​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ វីរបុរស​បាល់ទាត់​អ៊ុ​យក្រែន អេ​នទ្រី សេវ​ឆេន​កូ (Andriy Shevchenko) បាន​ជួប​ជាមួយ​លោក​វ៉ូ​ឡូ​ឌី​មៀ ហ្សេ​លេន​ស្គី ក្នុង​ទីក្រុង​គៀវ​បន្ទាប់ពី​ក្លាយ​​ជា​ឯកអគ្គរដ្ឋទូត​ទីមួយ​នៃ​អង្គការ​សប្បុរសធម៌​ដែល​បង្កើតឡើង​ដោយ​ប្រធានាធិបតី​របស់​ប្រទេស​បន្ទាប់​ពី​ការ​លុកលុយ​របស់​រុស្ស៊ី​។​

​សេវ​ឆេន​កូ​បាន​លាតត្រដាង​ថា គាត់​បាន​ចូលរួម​ក្នុង​វេទិកា​រៃ​អង្គាស​ប្រាក់​របស់​អង្គការ UNITED24​ដែល​ស្នើ​សុំ​ប្រាក់​បរិច្ចាគ​ដែល​ចូល​ទៅ​ធនាគារជាតិ​អ៊ុយ​ក្រែន​ដោយផ្ទាល់​ហើយ​បន្ទាប់ម​កត្រូវ​​ចែកចាយ​ដើម្បី​ជួយ​ដល់​កិច្ចខិតខំ​ប្រឹងប្រែង​សង្គ្រាម​។​

​អតីត​ខ្សែប្រយុទ្ធ Chelsea, AC Milan និង Dynamo Kiev រូប​នេះ​នឹង​ក្លាយជា​ឯកអគ្គរដ្ឋទូត​នៃ​អង្គការ​សប្បុរសធម៌ ដែល​ផ្តល់​ការគាំទ្រ​ក្នុង​វិស័យ​នានា​រួមទាំង​ការ​ការពារជាតិ​និង​ការ​​ដោះមីន ជំនួយ​ផ្នែក​វេជ្ជសាស្ត្រ និង​ហេដ្ឋារចនាសម្ព័ន្ធ​។​

​គាត់​បាន​ត្រឡប់​ទៅ​ទីក្រុង​គៀវ​វិញ​ដើម្បី​ជួប​ផ្ទាល់​ជាមួយ​លោក​ហ្សេ​លេន​ស្គី ដែល​ការប្រព្រឹត្ត​របស់គាត់​ពេញ​មួយ​សង្គ្រាម​ជាមួយ​រុស្ស៊ី ដែល​បាន​ចាប់ផ្តើម​នៅពេល​ដែល​កងទ័ព​របស់លោក វ្ល៉ា​ឌី​មៀ ពូ​ទីន បាន​ឈ្លានពាន​ប្រទេស​កាលពី​ថ្ងៃទី ២៤ ខែ​កុម្ភៈ បាន​ជួប​ជាមួយនឹង​ការសរសើរ​យ៉ាង​ទូលំទូលាយ​។​

​មនុស្ស​ជាង ១៣ លាន​នាក់​បាន​ភៀសខ្លួន​ចេញពី​ប្រទេស​អ៊ុយ​ក្រែន​ចាប់តាំងពី​សង្គ្រាមដែល​បានចាប់ផ្តើម​ដោយ​លោក​ពូ​ទីន​។ ជន​ស៊ីវិល​រាប់ពាន់នាក់​ក្នុងប្រទេស​ត្រូវបាន​សម្លាប់ ដោយសារ​តែ​ការបាញ់​ផ្លោង​និង​មី​ស៊ី​លពី​សំណាក់​កងកម្លាំង​រុស្ស៊ី​។​

​ដូច​តម្លៃ​ផ្នែក​មនុស្សធម៌​ដែរ សង្គ្រាម​បាន​ផ្អាក​រាល់​កីឡា​ក្នុងប្រទេស​អ៊ុ​យក្រែន​។ រដូវ​កាល​ក្របខ័ណ្ឌ Premier League របស់​អ៊ុយ​ក្រែន​ត្រូវបាន​បញ្ចប់​កាលពី​ខែ​មុន​ខណៈ​ការប្រកួត​វគ្គ​ពាក់​​កណ្តាល​ផ្តាច់ព្រ័ត្រ​វើល​ខាប់​របស់​ក្រុម​ជម្រើសជាតិ​អ៊ុយ​ក្រែន​ជាមួយនឹង​ក្រុមជម្រើស​ជាតិ​ស្កុ​តឡែ​ន​ត្រូវបាន​ពន្យារពេលរ​ហូ​តដល់​ថ្ងៃទី ២៤ ខែមិថុនា​។​

