​ប្រែ​សម្រួលៈ​បំណង​(​បាងកក​ប៉ុស្តិ៍​)៖ ប្រធានាធិបតី​ហ្វីលីពីន​ទើប​ជាប់​ឆ្នោត​ថ្មី លោក​ហ្វែរ​ឌីណ​ង់ ម៉ាកូ​ស ជូនៀ កាលពី​ថ្ងៃ​ពុធ​ទី​១៨​ឧសភា​បាន​និយាយថា ទំនាក់ទំនង​របស់​ប្រទេស​លោក​ជា​មួយ​ចិន​នឹង​​ត្រូវ​ពង្រីក និង​ផ្លាស់ប្តូរ​ទៅកាន់​កំរិត​ខ្ពស់​ឡើង​មួយ​នៅក្រោម​រដ្ឋាភិបាល​របស់​លោក ហើយ​ថា​រដ្ឋាភិបាល​ទីក្រុង​ប៉េកាំង​បាន​ធានា​ចំពោះ​រូប​លោក​អំពី​ការគាំទ្រ​របស់​ខ្លួន​សំរាប់​គោលនយោបាយ​ការ​​បរទេស​ឯករាជ្យ​របស់​ហ្វីលីពីន​។​

​ម៉ាកូ​ស ដែល​បាន​ឈ្នះឆ្នោត​ក្នុង​សម្លេងគាំទ្រ​យ៉ាង​លើសលប់​កាលពី​សប្តាហ៍​មុន បាន​និយាយថា លោក​បាន​ពិភាក្សា​តាម​ទូរស័ព្ទ​«​ធំដុំ​ណាស់​»​កាលពី​ថ្ងៃ​ពុធ​ជាមួយ​ប្រធានាធិបតី​ចិន ស៊ី ជីន​ភីង ដែល​​បាន​យល់ព្រម​ធ្វើ​កិច្ចពិភាក្សា​ពិស្តា​បន្ថែម​លើ​បញ្ហា​ជាច្រើន​។​

​កូនប្រុស​របស់​អតីត​ប្រធានាធិបតី​វ័យ​៦៤​ឆ្នាំ​រូប​នេះ បាន​និយាយថា លោក​ស៊ី​ក៏​បាន​ទទួលស្គាល់​តួនាទី​របស់​ឪពុក​លោក​នៅក្នុង​ការបើក​ទំនាក់ទំនង​ការទូត​រវាង​ប្រទេស​ទាំង​ពីរ​ផង​ដែរ​។​លោក​ថា «​ផ្លូវ​​ទៅមុខ គឺ​ត្រូវ​ពង្រីក​ទំនាក់ទំនង​របស់​យើង​មិន​ត្រឹមតែ​ខាង​ការទូត​ប៉ុណ្ណោះ​ទេ តែ​ពាណិជ្ជកម្ម វប្បធម៌ និង​ថែម​ទាំង​ក្នុង​ការសិក្សាអប់រំ រហូត​ដល់​សុខភាព​ដើម្បី​ដោះស្រាយ​ការខ្វែងគំនិត​គ្នា​តូចតាច​​ដែល​យើង​មាន​នៅ​ពេល​ឥឡូវ​»​។​

​លោក​បាន​បន្តថា «​ខ្ញុំ​បាន​ប្រាប់​គាត់​ថា យើង​មិន​ត្រូវ​អនុញ្ញាត​អោយ​ជម្លោះ​ឬ​ការលំបាក​ដែល​យើង​មាន​នៅ​ពេល​ឥឡូវ​រវាង​ប្រទេស​យើង​ទាំង​ពីរ​ក្លាយជា​រឿង​សំខាន់​ប្រវត្តិសាស្ត្រ​ទេ​»​។​

​សូមបញ្ជាក់ថា​នៅ​ប៉ុន្មាន​ឆ្នាំ​មកនេះ​ហ្វីលីពី​និងចិន​មានទំ​នាក់​ទំនង​មិន​សូវ​ល្អ​នឹង​គ្នា​ដោយសារ​តែ​ចិន​ប៉េកាំង​អះអាង​ដែនទឹក​ធំធេង​ពេក​ជាន់​តំបន់​ដែល​រដ្ឋាភិបាល​ទីក្រុង​ម៉ានីល​អះអាងថា​ស្ថិតនៅ​​ក្រោម​ដែន​អធិបតេយ្យភាព​របស់​ខ្លួន និង​សកម្មភាព​របស់​កង​ឆ្មាំ​សមុទ្រ​ក៏ដូចជា​កង​នាវា​នេសាទ​របស់​ចិន​នៅក្នុង​សមុទ្រ​ចិន​ខាងត្បូង ។​

​បើ​តាម​ស្ថានទូត​ចិន​នៅ​ក្រុង​ម៉ានីល ការសន្ទនា​តាម​ទូរស័ព្ទ​នេះ​បាន​ផ្តោត​លើ​ទំនាក់ទំនង​ទ្វេភាគី និង​ការអភិវឌ្ឍន៍​តំបន់​៕

​ក្នុង​ការបោះឆ្នោត​កាលពី​សប្តាហ៍​មុន ម៉ាកូស​ឈ្នះ​បាន​សម្លេងគាំទ្រ​៥៩​ភាគរយ​។​លោក​នឹង​ចូលកាន់​មុខ​តំណែង​នៅ​ខែ​មិថុនា​