២២ ម៉ោង ៧ ព្រឹក គាត់​បើក​តូប​លក់​ឥ​វ៉ាន់ នៅ​ភូមិ​ជ្រៃ ឃុំ​ក​ណ្តែ​ក ស្រុក​ប្រាសាទបាគង ដូច​ធម្មតា ហើយក៏​មាន​ជន​ម្នាក់ យក​ស្ករស មក​លក់​ឱ្យ​គាត់ ក្នុង​តំលៃថោក​។​

​មនុស្ស​ប្រុស​ម្នាក់ ពុំ​ស្គាល់​អត្តសញ្ញាណ បាន​ជិះ​ម៉ូតូ​ហុងដា ពណ៌​ខ្មៅ ឌុប​កា​រ៉ុង​ពណ៌ ស មួយ មកដល់​សួរ​គាត់​ថា ទិញ​ស្ករស លក់​១​ការុង តម្លៃ ១០០.០០០ រៀល (​មួយ​សែន​រៀល​) គាត់​ព្រម​ទិញយក ដោយ​ពុំបាន​ពិនិត្យមើល​ទេ ។ លុះ​ម៉ោង ១៨​និង​៣០​នាទី ថ្ងៃទី​១៧ ខែឧសភា បុរស​ខាងលើ បាន​ដឹក​មក​លក់ ៣ ការុង​ទៀត គាត់​ព្រម​ទិញយក​ទៀត ក្នុងតម្លៃ ៣០០ .០០០ រៀល (​បី​សែន​រៀល​) និង​បាន​សុំ​លេខ ទូរស័ព្ទ​គាត់ សំរាប់​ទាក់ទង​ទិញ​ស្ករ ស បន្ថែម ។​

​នៅ​ព្រឹក​ថ្ងៃទី​១៨-០៥-២០២២ គាត់​បាន​ស្គាល់ឈ្មោះ​បុរស​នោះ​ថា ឈ្មោះ រិ​ន ចំរើន ក៏បាន​ទាក់ទង​លក់​ស្ករ​បន្ថែម ចំនួន ៥ កា​រ៉ុង​ទៀត គាត់​ទទួល​ទិញ​ទៀត ប្រហែល​កន្លះ ម៉ោង បុរស​ខាងលើ ដឹក​ស្ករ ស ចំនួន ៥ កា​រ៉ុង ទៅឱ្យ​គាត់​ដល់ផ្ទះ ហើយ​បាន​ទៅយក លុយ នៅ​តូប​លក់​របស់គាត់ ចំនួន ៥០០.០០០ រៀល (​ប្រាំ​សែន​រៀល​) ។​

​នៅ​ថ្ង​ដដែល​នោះ ប្អូនស្រី​ជា​ជនរងគ្រោះ ឈ្មោះ គុំ ស្រី​នៀង បាន​ទូរស័ព្ទ​ប្រាប់ថា ស្ករ​បង​ឯង សុទ្ធតែ​ដីខ្សាច់ ពេល​កំពុងនិយាយ​ទូរស័ព្ទ បុរស​ខាងលើ ជិះ​ម៉ូតូ​មកដល់​តូប របស់គាត់​ម្តងទៀត ។ ពេលនោះ គាត់​ហែក​កា​រ៉ុង​មើល ឃើញ​សុទ្ធតែ​ដីខ្សាច់ នៅក្នុង​កា​រ៉ុង ទាំងអស់ ហើយក៏​នាំគ្នា​ឃាត់​បុរស​នោះ​ទុក ហើយ​ប្រគល់ឱ្យ​សមត្ថកិច្ច​តែម្តង​។​

​តាម​ចម្លើយ​របស់​ឈ្មោះ រិ​ន ចំរើន ភេទ​ប្រុស អាយុ ៣៤ ឆ្នាំ ស្នាក់នៅ​ផ្ទះជួល ក្នុងភូមិ​អញ្ចាញ​ថ្មី សង្កាត់​នគរធំ ក្រុង​សៀមរាប បាន​សារភាពថា ខ្លួន​ពិតជា​បានធ្វើ សកម្មភាព យក​ដីខ្សាច់​ច្រក​ក្នុងកា​រ៉ុង ហើយ​លក់​ឱ្យ​ជនរងគ្រោះ ខាងលើ ចំនួន ៩ កា​រ៉ុង ពិតប្រាកដ​មែន ៕/V​