​សេវ​ឆេន​កូ​បាន​សរសេរ​នៅលើ Instagram ថា “​ខ្ញុំ​បាន​ក្លាយជា​ឯកអគ្គរដ្ឋទូត​ទីមួយ​សម្រាប់​វេទិកា​រៃអង្គាស​ថវិកា UNITED24 ដែល​បើក​ដំណើរការ​ដោយ​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី​”​។​

“​ខ្ញុំ​បាន​ធ្វើដំណើរ​ពី​ទីក្រុង​ឡុង​ដ៍​ទៅ​កាន់​ទីក្រុង​គៀវ​ដើម្បី​ជួប​គាត់​ដោយផ្ទាល់​។ ខ្ញុំ​បាន​តំណាង​ប្រទេស​អ៊ុយ​ក្រែន​ក្នុងឆាក​បាល់ទាត់​អន្ត​រ​ជាតិ​អស់​ជាច្រើន​ឆ្នាំ​មកហើយ​។ សព្វថ្ងៃនេះ នៅពេល​ដែល​ប្រទេស​របស់​ខ្ញុំ​ត្រូវបាន​ហែកហួរ​ដោយ​សង្គ្រាម អាទិភាព​របស់​ខ្ញុំ​គឺ​ជួយ​អ៊ុ​យក្រែន មិនមែន​បាល់ទាត់​ទេ​។ ខ្ញុំ​សូម​អំពាវនាវ​ដល់​អ្នក​រាល់គ្នា​ធ្វើ​ការបរិច្ចាគ​”​។​

“​មូលនិធិ​ទាំងអស់​នឹង​ត្រូវ​បាន​ផ្ទេរ​ទៅ​គណនី​របស់​ធនាគារជាតិ​អ៊ុយ​ក្រែន​ភ្លាមៗ​។ អ្នក​អាច​បរិច្ចាគ​ទៅ​ផ្នែក​ដោះមីន​របស់​អ៊ុ​យក្រែន សង្គ្រោះ​ជីវិត​មនុស្ស​ដោយ​ការបរិច្ចាគ​ទៅ​ផ្នែក​វេជ្ជសាស្ដ្រ ឬ​ការ​សាងសង់​សាលា​មត្តេយ្យ ឬ​ស្ពាន​ឡើងវិញ​”​។​

“​រាល់​ការរួមចំណែក​គឺ​មាន​តម្លៃ​មិន​អាច​កាត់ថ្លៃ​បាន ខណៈ​រុស្ស៊ី​បាន​បំផ្លាញ​រួច​ទៅ​ហើយ​នូវ​អគារ​ជាង ៧.០០០ ខ្នង ផ្លូវ​រាប់ពាន់​គីឡូម៉ែត្រ និង​បន្ត​សម្លាប់​ជនជាតិ​អ៊ុយ​ក្រែនជា​រៀងរាល់ថ្ងៃ​។ ខ្ញុំ​សូម​អរគុណ​ប្រធានាធិបតី​អ៊ុយ​ក្រែន​សម្រាប់​ការជឿទុកចិត្ត​របស់គាត់ និង​សម្រាប់​កិត្តិយស​ដ៏​ឧត្តុង្គឧត្តម​នេះ ហើយ​សូម​សរសើរ​គ្រប់គ្នា​ចំពោះ​ការចូលរួម​របស់​អ្នក​!”​។​

“​ខ្ញុំ​សូម​អំពាវនាវ​ឱ្យ​អ្នក​ចូល​រួមចំណែក​ដល់​ជ័យជម្នះ​របស់​អ៊ុ​យក្រែន​។ ដល់​ជ័យជម្នះ​នៃ​សេរីភាព​។ ដល់​ជ័យជម្នះ​នៃ​ពិភពលោក​សេរី​ទាំងមូល​”៕

សេវ​ឆេន​កូ​ជួប​លោក​ហ្សេ​លេន​ស្គី​ដោយផ្ទាល់​កាលពី​ថ្ងៃ​ពុធ​